کھیڈ وچ سیاست
تحریر حمیداللہ بھٹی
کھیڈ دا سیاست نال کوئی تعلق نہیں پر ہن نہ صرف تعلق بن رہیا اے بلکہ کھیڈ اُتے سیاست حاوی ہون لگی اے۔ اٹھارہ ورہے دے وقفے دے بعد نیوزی لینڈ دی کرکٹ ٹیم پاکستان دے دورے اُتے آئی ابتدا وچ تے کھیڈ بالا دست رہیا پر راولپنڈی میچ توں کجھ لمحے پہلاں کھیڈ نوں شکست تے سیاست نوں برتری مل گئی جس دے نتیجے وچ ٹاس توں پہلاں نیوزی لینڈ نے سکیورٹی وجوہات دی بنا اُتے سیریز دی منسوخی دا غیر معمولی فیصلہ سنا دتا فیصلے اُتے کرکٹ شائقین ہجے تیکر حیرت زدہ تے غم زدہ نیں ایہہ کھیڈ اُتے سیاست دا انج دا کاری وار سی کہ عمران خان ولوں اپنی نیوزی لینڈ دی ہم منصب وزیراعظم جسنڈا نال ٹیلی فون اُتے گل بات دے باوجود تبدیلی نہ آئی تے غلط فیصلے اُتے اڑ جان نال خدشہ پیدا ہو گیا کہ عالمی طاقتاں کھیڈ نوں مفادات دی بھینٹ چڑھا دین گیاں کیوں جے نیوزی لینڈ نے دورے دی منسوخی اپنے ملک یا کسے عالمی سکیورٹی ایجنسی دے کہن اُتے نہیں کیتی نہ ای کرکٹ ٹیم دے کپتان یا کسے کھلاڑی یا نیوزی لینڈ کرکٹ دے سربراہ نے انج دی کوئی تجویز دتی ،ہاں البتہ پنج ملکاں، امریکہ، برطانیہ، کینیڈا، آسٹریلیا تے نیوزی لینڈ اُتے مشتمل دفاعی اتحاد five eye سیریز دی منسوخی دا محرک بنیا اے ایس اتحاد وچ شامل سارے ملکاں وچوں نیوزی لینڈ سب توں نکا ملک اے جس نے چارے وڈے ملکاں دے کہن اُتے کھیڈ دے میدان توں راہ فرار اختیار کیتی اے پر انج دے فیصلیاں نال کھیڈ جہی صحت مندانہ سرگرمیاں متاثر ہو سکدیاں نیں تے عین ممکن اے اگلے مرحلے وچ جس طرح آسٹریلیا تے برطانیہ نے پاکستان دا دورہ کرن توں معذوری ظاہر کیتی اے شائقین نوں ویسٹ انڈیز وغیرہ ولوں وی انج دا فیصلہ ساہمنے آئے انج ہویا تے ایہہ کھیڈا ںنوں محدود کرن تے صحت مندانہ سرگرمیاں اُتے قدغن دے مترادف ہوئے گا۔
پاکستان وچ امن بڑی حد تیکر بحال ہو چکیا اے ایہہ جیہڑے اِکا دُکا واقعے ہو رہے نیں ایہناں دے پس پردہ وی غیر ملکی ہتھ اے ثبوت افغانستان توں انخلا دے دوران پوری دنیا دے سفارتکاراں ، سکیورٹی اہلکاراں تے شہریاں دا جاناں بچان لئی پاکستان دا رختِ سفر بنھنا اے کیوں جے ایتھے زندگی تمار تر رعنائیاں دے نال رواں دواں اے نہیں تے سفارتکار، فوجی تے سویلین پناہ لئی پاکستان ہر گز نہ آندے فیر کیوں نیوزی لینڈ نے پُر امن ملک دا عالمی تشخص مجروح کرن دی کوشش کیتی ایہہ جاننا مشکل نہیں بھارت نے امریکہ تے برطانیہ دا چہیتا ہون دا فائدہ چکدے ہوئے پاکستان نوں محفوظ ملک ثابت کرن دی کوشش کیتی اے۔
نیوزی لینڈ کرکٹ ٹیم دے دورہ تے سیریز دی منسوخی دی وجوہات واضح نیں بھارت دی سازشاں تے عالمی قوتاں دی سرپرستی نال کرکٹ سیریز منسوخ ہوئی اے پاکستان نے بمع ثبوت واضح کر دتا اے کہ 21 اگست نوں بھارتی اخبار سنڈے گارڈین دے بیورو چیف ابی نندن مشرا نے اپنے لکھے گئے آرٹیکل وچ خدشہ ظاہر کیتا کہ نیوزی لینڈ دی کرکٹ ٹیم نوں پاکستان دے دورے دے دوران دہشت گرد حملے دا ساہمنا ہو سکدا اے پر دورہ منسوخ نہ ہویا پر بظاہر ایسے آرٹیکل توں سازشاں دا مرکزی خیال لیا گیا تے دھمکیاں دین دے سلسلے دا آغاز ہویا کیوی ٹیم دے اوپنر مارٹن گپٹل نوں ممبئی وچ بنی میل توںاہلیہ دے ذریعے قتل دی دھمکی دتی گئی فیر دونواں ٹیماں دے ٹاکرے توں پہلاں احسان اللہ احسان نامی بندے دی جعلی فیس بک آئی ڈی بنا کے لوکیشن سنگا پور دی وکھائی گئی جس دا منبع بھارت اے پر مہمان ٹیم نے سکیورٹی تھریٹ دی تفصیل نال میزبان ملک نوں آگاہ کرن دی بجائے نسن نوں ترجیح دتی حالانکہ مہمان ٹیم نوں میزبان ملک اینی سکیورٹی دیندا اے جنہی بقول شیخ رشید نیوزی لینڈ دے کول فوج نہیں ، ہن ویسٹ انڈیز نوں جعلی دھمکی ملن دا وی خدشہ اے انج دی ای من گھڑت دھمکی آسٹریلیا نوں وی مل سکدی اے تاکہ کھیڈ دے میدان توں نسن دے بہانے پیش کیتے جا سکن سردست نیوزی لینڈ ٹیم دے حوالے نال مقدمہ درج کر کے ایف آئی اے حکام نے انٹرپول توں تحقیقات لئی رابطہ کیتا تے پتہ چلیا کہ جعلی ای میل ایڈریس حمزہ آفریدی دے ناں اُتے بنان دے تیرہ منٹ بعد دھمکی آمیز ای میل گھل دتی گئی جس توں ایہہ سمجھنا اوکھا نہیں کہ ایہہ سب کجھ سوچے سمجھے منصوبے دے تحت ہویا نیز حمزہ آفریدی دا ناں پاکستان نال تعلق جوڑن لئی استعمال کیتا گیا۔
عالمی تجارت وچ اسلحے دی تجارت فروغ پا رہی اے پر کئی دہائیاں توں اسلحے دی تجارت اُتے کجھ ملکاں دی اجارہ داری اے پر پاکستان وی کجھ عرصے توں اک نواں حصہ دار بن کے معیاری تے سستے داموں لڑاکا طیاریاں توں لے کے ٹینک، توپاں تے دیگر ہتھیار ویچن لگیا اے، دنیا دے واحد ایٹمی اسلامی ملک دی معیشت مضبوط ہوئے تے ایس دے عالمی کردار وچ وادھا ہوئے کجھ عالمی طاقتاں انج نہیں چاہندیاں اوہ پاکستان نوں معاشی طور اُتے لاغر رکھنا چاہندیاں نیں ایس لئی کدی غیر محفوظ جوہری ہتھیاراں دا ڈھنڈورہ پٹیا جاندا اے تے کدی داعش تے القائدہ دے منظم ہون تے طاقت پھڑن دیاں گلاں کیتیاں جاندیاں نیں حالانکہ امر واقعہ ایہہ وے کہ پاکستان توں زیادہ بھارت وچ مذہبی انتہا پسندی اے پر کسے عالمی قوت نوں پریشانی نہیں کیوں جے اوہ غیر مسلم اے ہجے حال ای وچ ارجنٹائن ولوں پاکستان توں بارہ جے ایف تھنڈر طیارے خریدن لئی آمدہ بجٹ وچ 660 ملین ڈالر مختص کرن دی خبر برطانیہ اُتے بجلی وانگوں ڈگی اے تے اوہ چاہندا اے کہ کوریا وانگوں پاکستان وی ارجنٹائن نوں طیاریاں دی فراہمی منسوخ کر دیوے کیوں جے ا رجنٹائن تے برطانیہ دے تعلقات خاصے کشیدہ نیں ایس لئی اوہ حریف ملک نوں دفاعی لحاظ نال مضبوط ویکھنا نہیں چاہندا ایہو ناراضگی اوہ پاکستان دے کھیڈ دے میدان بے آباد کرن تیکر لے آیا اے۔
مارگریٹ تھیچر دے بعد برطانیہ نے آزاد خارجہ پالیسی چھڈ کے امریکی خوشنودی حاصل کرنا ای حرزجاں بنا لیا اے جیہڑا افغانستان توں ملن والی ناکامی تے عجلت وچ انخلا نوں پاکستان دی سازش قرار دیندا اے حالانکہ انخلا دے دوران پاکستان نے جس طرح غیر ملکی فوج تے سویلین نوں کڈن وچ سفارتی و عملی مدد کیتی اوہ دوستانہ تقاضیاں توں ودھ کے اے پر امریکی رنجش ختم نہیں ہوئی پاکستان دے خلاف سازشاں وچ امریکہ، برطانیہ تے بھارت اک نیں تے اج کل ایشیا وچ بھارت نہ صرف امریکہ تے برطانیہ دا چہیتا اے بلکہ دونویں ملک مشترکہ طور اُتے بھارت نوں چین دے مقابلے اُتے لیان لئی اسلحہ نال لیس کر رہے نیں حالانکہ بھارت ایس دی سکت نہیں رکھدا۔ Five Eye دے ممبران آسٹریلیا، برطانیہ تے نیوزی لینڈ کرکٹ ٹیماں دی آمد توں معذرت اصل وچ پاکستان نوں چین دا ساتھ دین، روس نال راہ و رسم ودھان تے عالمی منڈی وچ ہتھیاراں دی فروخت وچ حصہ دار بنن دی سزا اے پر کھیڈ دے شائقین نوں صحت مندانہ تفریح توں محروم کرنا ہر حوالے نال غلط اے جے کھیڈ اُتے ایسے طرح سیاست حاوی رہی تے پاکستان ہتھیاراں اُتے لگن والی پابندیاں وانگوں جس طرح خود کفالت دی منزل حاصل دے نیڑے آ گیا اے کھیڈ دے حوالے نال وی دیگر آپشن ول جا سکدا اے وسطی ایشیائی ملکاں نال کرکٹ دے فروغ دے معاہدے ثابت کردے نیں کہ پاکستان آزادانہ فیصلے کرن وچ دشواری محسوس نہیں کر رہیا پر کھیڈ اُتے سیاست اک بزدلانہ فیصلہ اے ایس لئی طاقتور ہون دے مرض وچ مبتلا ملکاں نوں اپنے طرز عمل اُتے نظر ثانی کرنی چاہیدی اے۔
