عمران خان5ورھے پورے کرن گے:شیخ رشید احمد
اسلام آباد(پنجابی میڈیا گروپ)وفاقی وزیر داخلہ شیخ رشید احمد نے آکھیا اے کہ اپوزیشن سرکار دا مقابلہ نہیں کرسکدی ،عمران خان پنج سال پورے کرن گے ، مسلم ممالک نوں افغان عوام نوں انسانی امداد فراہم کرن لئی اگے آنا چاہیدا اے۔گوانڈی ممالک توں ات گرد گروہاں دے داخلے اتے قابو پان لئی سرحد اتے باڑ لگان دا کم مکمل اے۔ سی پیک ہر قیمت اتے مکمل کیتا جاوے گا۔ وزیراعظم عمران خان پرائس کنٹرول کمیٹیاں دی نگرانی کر رہے نیں،لوکائی نوں اگلے چند مہیناں وچ ضروری اشیاء اتے ریلیف ملے گا۔ اک انٹرویو وچ اوہناں نے آکھیا اے کہ پاکستان نے اشیاء خ وردونوش گوانڈی ملک افغانستان روانہ کردتیاں نیں تے مستقبل وچ وی ایہہ امدادجاری رکھی جاوے گی۔ دیگرممالک نوں وی افغان عوام دا خیال رکھنا چاہیدا اے۔ اوہناں نے مزیدآکھیا اے کہ سی پیک ہر قیمت اتے مکمل کیتا جاوے گا۔ کجھ بین الاقوامی قوتاں چین پاکستان اقتصادی راہداری لئی رکاوٹاں پیدا کر رہیاں نیں۔ وفاقی وزیر داخلہ نے آکھیا کہ کورونا دے باعث پوری دنیا وچ مہنگائی وچ اضافہ ہویا اے، بین الاقوامی سطح اتے پٹرولیم مصنوعات دی قیمتاں وچ اضافہ دے باعث پاکستان وچ وی پٹرولیم مصنوعات دی قیمتاں وچ اضافہ کیتا گیا۔





















