ڈیفنس کلب وچ’’کہانی اک ماں دی ‘‘ دا مکھ وکھالی اکٹھ

ایس اکٹھ دا پربندھ نامور شاعرہ، پنجابی کہانی کار رخشندہ نوید ہوراں کیتا

رپورٹ: آفاق بٹ

پنجابی دے اگھے ناول کار، کہانی کار تے شاعر زاہد حسن ہوراں دے پنجویں تے نویں ناول ’’کہانی اک ماں دی ‘‘ دا مکھ وکھالی اکٹھ ہویا۔ اکٹھ دا اک مڈھلا مدعا زاہد حسن ہوراں نوں مبارکباد پیش کرنا تے اوہناں توں ایس ناول دے متا، مقصد تے تخلیقی عمل بارے گل کتھ کرناں وی سی۔
ایس اکٹھ دا پربندھ نامور شاعرہ، پنجابی کہانی کار رخشندہ نوید ہوراں کیتا۔ جیہدے وچ اردودیاں عمدہ ناول کار، سفر نامہ نگار تے کالم نگار سلمی اعوان، امریکا توں ہنے ای مڑن والیاں ناول نگار، کہانی کار تے شاعرہ نیلم احمد بشیر، بوہت نویکلے سبھادیاں کہانی کار تے شاعرہ فرحت پروین، کئی شعری پراگیاں دے شاعر شہزاد نیئر ہوراں رلت کیتی تے زاہد حسن ہوراں دے پورے کم سمیت ایس ناول نوں وی بے حد سراہیا۔
گل دا مڈھ بنھدیاں ہویاں رخشندہ نوید ہوراں آکھیا، جو اصل وچ اسیں ایہہ اکٹھ پچھلے ہفتے رکھیا ہویا سی پر لاہور وچ ڈھیر بارش ہون پاروں ہن ایہہ اج کیتا جا رہیا اے۔میں ایہدے وچ شریک ہوون والے سبھ احباب دی شکر گزار آں، اصل وچ ساڈا مقصد زاہد حسن ہوراں دے اپنی ماں بولی وچ ناولاں تے کہانیاں راہیں امیری کرن تے اوہناں نوں سراہناں اے۔ اسیں اوہناں دے شروع لا دے کم توں واقف آں، بھاویں اوہ شروع وچ اردو وچ وی لکھدے رہے تے ہن وی لکھدے نیں، پر اوہناں جس طرحاں محنت تے لگن نال اپنا پینڈا اگے ٹوریا اے خاص طور تے اوہ پنجابی ول وی شاعری دی راہ تے آئے، پر پچھلے کجھ ورھیاں توں اوہناں اپنا فوکس کہانی تے مڑ ناول کاری تے رکھیا اے۔ ایہو کارن اے جو اوہ پنجابی وچ مثبت سبھ توں ڈھیر تخلیقی نثر لکھن والے ادیب وجہوں جانے جاندن۔ اوہناں دے ہن تیک پنج ناول، کہانیاں دے دو پراگے چھپ چکے نیں۔ اوہناں دا ریسرچ بارے کیتا ہویا کم ایس توں وکھرا اے۔ حالانکہ اوہ درس و تدریس نال جڑے ہوئے نیں، ایس دے نال اوہ ادبی سنگتاں نوں وی ویلا دیندن۔ مڑ وی اوہ جتناں کم کر لیندن اوہناں دی ہمت دی داد دینی چاہیدی اے۔
وکھرے سبھا دے شاعر تے ایڈیٹر ادب لطیف شہزاد نیئر ہوراں آکھیا کہ ایہہ حقی تے سچی گل اے کہ جس لگن تے حوصلے نال زاہد ہوریں اپنی ماں بولی وچ کم پئے کردن، ایہہ ایہناں دا ای حوصلہ تے ہمت اے حالانکہ اسیں وی اپنی ماں بولی وچ لکھن دی سدھر رکھدے آں پر اوہ ویلا نہیں آیا پر زاہد ہوراں دا کم سانوں پنجابی ول ہریردا رہندا اے۔
نیلم احمد بشیر ہوراں ایس ناول نوں مکھ رکھدیاں اپنی گل بات کردیاں ہویاں آکھیاکہ انج اسیں جو کجھ وی لکھدے آں اوہدے وچ کجھ نہ کجھ تاں ہڈ بیتی دا اثر ضرور آ ای جاندا اے۔ فرحت پروین ہوراں دا آکھناں سی جو لکھناں تے اوہ وی تخلیقی طور تے ایہہ اک اوکھا تے افضل کم اے مُڑ جیکر تسیں اپنی مادری زبان وچ وی لکھو تاں ایہہ ہور وی افضل ہو جاندا اے تے زاہد حسن ہوراں، ایہی کم پئے کردے نیں تے افضل کم پئے کردے نیں۔
سلمی اعوان ہوراں دا آکھنا سی جو زاہد حسن ورگے متحرک تے ماں بولی دے لکھیاراں نوں ملن تے اوہناں دے کم بارے جانن مگروں ساڈا وی ماں بولی وچ لکھن نوں من پیا کردا اے۔ سگوں میں تے پنجابی وچ کجھ کہانیاں سنوار بناوی لیئیاں نیں، پر ایس دوران ایہہ احساس وی ضرور ہوندا رہیا جو ایہہ جتنا ودھیا اوتناں ای اوکھا کم وی اے۔ پر زاہد ہوراں جیکر ماں بولی وچ لکھیا اے تاں ماں بولی نے وی اوہنوں اوس دا صلہ دتا اے اوہ دنیا بھر دے وڈے تے اہم ایوارڈ حاصل کر چکے نیں۔ چنگی گل ایہہ وے جو ایوارڈز حاصل کرن دے باوصف اوہ اپنے کم نوں جاری رکھے ہوئے نیں اپنے طور تے ایہہ اکٹھ سوہناں تے ہمیش یاد رہ جاون والا اکٹھ سی۔