پاکستان وچ کرونا وائرس دے مشتبہ مریضاں دی تعداد 5ہو گئی

لہور: پاکستان وچ کرونا وائرس دے مشتبہ مریضاں دی تعداد 5ہو گئی، 3سروسز ہسپتال لہور جد کہ 2نشتر ہسپتال ملتان وچ زیر علاج نیں۔

وسیلیاں دے مطابق نشتر ہسپتال وچ داخل دو مریضاں وچوں اک مریض پاکستانی شہری اے، سروسز ہسپتال وچ داخل تناں مریضاں دا تعلق چینی شہر ووہاں نال اے۔

ذرائع این آئی ایچ سارے مریضاں دے سیمپل ہانگ کانگ لیبارٹری نوں گھل دتے گئے نیں، 24توں 48گھنٹیاں وچ رپورٹاں آن دے بعد ای علاج دا آغاز کیتا جا سکے گا، سارے مشکوک مریضاں نوں آئیسولیشن تے انتہائی نگہداشت وچ رکھیا گیا اے۔

اودھر لہور دے سروسز ہسپتال دی انتظامیہ نے کرونا وائرس دے مشتبہ مریضاں دا علاج کرن والے ڈاکٹراں نوں مکمل حفاظتی لباس پوا دتے نیں، حفاظتی لباس وچ ماسک، گلوز تے گلوگلز وی شامل نیں۔

سروسز ہسپتال دی ایمرجنسی وچ کرونا وائرس کاؤنٹر وی قائم کر دتا گیا اے۔ ایم ایس ڈاکٹر سلیم چیمہ دا کہنا سی حفاظتی لباس دین دا مقصد ڈاکٹراں تے دوجے عملے نوں مہلک وائرس توں بچانا اے۔