کٹے ہوئے سر دی کتھا

امرجلیل

آن والے ورھیاں وچ لگن والے ٹھڈیاں تے ٹھوکراں توں بے فکر مینڈک کالونی دے ننگ دھڑنگ بچے بھاری بھر کم فٹ بال نوں ٹھڈے مار رہے سن۔ فٹ بال بھاری بھر کم ایس لئی سی کہ پھٹے پرانے فٹ بال وچ بچیاں نے طرح طرح دیاں الٹیاں سدھیاں چیزاں پا کے گول مول بنان دی کوشش کیتی سی۔ چاروں پاسے تھاں تھاں کچرے دے ڈھیر پئے سن۔ میدان دے اک پاسے مخدوش قبراں سن۔ کجھ افغانی بچے کوڑے کرکٹ توں اپنے مقصد دیاں چیزاں لبھ رہے سن تے گندیاں بوریاں تے وڈے وڈے شاپر وچ پائی جا رہے سن تے کھل کھلا کے ہنس رہے سن۔ اچانک بہت وڈے بمب پھٹن دی آواز ماحول وچ گونج اٹھی جنہے مینڈک کالونی توں علاوہ مچھر کالونی‘ جھینگر کالونی‘ کاکروچ کالونی تے دوجیاں بستیاں نوں ہلا کے رکھ دتا۔ مینڈک کالونی‘ مچھر کالونی دے جنوب مشرق وچ بھینس کالونی توں کجھ گز دے فاصلے تے بکرا کالونی دے پچھے آباد اے۔ مچھر کالونی دا ناں مچھر کالونی ایس لئی پے گیا سی کیوں جے اوتھے مچھراں دی بھرمار سی سگوں ہن وی اے۔ کسے حکومت نے مچھر کالونی وچ مچھراں دی پیدائش تے افزائش روکن لئی کوشش نہیں کیتی۔ ایس بے حسی دی وجہ ایہ دسی جاندی اے کہ ایس کم لئی امریکہ توں امداد نہیں آئوندی۔ ہن تے ایہ حال اے کہ سورج ڈبن دے بعد اسمان توں مچھراں دے غلاف دے غلاف اتر آئوندے نیں تے پوری کالونی نوں اپنی لھویٹ وچ لے لیندے نیں۔ سردیاں دے موسم وچ جہڑے لوکاں دے کول لحاف نہیں ہوندا اوہ مچھراں دا لحاف اوڑھ کے سوں جاندے نیں ایس لئی مچھر کالونی دا ناں مچھر کالونی پے گیا اے۔ مچھرکالونی دا اپنا اصلی پرانا ناں لاوارث کالونی سی جو بندہ کراچی وچ وارد ہوندا سی اوہ لامحالہ لاوارث کالونی دا رخ کردا سی۔
لاوارث کالونی کیو ںجے کاکروچ کالونی دے شمال مغرب وچ واقع سی تے بھینس کالونی توں زیادہ دور نہیں سی۔ لاوارث کالونی دے سیانیاں نے لاوارث کالونی نوں کاکروچ کالونی تے بھینس کالونی نال ملدا جلدا ناں دین دا فیصلہ کر لیا۔ ایس کم لئی گول میز کانفرنس سدی گئی۔ کانفرنس لئی گول میز مل نہ سکی ایس لئی گول میز دے مدعوئین نے چوکور میز تے ای گزارا کر لیا۔ لاوارث کالونی لئی کئی ناں زیرغور آئے۔ مثلاً مکھی کالونی‘ چیونٹی کالونی وغیرہ۔ کسے سیانے نے تجویز دتی کہ کیوں نے اسیں اپنی کالونی دا نوا ںناں وزیراعظم یاں صدر مملکت دے ناں نال منسوب کریئے۔ کئی مندوبین نے ایس تجویز دی مخالفت کردے ہوئے کہیا کہ وزیراعظم تے صدر آنی جانی تے فانی چیزاں نیں۔ مچھر‘ کاکروچ‘ چیونٹیاں وغیرہ ہمیشہ رہندیاں نیں۔ اسیں اپنی کالونی نوں لافانی ناں دیاں گے۔ ایس گل نے گرما گرم بحث چھیڑ دتی۔ کیہ فانی اے تے کیہ فانی نہیں؟ کون فانی اے تے کون فانی نہیں؟ شور ودھدا گیا۔ ہلڑ ہنگامے وچ نمایاں آواز مینڈک دی سی۔ ویکھدیاں ای ویکھدیاں مینڈک دے ٹرانے دی آواز ساریاں آوازاں تے بھاری پے گئی تے فیر سانجھا فیصلہ ایہ سامنے آیا کہ اج توں لاوارث کالونی نوں تریخ دے پنیاں وچ مینڈک کالونی لکھیا تے پڑھیا جاوے گا۔ ایس قسم دیاں ان گنت کالونیاں نے کراچی دے دوالے گھیرا پا دتا اے۔ کالونیاں وچ رہن والیاں نے اپنے اپنے کونسلر منتخب کر لئے نیں۔ بھینس کالونی دا کونسلر بھینس ورگا اے۔ کنواری کالونی دا کونسلر کنوارا اے مینڈک کالونی دا کونسلر مینڈک نال مشابہ اے تے کلفٹن وچ اک نجی تالاب وچ رہندا اے۔ ساریاں کالونیاں اک دوجے دے نیڑے نیں۔ کسے وجہ نال جے قنون لاگو کرن والے اک کالونی تے دھاوا بول دین تے آل دوالے دیاں کالونیاں دے لوک اوہناں دی مدد نوں اپڑ جاندے نیں۔ لوڑ پین تے دور دراز دیاں کالونیاں دے جاں فروش وی اوہناں دی مدد نوں اپڑ جاندے نیں۔ جے کدی غیرت دے ناں تے اک دوجے نال الجھ پین تے بیچ بچائو لئی کسے ادارے نوں اپنے نیڑے نہیں آن دیندے۔ قتل و غارت گری دے بعد جرگے وچ جزا تے سزا دے فیصلے سنائے جاندے نیں۔ ایہ اوہناں دناں دی کتھا اے جدوں مینڈک کالونی وچ زوردار بمب دھماکا ہویا سی۔ اوس ویلے مینڈک کالونی دے بچے خانہ خراب میدان وچ بھس بھرے ہوئے فٹ بال نوں ٹھڈے مار رہے سن۔ دھماکے دی آواز سن کے بچے کناں وچ انگلیاں پا کے گندے گرائونڈ تے پٹھے لیٹ گئے سن۔ کجھ دیر تک اوہناں نوں زمین کمبدی ہوئی محسوس ہوئی فیر اچانک خون وچ لت پت کٹیا ہویا سر بڑی اچائی توں اوہناں دے نیڑے آ کے ڈگیا۔ کٹیا ہویا سر ویکھ کے بچے ڈر گئے۔ اوہ پھٹی اکھاں نال کٹے ہوئے سر ول ویکھن لگ پئے۔ کٹے ہوئے سر دیاں اکھاں کھلیاں سن۔ لگدا سی جیویں اوہ بچیاں نوں گھور رہیا سی۔ بچے ڈر دے مارے دبک کے گندے گرائونڈ تے پئے رہے۔ اک بڑے چھوٹے بچے نے تھر تھر کمبدے ہوئے کہیا مینوں ایہدیاں کھلیاں اکھاں توں ڈر لگ رہیا اے‘ توں گھبرا مت ٹڈے‘ اک وڈے بچے نے کہیا میں ایہدیاں اکھاں بند کر دینا واں۔ وڈا بچہ اَرکاں تے ٹردا ہویا کٹے ہوئے سر دے نیڑے اپڑیا۔ اوہنے کٹے ہوئے سر دیاں کھلیاں اکھاں تے ہتھ رکھ دتا۔ کٹے ہوئے سر دیاں کھلیاں ہوئیاں اکھاں بند ہو گئیاں۔ فیر گرجدار تے رعب دارآواز گونجی‘ خبردار‘ ہتھ نہ لانا۔
بچے ڈر کے دور ہٹ گئے۔ اہلکاراں دی نفری نسدی ہوئی آئی تے کٹے ہوئے سر دے دوالے گھیرا پا لیا۔ دونڈر کمانڈو ہولی ہولی کٹے ہوئے سر ول ودھن لگ پئے۔ نیڑے اپڑ کے اوہناںنے پوزیشن سانبھ لئی۔ طرح طرح دے آلات نال کٹے ہوئے سر دا جائزہ لین دے بعد اوہناں نے فون تے وڈے افسر پھنے خان نوں اطلاع دیندے ہوئے کہیا: سر‘ اسیں خودکش حملہ آور دے کٹے ہوئے سر وچ لگا ہویا طاقتور بمب نکارہ بنا دتا اے۔ دوجے دن پھنے خان نے پریس کانفرنس وچ کہیا۔ خودکش بمبار دے سر وچ لگا ہویا بمب جے چل جاندا تے کراچی وچ کہرام مچا دیندا۔ کٹے ہوئے سر توں ہور پچھ گچھ جاری اے۔ اہم انکشافات سامنے آن دی امید اے۔٭