نعت شریف

الیاس آتش

ہر ویلے سجیا رہندا اے دربار محمدؐ عربی دا
پئی ساری دنیا من دی اے کردار محمدؐ عربی دا
ابوبکرؓ، عمرؓ، علیؓ سبھناں توں صدقے جاواں میں
بس ودھ توں ودھ کے سوہنا ایں ہر یار محمدؐ عربی دا
جپدا رہیں نام محمدؐ دا ہر ویلے ورد کماویں توں
بس مرنوں پہلاں بن جاویں اک وار محمدؐ عربی دا
منیا اے اوسے اوسے نے سرکارؐ دی اُچی عظمت نوں
جس جس دیاں اکھاں کیتا اے دیدار محمدؐ عربی دا
وسدی اے رحمت ہر ویلے سوہنے دے شہر مدینے تے
دنیا وچ سب توں سوہنا اے گھر بار محمدؐ عربی دا
بھُل جاندا اے دنیا نوں تے دنیا دے ہر میخانے نوں
اک واری جو بن جاندا اے میخوار محمدؐ عربی دا
لبھدے نیں دنیا والے ای دنیا دی دولت دنیا تے
سانوں تے ہے اک عشق فقط درکار محمدؐ عربی دا
آتش اوہ جھولی بھردے نیں در تے آئے ہر منگتے دی
وجدا اے ڈنکا ہر پاسے سردار محمدؐ عربی دا