عمران خان ،اوورسیز پاکستانی تے پی ایف سی

جھیل سیف الملوک توں نکلن والے پانی نال دل و دماغ نوں جیہڑی تازگی تے خوشی ملدی اے اوہ لفظاں وچ بیان نہیں ہو سکدی

عتیق انور راجا

جناب عمران خان جدوں توں وزیراعظم پاکستان منتخب ہوئے نیں اوہ پاکستان وچ سیاحت دے فروغ لئی مسلسل کوششاں کر رہے نیں۔ ایہہ ایہناں دی کوششاں دا نتیجہ اے کہ ہر سال پوری دنیا توں سیاح اک پاسے پرانے قلعے ، شہر تے کھنڈرات ویکھن آ رہے نیں تے اوتھے پاکستان دے شمالی علاقہ جات وچ موجود بلند و بالا پہاڑ، گہری کھائیاں، صاف و شفاف چشمے، جھیلاں، آبشاراں تے پتھراں نال ٹکراندے، شور مچاندے گیت گاندے دریا سیاحواں دی دلچسپی دا سبب بن رہے نیں۔ پاکستان فیڈریشن آف کالمنسٹ پاکستان دا روشن چہرہ دنیا دے ساہمنے لیان لئی پچھلے پنج چھ ورھیاں توں متحرک اے۔ ملک سلمان صاحب کوشش کردے نیں کہ کالم نگاراں، ٹی وی اینکراں تے بیورو کریٹس دے نال ملک دے مختلف حصیاں دا دورہ کیتا جائے تے فیر اخباراں وچ کالم، ٹی وی اُتے پروگرام تے سوشل میڈیا اُتے وی لاگ تے ویڈیو ز شیئر کر کے نہ صرف پاکستانیاں نوں بلکہ پوری دنیا دے سیاحواں نوں اپنے ملک دی خوبصورت وکھائی اے۔ کجھ دن پہلے ملک سلمان دی قیادت وچ پی ایف سی دا کارواں ناران، کاغان، جھیل سیف الملوک، ایبٹ آباد لئی روانہ ہویا تے ایس وار قافلے وچ بوہت سارے نویں چہرے شامل سن۔ گڈی جویں ای سوات مالا کنڈ دے علاقے وچ اپڑی تے قدرتی ماحول دی خوبصورتی نال ہر کوئی خوش سی۔ جھیل سیف الملوک توں نکلن والے پانی نال دل و دماغ نوں جیہڑی تازگی تے خوشی ملدی اے اوہ لفظاں وچ بیان نہیں ہو سکدی۔ مقامی لوکاں نال گل بات ہوندی تے اوہ اپنے چنگے اخلاق توں متاثر کرن دی بھرپور کوششاں کردے۔ ہوٹل صاف ستھرے ہوا دار کمریاں اُتے مشتمل سن تے کھان دا معیار وی بہترین نظر آیا۔ تیجے دن جدوں قافلہ ناران توں واپس نکلیا تے طے پایا کہ رات مانسہرہ لنگھائی جائے تے صبح شہر دی سیر کیتی جائے۔ 2005

ء دے زلزلے نے جنہاں علاقیاں نوں سب توں زیادہ متاثر کیتا ایہناں وچ ایبٹ آباد تے مانسہرہ شامل نیں پر اسیں ویکھیا کہ ہن مانسہرہ وچ فیر توں وڈے وڈے ہوٹل، پلازے، سکول و کالجز تے مارکیٹاں بن چکیاں نیں۔ دسیا گیا کہ زلزلے دے ویلے دو ہزار دے نیڑے مختلف این جی اوز ایس علاقے وچ سرگرم عمل سن پر بوہت ساری تنظیماں ویلے دے نال بوریا بستر گول کر کے جا چکیاں نیں۔ ہن ایس علاقے وچ کجھ اک تنظیماں ای کم کر رہیاں نیں ایہناں وچ ہیلپنگ ہینڈ دا ناں سب توں اُتے آندا اے۔ میر قافلہ دے نال کجھ ای دیر بعد اسیں ہیلپنگ ہینڈ دے زیر سایہ چلن والے بحالی معذور بندیاں دے مرکز اپڑ گئے۔ اوتھے اپڑے تے مختلف حصیاں دا دورہ کیتا تے پتہ چلیا کہ ہیلپنگ ہینڈ پچھلے دو عشریاں توں یتیم بالاں دی کفالت، معذور بندیاں دی جامع بحالی، پین دے صاف پانی دی فراہمی، ایمرجنسی ریلیف، ‘ ان کائنڈ گفٹس پروگرام‘ تعلیمی معاونت‘ اسکلز ڈویلپمنٹ‘ ہیلتھ کیئر پروگرا م دے علاوہ بلاسود ق رضیاں جہے منصوبیاں اُتے کم کر رہی اے۔ ہیلپنگ ہینڈ دے تحت، وزیراعظم پاکستان دی بلاسود قرض سکیم، نوں آزاد کشمیر، بلوچستان تے خیبر پختونخواہ دے چارے ضلعیاں وچ عملی جامہ پہنایا جا رہیا اے۔ ایسوسی ایٹ پروفیسر ،پرنسپل ڈاکٹر کرامت اللہ تے پروفیسر ڈاکٹر بہادر شاہ ڈائریکٹر آپریشن نے دسیا کہ ہیلپنگ ہینڈ نے مانسہرہ تے مظفر آباد وچ 2005 وچ آن والے تباہ کن زلزلے دے بعد معذور بندیاں لئی انج دے ہسپتالاں دی بنیاد رکھی گئی جتھے فزیکل تھراپی دے تحت ادویہ دے استعمال کیتے بغیر فقط ایکسر سائز دی مدد نال فالج، لقوہ، پولیو، گٹھیا، جوڑاں دے درد، عرق النساء، اپریشن دے بعد پٹھیاں دی اکڑاہٹ تے پٹھیاں دی کمزوری وغیرہ دا علاج کیتا جاندا اے۔

آکوپیشنل تھراپی شعبے دے تحت ذہنی و جسمانی بیماریاں ، جویں دماغی کمزوری، گردن کنٹرول نہ ہونا، کھڑے ہون تے چلن وچ دشواری، پٹھیاں دا کھچائو ، نومولود دے نکے یا وڈے سر جہے امراض دا علاج کیتا جاندا اے۔ دسیا گیا کہ ایس ادارے توں ہن تیکر 32 ہزار توں ودھ معذور بندے مستفید ہو چکے نیں۔ نیز آرتھوٹکس دے شعبے دے تحت، کمزور یا معذور بندیاں دی بحالی، ٹیڑھے اعضا دے شکار بندیاں نوں مصنوعی سہاریاں دی مدد نال بغیر کسے سہارے دے چلن دے قابل بنایا جاندا اے۔ ایہہ سمندر پار پاکستانیاں تے امریکہ وچ مقیم ڈونر دی کاوشاں دا نتیجہ اے کہ ہیلپنگ ہینڈ ایس ویلے 9200 یتیم بالاں دی کفالت دے نال نال ست ضلعیاں وچ 1400 معذور بالاں دی جامع بحالی اُتے کم وی کر رہی اے۔ وزیراعظم عمران خان بڑے دبنگ انداز وچ ملک پاکستان دا بیانیہ دنیا دے اگے پیش کر رہے نیں ایہناں دی گل نوں سنیا جا رہیا اے، سراہیا جا رہیا اے تے امید اے کہ جلدی ای پاکستان اقوام عالم وچ اہم کردار حاصل کر لوے گا۔ ایس ویلے ملکی معیشت نوں مضبوط کرن لئی جتھے تاجراں نوں ٹیکس دین دی عادت اختیار کرنی ہوئے گی۔ اوتھے کالم نگاراں، تجزیہ نگاراں تے بلاگرز نوں اپنے قلم تے قول نال ریاست نال محبت دا حق ادا کرن دی کوشش کرنی ہوئے گی۔