صحافت

محمدحنیف ساقی

برصغیر چ پہلا پرچہ پریم لڑی اخبار
جس دی راہیں ہندو بنیا کردا سی پرچار
دوجا شکتی پرچہ سی تے تیجا گرو گھنٹال
کردا سی نگرانی ایہناں اُتے لکشمی لال
ہندواں نے جد چوتھا پرچہ کڈھنا سی پرتاب
ناں اخبار دا پیسہ رکھیا دتا اساں جواب
اس اخبار نوں محبوب عالم ہوراں خوب چلایا
ظفرعلی خاں‘ ویکھ کے ہندو لابی‘ پڑ وچ آیا
زمیندار نے وچ صحافت ایسی دھم مچائی
محمدعلی جوہر ہوراں وی کامریڈ چلائی
ابوکلام وی آ گئے اگے الحلال دے ناں توں
انقلاب مجید سالک نے فیر لیاندا چھاں توں
شورش کشمیری ہوراں اخبار چٹان چلایا
اتوں بانی پاکستان دے ڈان اخبار چھپایا
انگریزاں دی ٹی سی کر کے ہندو کچھاں مارن
کلمہ گوواں دے راہواں وچ کنڈے خوب کھلارن
ظفر علی خاں‘ جوہر‘ سالک قلم دی لڑی لڑائی
سمجھ ایمان صحافت کیتی فرض نے جیل وکھائی
محبوب عالم تے شورش نے انج دے قلم چلائے
محنت نال تریخ دے متھے اُتے ناں لکھوائے
بانی پاکستان دی خاطر کتھوں حرف لیاواں
جس دی نیکی اُتوں اج وی پتر وارن ماواں
شورش‘ جوہر‘ سالک وانگوں کہڑا قلم چلاوے
سچ صحافی لکھے جہڑا سدھا جیلے جاوے
قاسمی صاحب تے منوبھائی نالے حسن نثاراں
مظلوماں لئی سجن نیں تے جابر لئی تلواراں
جے صحافی اج دے ساقی اپنا مُل نہ لاندے
ایس مقدس پیشے توں وی لوکی صدقے جاندے