غزل
جاوید عارف
ظالم منیا ساتھوں نکو نک جاندا اے
پھیر وی جاندا جاندا پھٹے چک جاندا اے
ایسے لئی تے وصل دا دعویٰ چک لیا اے
چوتھے پنجویں لنگھدا لنگھدا تک جاندا اے
سوہنا کوئی اج تائیں نہیں پھاہے لگا
جس دی خاطر عاشق موہرا پھک جاندا اے
جد وی اوہدی محفل کوئی چھڈ جاوے تے
سدھا ساواں ساڈے اُتے شک جاندا اے
کئی ہنیر تے جھکھڑ آن دوالے ہوندے
الفت دا پھل جد باغاں وچ پک جاندا اے
پہلاں ای نہیں کوئی پچھدا شہر چ اوہدے
جد ملدا اے ہور وی فقرے دھک جاندا اے
تیرے گھر نوں جاون لگیاں بھجیا جاواں
اپنے گھر نوں آئوندیاں پنڈا تھک جاندا اے
کد تک عارف سر نوں نیواں کیتی رکھیے
آخر ترلے کر کر بندہ اَک جاندا اے
