سلام مترو!

جاوید پنچھی

ہتھ بنھ کہندا اے غلام مترو!
میرے ولوں سب نوں سلام مترو!
اللہ سوہنے اِنج نیں وکھائیاں فنکاریاں
خلقیا سُو بندے نوں بے دام مترو
میرے ولوں سب نوں سلام مترو!
نبی پاک ﷺ ایسراں محبتاں نیں ونڈیاں
چھڈیا نہ کوئی خاص و عام مترو!
میرے ولوں سب نوں سلام مترو!
اِنج تقدیر نوں قبولیا نواسیاںؑ
پیتے نیں شہادتاں دے جام مترو!
میرے ولوں سب نوں سلام مترو!
اللہ سوہنا ساڈیاں دعاواں سُن لوے گا
ملے گا پنجابی نوں دوام مترو!
میرے ولوں سب نوں سلام مترو!
صوفیاں دی بولی ہُن لاگو ہونی چاہیدی
باقی ہوئیاں سبھے گلاں خام مترو!
میرے ولوں سب نوں سلام مترو!
لگ جائے سکولاں وچ صوفیاں دی بولی ایہ
ایہو ساڈے بالاں دا انعام مترو!
میرے ولوں سب نوں سلام مترو!
اپنے رجھیویاں چوں رتی ویلھ کڈھ کے
کرو ماں بولی دے وی نام مترو!
میرے ولوں سب نوں سلام مترو!
پیار نال مِٹھا ہو کے دلاں نوں اوہ جِت لئے
شُبھ شُبھ کرے جو کلام مترو!
میرے ولوں سب نوں سلام مترو!
پال ہون ، بٹ ہون، بھاویں ہون گھمن اوہ
سبھے نیں پنجابی دے امام مترو!
میرے ولوں سب نوں سلام مترو!
کھاریوں اے کھاروی نوں عشق جہیا لگیا
گھڑی پل کرے نہ آرام مترو!
میرے ولوں سب نوں سلام مترو!
کیتیاں بخاریاں سی جدوں تنویریاں
چاڑھیا پنجابی نوں سی بام مترو
میرے ولوں سب نوں سلام مترو!
کھوکھراں دا بال ہاں عباسیاں دا پوترا
میریاں وڈیریاں چوں سام مترو!
میرے ولوں سب نوں سلام مترو!
فجراں توں ہُن تیک پھُل کوئی لگّا نہیں
وَل سُک چلی ہوئی شام مترو!
میرے ولوں سب نوں سلام مترو!
گدِھاں وانگ پنچھی نوں نوچدے پئے گھیر کے
چاراں پاسے بیٹھے نیں آلام مترو!
میرے ولوں سب نوں سلام مترو!