پنجاب وچ تحریک انصاف دا اقتدار

اشرف شریف

مینوں اک ڈر اے ڈر دی بنیاد وچ ماضی بیٹھا اے۔ جدوں اک معصوم صورت تے سادہ مزاج کاروباری نوازشریف نوں پہلے چیئرمین سپورٹس بورڈ فیر صوبائی وزیر خزانہ تے بعد وچ وزیراعلیٰ تے وزیراعظم بنان دا فیصلہ کیتا گیا۔ نوازشریف نے کاروبار تے اقتدار نوں اک رکھیا۔ عثمان بزدار وی معصوم وکھائی دیندے نیں پہلے تحصیل ناظم رہے‘ لمی چھال ماری‘ وزیراعلیٰ منتخب ہو گئے۔ کجھ مہینے ہوئے کسے نے پچھیا‘ سئیں پنجاب دے اصل حکمران گورنر چوہدری سرورنیں‘ سپیکر چوہدری پرویزالٰہی نیں یاں ہر ہفتے لہور دا دورہ کرکے ہدایتاں جاری کرن والے عمران نیں؟ وزیراعلیٰ بزدار نے اک لمحے لئی سوال کرن والے نوں ویکھیا تے کہیا: فائلاں تے دستخط کہدے چلدے نیں؟ ممکن اے جنوبی پنجاب سردار عثمان بزدار دی کارکردگی توں مطمئن ہووے لہور نوں اطمینان نہیں۔ عثمان بزدار نیک نیت ہو سکدے نیں پر اوہ میٹروپولیٹن شہر دے مسئلیاں دا علم نہیں رکھدے۔ بیوروکریسی بڑی محتاط اے ایس لئی کوئی وزیراعلیٰ نوں مسئلیاں دا حل دسن دی کوشش نہیں کردا۔ فیر پورے صوبے وچ کوئی انتظامی افسر ٹک کے نہیں بہہ سکیا۔ تن ورھیاں دوران ہزاراں تبادلے ہو چکے نیں۔ کہیا جا رہیا اے کہ کئی بندے تے گروہ ایہناں تبادلیاں دا کاروبار کر رہے نیں۔ اجیہاں شکایتاں دی وزیراعلیٰ نے ہن تک تحقیقات نہیں کروائی۔
گورننس دا اک ای ماڈل اے کہ جتھے شکایت ہووے اوتھے افسر بدل دتے جان۔ کدی ایہ نہیں سوچیا گیا کہ ایہ تبدیل ہون والے جس نویں تھاں تعینات ہون گے اوتھے وی انج دی ای کارکردگی وکھان گے۔ لہور آبادی دے لحاظ نال پورے پنجاب دا اٹھواں حصہ اے پر بقول حضرت مجدد الف ثانی لہور قطب الارشاد اے۔ جہڑی گل لہور وچ رواج پاوے گی اوہ پورے برصغیر وچ پذیرائی حاصل کرے گی۔ ایس شہر دے ماڑے طبقیاں نے اج تک تبدیلی دا چہرہ نہیں ویکھیا۔ پر ہاں کسے ویلے عمران خان غریب بستیاں وچ تنظیم سازی لئی جاندے سن یاں فیر کجھ مقامی رہنما جہڑے ہن پتہ نہیں کتھے نیں۔ ہن مقامی تنظیم نہیں کجھ شخصیات نیں جو تحریک انصاف کہلاندی اے۔ حالیہ کنٹونمنٹ بورڈ انتخابات وچ ایہو شخصیات آپس وچ مقابلیاں تے سن ایس لئی تحریک انصاف ہار گئی۔ عثمان بزدار جے شہر دی سیاست تے ماحول نوں سمجھدے‘ لہور نوں اون کردے تے انج نہ ہوندا۔ اوہ لہور وچ حکومت ضرور کر رہے نیں پر لہور نوں اپنا نہیں سکے۔ لہور دیاں کجھ مصروف سڑکاں تے بازاراں نوں رات دے پچھلے پہر پانی نال دھو دتا جاندا سی کئی واری برق رفتاری نال ایہ کم ہوندے ویکھیا۔ سڑکاں تے مشینی جھاڑو والیاں گڈیاں سن کوڑا چکن والے ٹرک چنگی طرح بند ہوندے۔ ویسٹ کمپنی دا سپروائزر مقامی سیاسی نمائندیاں دے نال نگرانی کردا کہ ویسٹ کمپنی کدھرے کوڑا چھڈ تے نہیں گئی۔ ہن پرانے زمانے پرت آئے نیں۔ صفائی کرن والی مشینری ڈمپ اے۔ خاکروب کش ہتھاں وچ لماں لماں جھاڑو لے کے سڑکاں دے کنڈھیاں تے دھوڑ اڑاندے نیں۔ پلاسٹک بیگ تے کچرا سڑک کنڈھے جمع کر دیندے نیں یاں فیر قریبی نالے وچ سٹ دیندے نیں۔ جتھوں دی صفائی واسا دی ذمہ اے۔ واسا والے ورھے وچ اک دو واری صفائی کردے نیں ایس لئی کچرا اوتھے ای پیا رہندا اے۔ یقینا لہور وچ کوڑا کرکٹ کراچی ورگا نہیں پر جناں ہن نظر آ رہیا اے اوناں کدی نہیں ویکھیا۔ کیہ تحریک انصاف دے کول کوئی اک مقامی کارکن نہیں جہنوں شہر دی میئرشپ لئی تیار کرنا مقصود ہووے۔
کمزوری دشمناں نوں حملے تے دوستاں نوں مداخلت دا موقع دیندی اے۔ تحریک انصاف نے اپنے آپ نوں حالات دے رحم وکرم تے چھڈ دتا اے۔ منظم سیاسی جماعت دے طور تے اوہ فعال نہیں ہو سکی۔ پتہ نہیں برادرم سیف اللہ نیازی ایس معاملے وچ کس حد تک بااختیار نیں کہ جماعت دے عہدیداراں نوں تھنک ٹینک بنا سکن۔ اک ورھا رہ گیا اے ایہدے وچ ووٹراں تک کنی رسائی حاصل کر لین گے؟ بچپن وچ کوٹ لکھپت دا سارا علاقہ مزدور حقوق لئی کم کرن والیاں دا مرکز ویکھیا۔ اک پاسے پیکو فیکٹری سی جتھے گھٹو گھٹ پندراں ہزار لوک کم کردے ریلوے لائن دے مشرقی پاسے اتفاق فائونڈری سی چھ ست ہزار مزدور اوتھے وی ہون گے۔ قینچی سٹاپ دے نیڑے پیکجز سی جتھے تریہہ ہزار کارکن سن۔ فیر چھوٹے کارخانیاں وچ ٹریڈ یونین سی۔ یوم مئی نوں میلہ لگ جاندا۔ کسے کارخانے وچ یونین الیکشن ہوندے تے مزدور رات دن اک کر دیندے۔ جدوں یونین دے لوک اپنے ای کسے لیڈر دے بار بار صدر بنن تے اعتراض کردے تے صدر صاحب اگلی واری کسے کمزور ساتھی نوں صدارت دا امیدوار بنا دیندے۔ خیال رکھدے کہ ایہ جت نہ سکے۔ جدوں الیکشن وچ شکست ہوندی تے تبدیلی دا مطالبہ کرن والے اوسے ہوشیار رہنما اگے گزارش کردے کہ اگلی واری تسیں ای امیدوار او۔ ڈر ایہو اے قطب الارشاد دے لوک اختیار وچ نظر انداز ہو رہے نیں۔ لہور دے لوکاں نوں کسے ادارے دے بورڈ کسے انتظامی کمیٹی کسے علمی و ادبی ادارے دی سربراہی کسے منافع بخش سیاسی عہدے تے تعینات نہیں کیتاجا رہیا۔ ایہ احساس تقویت پھڑ رہیا اے کہ تحریک انصاف تے کدھرے نہیں بس بیرون لہور توں لوک لیا کے ایس شہر دے معاملیاں دے نگران بنائے جا رہے نیں۔ ڈر دی بنیاد ایہو اے کہ لہور نوں ناآسودہ رکھ کے کسے تجربہ کار دی تھاں محفوظ رکھی گئی اے۔ باقی ایہ گل حیران کن نہیں کہ اسیں جہناں نوں معصوم تے بھولے بھالے سمجھنے آں اوہ کل کلاں ملک دے وزیراعظم بن کے فائلاں تے دستخط کر رہے ہون۔ اقتدار اختیار دا ناں اے جہدے کول اختیار اوہدا ای اقتدار اے۔٭٭