غزل
بابا نجمی
بوکا لج نہ بھاونی ربا کریئے کیہ
اگ وی اساں بجھاونی ربا کریئے کیہ
ڈنڈے نال قصیدہ پئے لکھواندے نیں
پے گئی ریت پکاونی ربا کریئے کیہ
ڈھگیاں نالوں بہتی کر کے کار مڑاں
دانے ہاڑی ساونی ربا کریئے کیہ
جد دے جمے ویڑھے وچوں دکھاں دی
مکی نہیوں چھاونی ربا کریئے کیہ
پڑھ پڑھ اوبڑ عمر گزاری اج اساں
کہندے ہیر سناونی ربا کریئے کیہ
تپدا سورج ٹھنڈا کر کے مڑیا واں
فر وی روٹی پاونی ربا کریئے کیہ
بھگیاڑاں دی جوہ دے ولّے چلے کیوں
ہرنی اک بچاونی ربا کریئے کیہ
