آ جا توں بابا دے در اُتے آ جا
عبدالحمید نظامی
آجا توں بابا دے در اُتے آجا
آجا توں آکے تے دُکھڑے سُنا جا
گنج شکرؒ میرے سُن دے نے سب دی
باوا دی مرضی ای مرضی اے رب دی
ادب نال قدماں چ سر نوں جھکا جا
آجا توں بابا دے در اُتے آجا
انساناں جناں نوں دتی خلافت
شریراں کبیراں نوں دسی شرافت
تے بائی سو قطباں دا بابا ہے راجا
آجا توں بابا دے در اُتے آجا
ادب نال چوکھٹ تے سر نوں جھکا کے
گل وچ پٹہ اوہدی نسبت دا پاکے
غلاماں دے وچ اپنا ناواں لکھا جا
آجا توں بابا دے در اُتے آجا
بابا جے منیاں تے من جاسی اللہ
بہہ جا توں در تے وچھا کے مصلیٰ
عمر بابا جی دے توں در تے لنگھا جا
آجا توں بابا دے در اُتے آجا
قُرب تینوں اللہ محمد دا مل جائو
دل تیرا عشق حقیقی چ کِھل جائو
وانگ نظامیؔ دے خود نوں مٹا جا
آجا توں بابا دے در اُتے آجا
