’’ سوچ سویر‘‘ جمشید کمبوہ دی ’’سویر کردی‘‘ شاعری
ایہہ کتاب حمد ، نعت ، منقبت ،توشیحی،رباعیاں ، غزلاں،نظماں ، دوہڑیاں ، ماہیاں تے نیلی بار دی رہتل بہتل دا اک خوب صورت گلدستہ اے
لکھت: محمد جہانگیر وٹو
جودھ بناں نہیں منزل ملدی
بھاویں ڈاہیے روز مصلے!
گل ہووے پنجابی/ اردو ادب تے پاکپتن دی دھرتی دی تے اوہ اک ناں تو بناں مکمل نہیں ہو سکدی کیوں جے پاکپتن دی ادبی تاریخ دے اوہ اک ایسے شاعر نیں جیہڑے اردو ، انگریزی،فارسی تے پنجابی ادبیات اتے ڈوہنگی نظرتے عروض دے نال نال چھند ماترک تے وی عبور رکھدے نیں۔اپنیاں ون سونیاں ’’ سوہنیاں تے من موہنیاں لکھتاں راہیں ‘‘ اک لمے سمے توں شہر فرید دے ادب دی ہریالی واسطے اپنے جگر دا لہو دیندے لغے آ رہے نیں تے نویں نسل دی ذہنی ،فکری تے ادبی تربیت وی بڑی محنت نال پئے کردے نیں۔’’سوچ سویر‘‘ دا ناں ای مونہوں بول کے پیا دسدا اے کہ جمشید کمبوہ ہوریں جبری سماج دی دھوں کالی رات وچ ذہنی تے فکری سویر دے پرچارک نیں۔ایہہ جہی مہان شخصیت بارے لکھن توں پہلاں سوچ وچ پیا رہیا کہ کہڑے اکھر کڈھ کے لیاواں جہڑے اونہاں دی خوب صورت شخصیت نوں اجاگر کرن۔ جی ہاں اوہ خوبصورت شخصیت استاداں دے استاد شہر فرید دا مان جناب جمشید کمبوہ صاحب نیں جنہاں دی کتاب ’’سوچ سویر‘‘ نے مینوں سوچ وچ پا دتا کہ میں وی کجھ لکھ سکاں۔’’سوچ سویر ‘‘نوں تسی جناں پڑھدے جاؤگے دنیا دی بے رخی ،سماجی ناہمواری ،نا انصافی ، جل فریب ، بیدلی ، بے مروتی ، ظلم تے جبر دے اونے ای پرت کھلدے جان گے۔ جمشید کمبوہ صاحب اج دے سجناں بارے لکھدے نیں:
کجھ وی لگدے نہیںجمشید،جے وکھ ہوون
میرے کول جے ہوون ، میرے ہندے نیں!
ایویں سجناں سانوں نکرے لا چھڈیا
جیویں کوئی کھیس پرانے ہندے نے
اوکڑ وچ جمشید نوں کدھرے سد ماریں
ایہ دسے گا کیہ یارانے ہندے نیں!
جمشید کمبوہ صاحب دی حیاتی اک ویہندے دریا وانگوں اے جیڑا بنجر زمیناں نوں سیراب کردا اے پر اپنی پیاس نوں ظاہر نہیں کردا ، اوس درویش وانگوں اے جہڑا دوسریاں واسطے اپنی ساری حیاتی گزار دیندا اے ، اوس چراغ دے واہنگوں اے جہڑا دوسریاں دے ہنیریاں نوں مکاون لئی اپنے وجود نوں ساڑدا اے پر جگ نوں روشن کر دیندا اے۔
کیہڑا کہندا مر جاواں گے؟
جے ڈباں گے تر جاواں گے
مر دے مر دے وی جمشید
دھرتی جنت کر جاواں گے
’’ سوچ سویر‘‘ حمد ، نعت ، منقبت ،توشیحی،رباعیاں ، غزلاں،نظماں ، دوہڑیاں ، ماہیاں تے نیلی بار دی رہتل بہتل دا اک خوب صورت گلدستہ اے۔’’سوچ سویر ‘‘ پڑھ کے بندہ سوچاں وچ پے جاندا اے کہ ایہناں نرول پنجابی اکھراں دے موتیاں نوں پرون والے بندے نے کیہ کیہ کجھ جریا اے تے دنیاں دیاں حقیقتاں نوں کیڈے سچجے انداز وچ ساہمنے لیاندااے!!!
سچی گل اے کہ ’’ سوچ سویر ‘‘ نے ذہن وچ ای نہیں دل وچ وی سویر کر دتی اے۔ بابافرید بک فاؤنڈیشن خاص طور تے مبارک باد دی مستحق اے جنھے شہر فرید دے اک مان جوگ سپتر تے نمائندہ شاعر دی کتاب چھاپ کے پاک پتن تے پنجاب دے واسیاں تے سر کڈھواں احسان کیتا اے۔ کہ ہن ہر گھر وچ ’’سوچ سویر‘‘ ہونی چاہی دی اے!
