اقتصادی رابطہ کمیٹی دا اجلاس، گیس دی قیمتاں وچ وادھے دی سمری موخر
اسلام آباد: اقتصادی رابطہ کمیٹی نے گیس دے ریٹ وچ وادھے دی سمری تے غور موخر کر دتا اے پر سوئی سدرن گیس کمپنی لئی پاکستان سٹیل ملز دے واجبات دی مد وچ 35کروڑ روپے گیس دے بل دی منظوری دے دتی گئی۔ مشیر خزانہ ڈاکٹر عبدالحفیظ شیخ دی زیر صدارت اقتصادی رابطہ کمیٹی دا اجلاس ہویا جہدے وچ وزارت خزانہ نوں 8کروڑ روپے دی سپلیمنٹری گرانٹ دی منظوری دے دتی گئی۔ ای گورننس منصوبے لئی 10کروڑ روپے جاری کرن دی منظوری دتی گئی۔
اجلاس وچ وزارت خزانہ دی تجویز تے پاکستان مور گیج ریفائنانس کمپنی لمیٹڈ لئی عالمی بینک توں حاصل کیتی 14کروڑ ڈالر قرضہ دی اک کروڑ ڈالر رقم دی تجی قسط لئی رسک شیئرنگ سہولت دے نفاذ لئی ٹرسٹ فنڈ دے قیام دی منظوری دتی گئی۔ ای سی سی نے وزارت خزانہ دی تجویز تے سٹیٹ بینک آف پاکستان نوں ہاؤس بلڈنگ فنانس کمپنی لمیٹڈ (ایچ بی ایف سی ایل) وچ اپنے شیئرز فروخت کرن دی اجازت دے دتی۔
اقتصادی رابطہ کمیٹی نے وزارت انفارمیشن ٹیکنالوجی اینڈ ٹیلی مواصلات دی تجویز تے ای گورنمنٹ پروگرام دے نفاذ لئی درکار انفارمیشن کمیونی کیشن ٹیکنالوجی انفراسٹرکچر دی مرکزی طور تے خریداری لئی 10کروڑ روپے ٹیکنیکل سپلیمنٹری گرانٹ دی منظوری وی دتی۔
ای سی سی نے وزارت صنعت و پیداوار دی تجویز تے پاکستان سٹیل ملز دے ذمہ سوئی سدرن گیس کمپنی دے واجب الادا گیس بلاں دی ادائیگی دی مد وچ 35کروڑ روپے دے اجرا دی منظوری دتی، متعلقہ رقم مالی سال 2019-20وچ پاکستان سٹیل ملز لئی مختص شدہ بجٹ توں کیتی جاوے گی۔
