غزل
طفیل عامر
نہ سوال دا حق نہ جواب دا اے
پینڈا اوکھڑا ادب آداب دا اے
کون پچھدا گئیاں ،ڈھینڈیاں نوں
ایتھے جہڑا وی اے کامیاب دا اے
پنڈ ساڈے کپت کل رج ہویا
دکھ ہور بہانہ پانی ڈھاب دا اے
آپے جا خرید کے پی لینی
دسو کہڑا قصور شراب دا اے
جو وی دل آکھے اوہو کر لیندے
ذرا ڈر نہ خوف غذاب دا اے
اکھا ں چار چفیرے تک پتھرائیاں
لگے ماریا اے وی کسے خواب دا اے
جہڑا انا جماندروں او کیہ جانے
اے دھتورے دا پھل یا گلاب دا اے
سو ہنی کر ے سوال تے دیوے کو ن جواب
ایتھے کہڑا وکیل چناب دا اے
توں گنیں نہ گھئیں ایں ویں جاویں بھجا
کم چنگا ہر اک حساب دا اے
سانوں ڈر وے عامر ؔ تیرا ہووے نہ اوہ
حال ہندا اخیر جو بے تاب دا اے
