کیہ اسیں احسان فراموش قوم آں؟

لکھت:مطلوب وڑائچ

ممتاز ایٹمی سائنس دان ڈاکٹر عبدالقدیر خان 85 ورھے دی عمر وچ انتقال کر گئے۔ اوہ کافی عرصے توں بیمار سن۔ ڈاکٹر عبدالقدیر خان وچ 26اگست نوں کرونا وائرس دی تشخیص ہوئی سی۔ بعد وچ ڈاکٹر عبدالقدیر خان نوں ماڑی حالت پاروں کہوٹہ ریسرچ لیبارٹری ہسپتال دے کوویڈ وارڈ وچ داخل کر دتا گیا اوہناں دے انتقال دی تصدیق وزیر داخلہ شیخ رشید احمد نے کیتی اے۔ پاکستان نوں ایٹمی قوت بنان تے اوہدا دفاع ناقابل تسخیر بنان وچ ڈاکٹر عبدالقدیر خان دا بڑا اہم کردار سی۔ مئی 1998ء وچ پاکستان نے بھارتی ایٹم بمب دے تجزبے دے بعد کامیاب تجربہ کیتا۔ بلوچستان دے شہر چاغی دے پہاڑاں وچ ہون والے ایس تجربے دی نگرانی ڈاکٹر قدیر خان نے ای کیتی سی۔ اوہناں نے ڈیڑھ سو توں ودھ سائنسی تحقیقاتی مضمون وی لکھے نیں۔ میں کدی کدی سوچنا واں کہ کیہ اسیں پاکستانی احسان فراموش قوم آں؟ ایس سوچ دے پچھے اک تاریخی پس منظر اے۔
قائداعظم محمدعلی جناح توں شروع کر لیے‘ اوہناں دے نال زندگی دے آخری دیہاڑیاں وچ کیہ ہویا۔ قوم دا باپ زیارت توں کراچی کس ماڑی حالت وچ اپڑیا۔ لیاقت علی خان نے قائداعظم وانگوں سب کجھ پاکستان تے قربان کر دتا اوہناں نوں جلسہ عام دوران قتل کر دتا گیا جہدی اج وی وجہ دا کسے نوں پتہ نہیں۔ ذوالفقارعلی بھٹو شہید دے کارنامیاں دی اک لمی فہرست اے جہدے وچ پاکستان دے ایٹمی پروگرام دی بنیاد رکھنا وی شامل اے۔ بھٹو صاحب نوں پھاہے لا دتا گیا۔ بینظیر بھٹو نے پاکستان دے میزائل پروگرام نوں اگے ودھایا‘ اوہناں نوں وی قتل کر دتا گیا۔ ڈاکٹر عبدالقدیر خان نے پاکستان نوں ایٹمی بمب بنا کے دتا جہدے نال پاکستان دیاں سرحداں ہمیشہ لئی دشمن توں محفوظ ہو گئیاں۔ پاکستان دا دفاع ناقابل تسخیر ہو گیا۔ ڈاکٹر عبدالقدیر خان دی بڑی پذیرائی ہوئی اوہناں دی خدمات دے اعزاز وچ اوہناں نوں تن واری صدارتی ایوارڈ نال نوازیا گیا۔ مرد صحافت جناب مجید نظامی نے ڈاکٹر قدیر خان دی ایہناں ناقابل فراموش خدامات پاروں محسن پاکستان داخطاب دتا۔ جہدی پذیرائی پوری قوم نے کیتی تے حکومت وقت نوں وی سرکاری طور تے ڈاکٹر عبدالقدیر خان نوں محسن پاکستان دا خطاب دینا پیا۔ ڈاکٹر خان نوں قوم دا ہر بندہ دل و جان نال محسن پاکستان سمجھدا اے جہدے مظاہر اوہناں دی وفات تے جنازے دوران دیکھن وچ آئے۔ ڈاکٹر خان شروع توں ای قوم دی اکھ دا تارا سن پر درمیان وچ کجھ سازشاں ہوئیاں۔ کجھ قوتاں نوں اوہناں نال خار سی تے اپنے ایسے ڈر تے خوف پاروں کہ کدھرے ڈاکٹر صاحب دی قومی تے بین الاقوامی مقبولیت اوس نکتہ عروج نوں نہ چھو لوے کہ کدھرے اوہ ملک دے خاص ادارے لئی سوحان روح بن جان تے اوہناں نے رَل کے ڈاکٹر صاحب نوں مجرم بنا دتا۔ ایٹمی ٹیکنالوجی ویچن دا الزام اوہناں تے مڑھ ک کے اوہناں نوں راندہ درگاہ بنا دتا۔ اوہناں تے لگن والے ہر الزام نوں ٹھیک من لیا جاوے تے وی اوہناں دی خدمات دے سامنے اوہ سب ہیچ اے جو اوہناں نے نیوکلیئر دی صورت وچ قوم نوں دتا۔

کنے دکھ دی گل اے کہ جو بندہ قوم دی تقدیر نوں محفوظ بناوے اوسے محسن نوں تسیں ٹیلی ویژن تے لیا کے مافیا منگواندے پھرو۔ میری ڈاکٹر عبدالقدیر خان نال تن خصوصی ملاقاتاں ہوئیاں۔ میرے خیال وچ اوہناں دی بیماری دا کارن اوہناں دا دل ٹٹنا سی جو ایس قوم دے رہنماواں نے اپنے محسن دی تضحیک تے تذلیل کر کے توڑیا سی۔ 2004ء وچ اوہناں نوں نظربند کر دتا گیا تے اوہ زندگی دی آخری ساہ تک نظربند ای سن۔ آخری دیہاڑیاں وچ اوہ کرونا دا شکار ہو گئے۔ حکمران طبقے نے اوہناں نال بے اعتنائی ورتی جہدے تے اوہ شکوہ کناں رہے‘ اوہناں دے انتقال تے پوری حکومتی مشینری اوہناں دے گن گاندی نظر آئی۔ اوہناں دی سرکاری اعزاز دے نال تدفین کیتی گئی پر ایہ سب بعد از مرگ واویلا سی۔ کرونا پاروں اوہ ہسپتال داخل سن کسے حکومتی ذمہ دار نے اوہناں دی خیریت تک نہیں پچھی۔ اوہناں دیہاڑیاں کامیڈین عمرشریف دی صحت زیادہ ای وگڑ گئی تے سندھ تے مرکزی حکومت دے وزراء اوہناں دے علاج لئی کسے وی حد تک جان لئی سرگرم سن۔ اوہناں نال ملاقاتاں ہو رہیاں سن‘ فوری طور تے ایئرایمبولینس دے راہیں امریکہ گھلن دا انتظام کیتا گیا۔ اوہناں دے خاندان دے وی راتوں رات ویزے لگ گئے۔ سندھ حکومت نے ساڑھے چار کروڑ روپیے جاری کر دتے۔ ایہ واقعی اک فنکار دے شایان شان اقدامات سن۔ دوجے پاسے اوہ بندہ جو انج دے لکھ فنکاراں دا اک فنکار سی۔ ڈاکٹر عبدالقدیر خان اوہ لاوارثاں وانگوں ہسپتال پیا ریہا۔ اوہدی اک ای خواہش سی کہ اوہنوں آزاد کر دتا جاوے پر اجیہا اوہناں دی حیاتی وچ نہ ہو سکیا پر اوہ نظربندی توں موت دی جھولی وچ جا کے نجات پا گیا۔ میں شروع وچ ایہ سوال کیتا سی کہ کیہ اسیں واقعی احسان فراموش قوم آں؟ انج بالکل وی نہیں قوم ڈاکٹر صاحب دی ممنون اے پر جہڑے کجھ ہتھاں وچ اقتدار سمٹ جاندا اے اوہ احسان فراموش ضرور نیں۔ ڈاکٹر عبدالقدیر خان نے بائی کروڑ پاکستانیاں نو ںجین دا ڈھنگ سکھایا پر بدلے وچ اوہناں دی تضحیک کیتی گئی تے اسیر بنا کے رکھیا گیا۔ ہن فیصلہ اساں آپ کرنا اے کہ اوہناں دی اسیری تے قوم چپ کیوں رہی؟۔٭٭