’’ڈی پی او ٹوبہ ٹیک سنگھ یا وائسرائے دی تبدیلی تے پروٹوکول کلچر‘‘

ڈی پی او موصوف نے اپنی تبدیلی دے بعد ضلع بھر دے پولیس افسران نوں حکم صادر کردے ہوئے
ایہناں دیاں ڈیوٹیاں لائیاں کہ ایہناں نوں الوداع کرن لئی پروٹوکول لئی گڈیاں تے عوام دا بندوست کیتا جائے

اکرم عامر

پروٹوکول کلچر اک انج دی لت اے جس دے نشہ دا ہر سرمایہ دار، جاگیردار، وڈیرہ، سیاستدان بیورو کریٹ حتیٰ کہ ہر اوہ بندا جیہڑا معاشرے وچ معمولی حیثیت رکھدا اے دا شکار نیں، ماضی دی حکومتاں وانگوں کپتان وی برسر اقتدار آن توں پہلے دعویٰ کیتا کردے سن کہ اوہ برسر اقتدار آ کے ملک نال پروٹوکول کلچر دا خاتمہ کراں گے، پر انج نہ ہو سکیا؟ کپتان سنے ملک دا ہر سیاستدان خواہ ایس دا تعلق اپوزشن یا حکومت نال اے، بیورو کریٹ، سرمایہ دار، جاگیردار، ہر کوئی اپنی بساط دے مطابق پروٹوکول استعمال کر رہیا اے، سرکاری مشینری دے پروٹوکول اُتے سالانہ کروڑاں نہین ارباں روپئے خرچ ہو رہے نیں، ایسے طرح دی اک مثال پچھلے دناں ڈی پی او ٹوبہ ٹیک سنگھ رانا عمر فاروق دے تبادلے اُتے ویکھن وچ آئی۔ انج محسوس ہو رہیا سی کہ برصغیر وچ انگریز دا راج تے ختم ہو چکیا اے پر ایس دے خیالات دی باقیات ہن وی معاشرے وچ موجود نیں۔ انگریز راج دے خاتمے نوں کئی صدیاں لنگھ چکیاں نیں تے پاکستان نوں آزاد ہوئے وی 74 سال دے لگ بھگ ہون نوں نیں پر ایس دے باوجود ملک دی بیورو کریسی وچ انگریز دور دے اثرات ہن وی باقی نیں، ڈی پی او رانا عمر فاروق نے ٹوبہ ٹیک سنگھ وچ ڈی پی او شپ دے دوران اک عمر رسیدہ خاتون دے پیراں وچ بہہ کے ایس دا مسئلہ سنیا تے ایہناں دے ماتحتاں نے ایس دی ویڈیو بنا کے سوشل میڈیا اُتے وائرل کیتی جس اُتے ڈی پی او موصوف نوں محکمہ پولیس دے علاوہ عوام وچ وی شہرت ملی۔ موصوف دا تبادلہ ہن ٹوبہ ٹیک سنگھ توں بطور وزیراعلیٰ دے سٹاف آفیسر کیتا گیا اے تے ایہناں نوں مصنوعی شاہی پروٹوکول دے ذریعے رخصت کیتا گیا، ڈی پی او موصوف نال ٹوبہ ٹیک سنگھ دے عوام دی محبت کنہی سی ایہہ گل وکھری اے پر جس طرح ایہناں نوں الوداع کیتا گیا ایہہ وی اک عجب کہانی اے۔ انج لگ رہیا سی کہ ڈی پی او دی تبدیلی نہیں بلکہ کسے وائسرائے نوں تبدیل کیتا گیا اے جس نے عوام لئی بے پناہ خدمات سرانجام دتیاں ہون تے ایہناں دے جان اُتے عوام ایہناں نال بے پناہ محبت دا اظہار کر رہے ہون۔ ذرائع کہندے نیں کہ ڈی پی او موصوف نے اپنی تبدیلی دے بعد ضلع بھر دے پولیس افسران نوں حکم صادر کردے ہوئے ایہناں دیاں ڈیوٹیاں لائیاں کہ ایہناں نوں الوداع کرن لئی پروٹوکول لئی گڈیاں تے عوام دا بندوست کیتا جائے پولیس افسران نے ’’مرتے کیا نہ کرتے‘‘ دے مصداق اپنے آقا دا حکم بجا لیاندے ہوئے ایہناں دی خواہش توں وی ودھ کے پروٹوکول دے انتظامات کیتے تے گھوڑیاں والی بگھی دا بندوبست کر کے شہر بھر دے پھُل فروشاں توں پھُل حاصل کیتے گئے تے شہر دا چکر لان دے دوران ڈی پی او موصوف دی بگھی اُتے پھُلاں دیاں پتیاں نچھاور کیتیاں گئیاں ایہناں سارے مناظر نوں حکام بالا تیکر اپڑان لئی خوش آمدی میڈیا دی خدمات حاصل کیتی گئی تے ایس طرح دی منظر کشی کیتی گئی کہ جس طرح اج تیکر ٹوبہ ٹیک سنگھ وچ رانا عمر فاروق جہیا کوئی ایماندار تے قابل افسر نہیں آ سکیا؟ تے ایہہ وی تاثر دتا گیا کہ موصوف وچ جنہیاں خوبیاں سن اوہ کسے ہور ڈی پی او وچ نہیں۔ ڈی پی او آفس توں جاندے ویلے دفتر توں لے کے پولیس لائن تیکر بگھی اُتے بٹھا کے رستے وچ تھاں تھاں پھُل سٹے گئے۔ایس عمل وچ سرکاری پولیس افسران پیش پیش سن تے ظاہر کیتا جا رہیا سی کہ ڈی پی او موصوف نال ایہہ اظہار محبت عوام کر رہی اے۔ دوجے دن فیر ڈی پی او موصوف نوں موٹروے دے رستے لہور روانہ ہونا سی تے بگھی نوں پہلے رجا نہ چوک دے نیڑے اپڑایا گیا جتھے ضلع بھر دے پولیس افسران خاص طور تے ایس ایچ اوز تے ایہناں دے ماتحت ملازمین دی بھاری نفری رجانہ چوک وچ ڈی پی او موصوف نوں پروٹوکول دین لئی موجود سی۔ جتھے اک وار فیر پولیس ملازمین نے ایہناں اُتے پھُل سٹے تے ظاہر کیتا گیا کہ ایہہ ٹوبہ ٹیک سنگھ دے عوام دا ڈی پی او نال اظہار محبت اے۔ ڈی پی او موصوف نے ایس موقعے اُتے ٹوبہ ٹیک سنگھ دی عوام دیاں محبتاں دی خصوصیت دا خوب ذکر کیتا انج ویسے تے بوہت چنگا منظر سی جے واقعی ایہہ اظہار محبت عوام ولوں ہوندی؟ پر ایہہ تے صاحب بہادر نوں پروٹوکول دین ئی ٹوبہ ٹیک سنگھ دی پولیس ولوں کیتا گیا انتظام سی جنہوں عوامی ظاہر کر کے صاحب بہادر تے مجاز افسران دی اکھاں وچ مٹی پائی گئی توجہ طلب گل ایہہ وے کہ ڈی پی او موصوف نے ٹوبہ ٹیک سنگھ دی عوام لئی انج دا کیہڑا کارنامہ سرانجام دتا سی کہ اوہ عوام دے دلاں وچ اینا گھر کر گئے۔ ذرائے کہندے نیں کہ موصوف اپنی تعیناتی دے دوران عوام نوں نہ تے کوئی مناسب ریلیف دے سکے تے نہ ای ٹوبہ ٹیک سنگھ توں جرائم دا خاتمہ کیتا جا سکیا۔ موصوف وی ٹوبہ ٹیک سنگھ وچ اپنی تعیناتی دے دوران روایتی افسر والا کردار ادا کردے رہے تبادلے اُتے اینا پروٹوکول پولیس ولوں دتا جانا سمجھ کے بالاتر اے جس اُتے ٹوبہ ٹیک سنگھ دی عوام وی ششدر تے حیران نیں کہ تبدیلی سرکار دے دعویدار کپتان دی حکومت وچ انج دا شاہانہ پروٹوکول اک ڈی پی او نوں دے کے لکھاں روپئے خرچ کیتے گئے کیہ اوہ پولیس افسران نے اپنی جیب توں خرچ کیتے یا سرکاری خزانہ توں ایہہ اک وکھرا سوال اے۔
کپتان جی تسیں تے اقتدار وچ آن توں پہلے نعرہ لایا سی کہ جدوں پی ٹی آئی دی حکومت آئے گی تے ملک توں پروٹوکول کلچر دا خاتمہ کیتا جائے گا پر تن سال توں ودھ عرصہ وچ انج نہ ہو سکیا بلکہ پچھلی حکومتاں دی نسبت موجودہ دور وچ وزراء تے بیورو کریسی دے پروٹوکول وچ وادھا ویکھن وچ آیا جس دی اک مثال حالیہ ٹوبہ ٹیک سنگھ توں تبدیل ہون والے ڈی پی او رانا عمر فاروق نوں دتا جان والا شاہانہ پروٹوکول اے۔ کپتان جی ایس طرح گریڈ 18 دے اک افسر نوں تبادلے اُتے رخصت کرن لئی لکھاں روپئے خرچ کرن نال ملک ریاست مدینہ نہیں بنے گا، ریاست مدینہ بنن دی بجائے مقروض در مقروض ہوئے گا۔ لوڑ ایس امر دی اے کہ ایس معاملے دی تحقیقات کرائی جائے کہ ڈی پی او ٹوبہ دے تبادلے اُتے شاہانہ پروٹوکول اُتے لکھاں روپئے خرچ کرن والے کون سن تے انج کیوں کیتا گیا؟ انج دے پولیس ملازمین دا تعین کر کے ایہناں دے خلاف محکمانہ کاروائی عمل وچ لیائی جائے تے آئندی تبدیل یا تعینات ہون والے افسرا نوں پروٹوکول وچ کمی واقع ہو جائے گی تے ملک ریاست مدینہ بن سکے گا۔ جے ایہو روایت برقرار رہی تے سیاستداناں تے بیورو کریسی دے پروٹوکول اُتے سالانہ کروڑاں روپئے خرچ ہوندے رہے تے فیر کدی وی ملک نہ ترقی کر سکے گا تے نہ ای تہاڈے دعوے دے مطابق ریاست مدینہ بن سکے گا۔