کدے جائیے؟
احمد وقاص ریاض
کئی سو ارب دے قرضے نال بنی کھلی تے آرام دہ لہور عبدالحکیم موٹروے تے سفر کردے ہوئے خانیوال انٹرچینج تے اترے تے شام ڈھل چکی سی ساڈی منزل چوک میتلا دے نیڑے چک 124 سی جتھے اک جنازے وچ اپڑنا سی۔ گھٹے مٹی نال اٹے راہ تے لہلہاندے کھیتاں چوں گزر کے اپنے عزیزاں دی حویلی وچ وڑے تے انھیرا چھا چکیا سی۔ عزیزواقارب توں علاوہ پنڈ تے آل دوالے توں لوکاں دی وڈی گنتی نماز جنازہ وچ شریک ہوئی۔ کرونا ایس او پیز تے عمل کردے ہوئے آخری صف وچ کھڑا ہویا تے بالکل سامنے اک لڑکا کھلوتا سی جہدی پرانی قمیض موڈھیاں توں پاٹی ہوئی سی۔ میریاں نظراں اوس بچے تے جم کے رہ گئیاں جہدی عمر کالج وچ پڑھن دی سی پر اوہدے والدین ایس قابل نہیں سن کہ اوہنوں نویں کپڑے لے کے دے سکن۔ تدفین دے بعد کھانے دا دور شروع ہویا تے معززین بکرے دے گوشت نال پلیٹاں بھر کے حالات حاضرہ تے گل بات کرنا شروع ہو گئے۔ زمین دار کھاد تے بیجاں دی کوالٹی تے قیمتاں دا شکوہ کر رہے سن پر اوہناں دے چہریاں دی لالی تے کھیتاں دی ہریالی توں اندازہ ہو رہیا سی کہ اوہ خوشحال حیاتی گزار رہے نیں۔ اوہناں دی خدمت تے مامور غریب ملازم تے مزارعے گندے مندے کپڑے پائے ہتھاں وچ ڈونگے لئے حسرت بھریاں نگاہواں نال بوٹیاں ول تک رہے سن اوہناں دی اکھاں وچ چھپی بے بسی تے سپاٹ چہرے ویکھ کے اندازہ لانا اوکھا نہیں سی کہ اوہناں نوں تے اوہناں دے گھر والیاں نوں انج دا کھانا شاید مہینیاں بعد نصیب ہویا۔ کھانا ادھورا چھڈ کے باہر نکلیا تے پنڈ دے بچے وڈیاں لگژری گڈیاں نوں حیرت نال ویکھ رہے سن۔ اجہی حیرت میں واشنگٹن دے ایئراینڈ سپیس میوزیم وچ وکھووکھ سکولاں دے بچیاں دے چہریاں تے ویکھی سی جدوں اوہ چن تے اترن والے خلائی جہاز اپالوII نوں ویکھ رہے سن۔
رات گئے جنوبی پنجاب دے سب توں وڈے تے تریخی شہر ملتان اپڑے تے مٹی گھٹے‘ ناقص صفائی‘ بے ہنگم ٹریفک‘ بے ترتیب اوور ہیڈ برج تے بے مقصد میٹرو ویکھ کے دل دکھیا۔ ملتان جہڑا کدی خوبصورت چہریاں تے دلکش لہجے والے صاف دل سرائیکیاں دا شہر سی ہن اوتھے ہجوم تے ہے سی پر رونق نہیں سی۔ نشتر ہسپتال جتھے ساہیوال توں لے کے رحیم یار خان تے بلوچستان توں مریض علاج لئی آئوندے تے شفاف پاندے سن اج اوہدا معیار عدم توجہ‘ فنڈز دی کمی تے دوجے عوامل دی وجہ نال ڈگ چکیا اے۔ ملتان دے آل دوالے نادر امباں دے باغ سن جتھے گرمیاں وچ دھپ دی تپش توں بچن لئی لوک جاندے سن تے بچے کھیڈدے سن پچھلے کجھ ورھیاں وچ ایہناں پیڑاں نوں بے دردی نال کٹ دتا گیا اے تاں جے ہائوسنگ سکیماں لئی زمین پدھری کیتی جا سکے۔
سائوتھ پنجاب دے سیاستداناں تے وڈیریاں نے مظلوم سرائیکیاں نوں استعمال تے اوہناں دا استحصال کرکے اعلیٰ ترین مناصب تے مراعات حاصل کیتیاں پر اوہناں دی ترقی تے خشحالی لئی کوئی کم نہیں کیتا۔ اک پاسے سائوتھ پنجاب دا مراعات یافتہ طبقہ اے جہناں دے بچے ملکی تے غیرملکی درس گاہواں وچ تعلیم حاصل کرکے اعلیٰ عہدیاں تے فائز ہوندے نیں یاں اپنے علاقیاں وچ آ کے سیاست کردے نیں وزارتاں آپس وچ ونڈ لیندے نیں۔ دوجے اپسے محکوم عوام نیں جہناں دے بچے پڑھ لکھ وی جان تے اوہناں دے نصیب وچ درجہ چہارم یاں فیر وڈے شہراں وچ جا کے سکیورٹی گارڈ‘ ڈرائیور تے ویٹر ورگیاں نوکریاں ای کرنا ہوندا اے۔ موجودہ حکومت نے سرائیکی صوبے دے لوکاں دی محرومی ختم کرن دا نعرہ لا کے ووٹ تے سیٹاں حاصل کیتیاں پر ہن تک عملی طور تے کجھ زیادہ کم نہیں کیتا۔ سائوتھ پنجاب سیکرٹریٹ نوں دو شہراں وچ ونڈ دتا گیا اے جد کہ لہور وچ بیٹھے طاقتور بیوروکریٹ اپنے اختیارات گھٹ کرن تے تیار نہیں۔ نتیجے دے طور تے سائوتھ پنجاب وچ تعینات افسر کنفیوژن دا شکار نیں تے عوام وی اپنے کماں نوں لے کے پریشان نظر آئوندے نیں۔
بوجھل دل نال ملتان توں لہور لئی ٹریا تے خیال آیا کہ ایہناں مصیبتاں تے محرومیاں دا شکار صرف جنوبی پنجاب دے وسنیک ای نہیں سگوں ملک دے ہر صوبے‘ ہر علاقے وچ غریباں دا استحصال ہو رہیا اے۔ موٹروے تے واپس جاندے ہوئے جھنگ دے کسے پنڈ دی بیوہ یاد آ گئی جہدے بچیاں دا واحد سہارا اوہدی گاں سی جہدا ددھ ویچ کے اوہ گزارا کردی سی تے فیر اک دن اوہ گاں مر گئی تے اوہ بھیک منگن تے مجبور ہو گئی۔ لوکاں نوں ریلیف دینا اے تے حکومت وچ شامل بندیاں نوں سادگی اختیار کرنی پوے گی لوکاں دے دکھ درد وچ شریک ہونا پوے گا‘ کجھ عملی اقدامات کرنے پین گے۔٭٭
