حافظ عزیر احمد گڑھی شاہوی

لکھت:ابرار ندیم

ساڈے دوست حافظ عزیر احمد گڑھی شاہوی بین الاقوامی شہرت دے حامل اردو زبان و ادب دے اک اجہے منفرد شاعر نیں جہناں دے فریش جوس دی مشہوریاں تے دوستیاں دا سلسلہ گڑھی شاہو‘ امریکہ‘ کینیڈا توں لے کے خلیجی ریاستاں تے یورپ توں ہوندا ہویا ترکی‘ برطانیہ تک پھیلیا ہویا اے پر اینی مشہوری دے باوجود پتہ نہیں حافظ صاحب دی کیہ بیڈلک اے کہ کسے وی اخبار یاں رسالے وچ جدوں وی اوہناں دے حوالے نال کوئی مضمون‘ کالم یاں اوہناں دا اپنا کلام چھپدا اے تے کمپوزر حضرات اکثر اوہناں دے ناں عزیراحمد دی تھاں عزیزاحمد تے معروف ادیب دی تھاں معروف عجیب ٹائپ کر دیندے نیں۔ حالاں کہ مشہور عالم محاورا اے جنہے لہور نہیں تکیا اوہ جمیا ای نہیں دی طرز تے لہور سنے بیرون ملک رہن والے ساڈے سارے شاعراں‘ ادیباں وچ ایہ گل عام اے کہ جنہے حافظ عزیراحمد گڑھی شاہوی سرکار دے آستانے توں مفت داجوس نہیں پیتا اوہ ادیب ای نہیں۔ جیویں فی زمانہ لہور دے ادبی منظرنامے وچ شاعراں‘ ادیباں نوں باقاعدہ رجسٹر ہون لئی گڑھی شاہو وچ حافظ جوس کارنر توں مفت جوس پین دی سند حاصل کرنا لازمی اے۔ ایس لئی حافظ صاحب کول ایس مفت جوس پین دے چکر وچ ہن تک حافظ صاحب داشاید ای کوئی واقف کار بچیا ہووے جنہے شاعر ادیب ہون دا دعویٰ نہ کیتا ہووے ایس لئی کہ غریباں توں علاوہ ایتھے مفت جوس پین دی سہولت صرف ادیباں نوں حاصل اے نہیں تے حافظ صاحب اینے ظالم کاروباری نیں کہ بناں خریدے آپ وی اپنی دکان توں کدی مفت جوس نہیں پیندے۔
گمان اے کہ سجرے پھلاں دا جوس پین دے حوالے نال ساڈے لہوری شاعراں‘ ادیباں وچ مفت بری دی ایہ روایت اودوں دی شروع اے جدوں توں حافظ صاحب اپنی دکان تے آن والی کسے حسینہ نوں جوس پلان دے بعد اوہنوں بل دین دی تھاں اپنا دل دے بیٹھے نیں جہدا فائدہ چکدے ہوئے کسے ستم ظریف ادیب نے اپنے دو وقت دی روٹی لئی اوہناں نوں زبردستی شعروشاعری دے دھندے وچ پھسا دتا اے۔ ہن حافظ صاحب دے دل دا حال اللہ جان دا اے یاں اوہ آپ کہ اوہناں دے اندر سچ مچ کسے شاعر نے جنم لیا اے یاں اوہ سکھے نیں۔ ایس شک نوں اوس ویلے زیادہ تقویت ملدی اے جدوں اوہ کسے مشاعرے وچ اپنا کلام سناندے ہوئے غیر ارادی طور تے غزل تے فروٹ منڈی وچ آڑھتیاں توں اپنے حساب کتاب نوں آپس وچ گڈ مڈ کر دیندے نیں۔ بہرحال حقیقت جو وی اے ہن صورتحال ایہہ وے کہ گڑھی شاہو وچ حافظ صاحب دے ڈیرے تے شاعراں‘ ادیباں دی جوق در جوق آمد نال حافظ صاحب دی مقبولیت دا گراف تیزی نال اُتے تے اوہناں دے کاروبار دا گراف تیزی نال تھلے جانا شروع ہو گیا اے۔ امکان اے کہ حافظ صاحب دیاں ایہناں ادبی خدمات دے اعتراف وچ ادیب برادری بڑی چھیتی اوہناں دے فریش جوس دے اڈے نوں پاک ٹی ہائوس دی طرز تے پاک جوس ہائوس دا درجے دے دیوے۔ جتھے حافظ صاحب دی صدارت وچ ہون والے مشاعریاں وچ اوہناں دے شعراں تے داد دین دے حساب نال صرف منتخب شرکاء دی سجرے پھلاں دے جوس نال تواضع کیتی جاوے گی۔
شروع شروع وچ حافظ صاحب دے کول فریش جوس پی کے اپنی صحت بنان دا ایہ سلسلہ صرف د وتن شاعراں‘ ادیباں تک محدود سی جو مفت دا جوس پین دے نال اوتھے بیٹھے بیٹھے حافظ صاحب دے کھاتے وچ اک ادھ ڈبی سگرٹ دی وی پی جاندے سن۔ ایس حوالے نال اصل لت اوس ویلے توں پئی اے جدوں توں اوہناں دے کسے خیرخواہ نے حافظ صاحب نوں مارکیٹ وچ اوہناں دا ذاتی شعری مجموعہ لیان دا راہ وکھایا اے۔ ایس خبر دے عام ہون دے بعد تے جیویں حافظ صاحب دی مہمان نوازی توں لطف اندوز ہون لئی اوہناں دے در دولت تے چھوٹے وڈے تے مہنگے سستے شاعراں‘ ادیباں دی اک لائن لگی رہندی اے۔ جہڑے دوستاں نوں میرے ایس دعوے تے ذرا جناں وی شک اے اوہ حافظ صاحب دا شعری مجموعہ شام ہو گئی جاناں پڑھ کے ویکھ لین جے اوہناں نوں حافظ صاحب دے اک اک شعر وچ فریش جوس‘ آئس کریم تے سگرٹاں دا ذائقہ‘ خشبو یاں دھوں محسوس نہ ہووے تے میرا مشورہ اے کہ اوہ احتیاطاً اک واری اپنا کرونا دا ٹیسٹ ضرور کروا لین۔ جتھوں تک حافظ صاحب دی شخصیت دا تعلق اے تے ایس حوالے نال میں ایہ کہواں گا کہ حافظ صاحب اک بے لوث محبت کرن والے بڑے مخلص تے پیارے انسان نیں اوہناں نوں نہ صرف تعلق بنان سگوں اوہنوں نبھان دا ڈھنگ وی آئوندا اے۔ اک واری جہدے نال دوستی دا رشتہ بنا لین فیر اوہنوں ہمیشہ ہمیشہ لئی اپنا کر لیندے نیں یاں اوہدے ہو جاندے نیں۔ یاراں دے یار تے ایس توں وی ودھ کے یاراں دے خدمت گار سگوں زکوٹا جن نیں تے بالکل اوہدے وانگوں مجھے کام بتائو‘ میں کیا کروں‘ میں کس کو کھائوں دی گردان الاپدے ہر ویلے دوستاں دی خدمت لئی دستیاب رہندے نیں۔ ایس حوالے نال میں حافظ صاحب نوں تن چار واری اندرون و بیرون ملک جس محبت تے عقیدت نال استاد محترم عطاء الحق قاسمی صاحب دی خدمت کردے ویکھ چکیا واں اوہ میرے لئی حیران کن ہون دے نال نال قابل رشک وی اے۔ اپنے گھر توں دور سفر وچ جس محبت نال حافظ صاحب قاسمی صاحب دے کھان پین‘ سون جاگن‘ لباس تے آرام دا خیال رکھدے نیں انج گھٹ ای ویکھن وچ آئوندا اے۔ میں جدوں وی قاسمی صاحب لئی حافظ صاحب دی خدمت دے والہانہ پن نوں ویکھنا واں تے اک پاسے جتھے مینوں حافظ صاحب توں حسد محسوس ہوندا اے اوتھے قاسمی صاحب دی قسمت تے وی رشک آئوندا اے جہناں نوں اللہ تعالیٰ نے مادہ پرستی دے ایس دور وچ وی اجہی چاہت کرن والا دوست دتا اے۔ فیر کدی کدائیں میرے دل وچ ایہ خیال وی آئوندا اے کہ کاش حافظ صاحب نال ملدا جلدا کوئی سیکنڈ ہینڈ پیس لنڈے بازار وچ وی دستیاب ہوندا تے شاید ساڈے ورگا ماڑا بندہ وی اوہناں نوں خرید کے اپنا پکے والا دوست بنا لیندا۔٭٭