نعت شریف

عبدالحمید نظامی

اوہناں دیاں اکھیاں کمال کر دیندیاں
حبشی نوں تک تے بلال کر دیندیاں
چنگی طراں ویندیاں نیں کوڑے کھا سکدائے
بخدیاں کولیاں تے آ جا سکدائے
عاشقاں دا عشق بے مثال کر دیندیاں
اوہناں دیاں اکھیاں کمال کر دیندیاں
پلکاں اُتے ہنجواں نوں موتی کر دیندیاں
ہر تھاں تے منگتیاں دی جھولی بھر دیندیاں
کوڈیاں نوں تک کے تے لال کر دیندیاں
اوہناں دیاں اکھیاں کمال کر دیندیاں
عاشقاں نوں عشق والی بھٹی اُتے چاہڑ کے
غم دے کڑاہے وچ دکھاں نال کاہڑ کے
ہجر والے رنگ تے وصال کر دیندیاں
اوہناں دیاں اکھیاں کمال کر دیندیاں
ویکھیا نہیں! جامیؒ رومیؒ سعدیؒ تے ہزاراں نوں
بہلول جہئے دانیاں تے لکھاں مستواراں نوں
قطب تے قلندر ابدال کر دیندیاں
اوہناں دیاں اکھیاں کمال کر دیندیاں
اﷲ دے حضور چ قیام چ کھلو کے
غاراں وچ بہہ کے سجدے چ رو کے
امت لئی بخشش دا سوال کر دیندیاں
اوہناں دیاں اکھیاں کمال کر دیندیاں
اک واری سن لئی تعریف جنے آپ دی
لگ گئی چنتا اوہنوں آپ دے ملاپ دی
بن چھری کئیاں نوں حلال کر دیندیاں
اوہناں دیاں اکھیاں کمال کر دیندیاں
سب توں ستارا اوہدا اُچا ہو جاندائے
بخت نظامیؔ اوہدا سُچا ہو جاندائے
عشق وچ جنوں مالا مال کر دیندیاں
اوہناں دیاں اکھیاں کمال کر دیندیاں