نظــــــم
خالدحسین تھتھال
تاں کیہ ہویا نیڑے وسدے جے متراں تیں دوری ہوئی
تاں کیہ ہویا دل دی جے نہ کوئی سدھر وی پوری ہوئی
رج کے تکیا ایس جہان نوں رج کے کھادے دھکے
کدھرے لہو دلے دا پیتا کدھرے جام عشق دے چکھے
متر سنگی چھڈ گئے کدھرے ٹُٹی آس دلے دی
دل وچ لتھی مورت خبرے کہڑے موڑ ملے دی
لکھ پیا واڑاں دیوے بندہ لکھ پیا تاڑی مارے
جہڑا دانہ پکھنو کھانا آپے کنج اتارے
لکھ پیا بندہ پردے پائے لکھ پیا چکاں ٹنگے
اوہلا کوئی نہ رہندا جدوں ہو جاون نصیب ای ننگے
رونق میلے تک کے بندیا چھڈ دے چنتے جھورے
دنیا چھڈ کے جاندے دے نال داج کسے نہیں ٹورے
کہی کہی صورت اوس مصور شیشے پئی اتاری
دیکھ جنہوں اوسان بندے دے چھیتی پھڑن تیاری
جاگو نوٹی بندے کول نہ ابھڑواہے جائیے
آہلنے دے وچ ستا پکھنو کدے نہ جا جگائیے
در در وٹنی کاہنوں ٹپنی جے نہ آپ بلاون
پاون نوں تے منگتے نوں وی خیر پئے لوکی پاون
اتھڑ ررکھ دے نوں خالد جھریاں کجھ نہیں بندا
تندو تند تے ہر کوئی کردا تانا کوئی کوئی تندا
