عالمی برادری بھارتی قیادت دے متشدد بیانات دا نوٹس لوے: دفتر خارجہ
اسلام آباد: دفتر خارجہ نے ہندوستانی وزیراعظم نریندر مودی دے حالیہ متشدد بیانات نوں سختی نال رد کردیاں عالمی برادری توں مطالبہ کیتا اے اوہ ایہدا نوٹس لوے۔
دفتر خارجہ ولوں جاری اہم بیان وچ آکھیا گیا اے بھارتی انتہا پسند بیانیہ نال خطے دے امن و استحکام نوں خطرات لاحق ہو گئے نیں پر کسے وی جارحانہ اقدام نوں نکام بنان لئی پاک افواج نوں کمزور نہ سمجھیا جاوے۔ انڈین وزیراعظم نریندر مودی دے بیانات بی جے پی دی انتہا پسند سوچ دے عکاس نیں۔
پاکستان ایہناں دے جنگ نوں ہوا دین والے بیان نوں رد کردا اے۔ پاکستانی مسلح افواج تے عوام دے عزم نوں کمزور نہیں سمجھنا چاہیدا ۔
بالا کوٹ وچ بھارتی ایڈونچر دے دوران بھارتی طیاریاں نوں ڈیگنا ساڈی مسلح افواج دی تیاری دا ثبوت اے۔ بیان وچ آکھیا گیا اے وزیراعظم مودی دا بیان بھارت دے پاکستان مخالف لاعلاج جنون نوں ظاہر کردا اے۔ بی جے پی حکومت اندرونی تے بیرون تنقید توں توجہ ہٹان لئی بھونڈی کوششاں کر رہی اے۔
