بھارت وچ مسلم مخالف قنون دے خلاف احتجاج کرن والے مظاہرین تے فائرنگ، 2بندے ہلاک
کلکتہ: بھارتی ریاست مغربی بنگال وچ متنازعہ قنون دے خلاف احتجاج کرن والے مظاہرین تے نامعلوم مسلح بندیاں نے فائرنگ کر دتی جہدے نتیجے وچ 2بندے ہلاک تے 3زخمی ہو گئے۔ بھارتی میڈیا دے مطابق ریاست مغربی بنگال وچ مودی سرکار ولوں منظور کیتے گئے شہریت ترمیم قنون دے خلاف مظاہریاں دا سلسلہ جاری اے پر مغربی بنگال دی اسمبلی ولوں متنازعہ قنون دے خلاف قرارداد دی منظوری دے بعد مظاہریاں وچ تیزی آ گئی اے۔ مغربی بنگال دے ضلع مرشد آباد وچ نامعلوم مسلح بندیاں نے مظاہرین تے انھے واہ فائرنگ کر دتی جہدے تنیجے وچ دو بندے ہلاک ہو گئے جد کہ 3زخمی نیں۔
ہلاک تے زخمی ہون والیاں نوں قریبی ہسپتال منتقل کر دتا گیا اے۔ واقعے دے بعد علاقے وچ کشیدگی پھیل گئی تے پلس دی بھاری نفری نوں تعینات کرنا پیا۔
