شہباز، مولانا حلوہ ملاقات

اشرف شریف

مولانا ایہ حلوہ نوش فرمائو‘ دیکھو ذرا جناں وی گھیو وکھرا نہیں‘ سوجی دا ہر دانہ چنگی طرح بھنائی دے بعد پھُل کے اپنے حجم وچ آیا۔ رنگت سنہری ہوئی تے فیر اوہنوں اوناں دیسی گھیو ملا کے دانہ دوجے دانے توں وکھ تے ہویا پر حلوہ اکٹھا رہیا۔ کمال ایہہ کہ تسیں ہتھ نال کھائو‘ مجال اے کہ انگلیاں تے حلوے دا کوئی نشان رہ جاوے۔ سارا نوالہ سہولت دے نال زبان تک نسدا چلا جاندا اے تے زود رفتار اینی کہ تسیں دو تن واری چبایا تے ایہ فوراً معدے وچ جا اتریا۔ ذرا بھاری پن پیدا نہیں کردا۔ تسیں ایہ ضرور لوو‘ مولانا ایدھر وی دیکھو کھوئے وچ تلیاں گاجراں دے لال رنگ نال رکابی بھری ہوئی اے۔ اُتے چاندی دے ورق نے سبحان اللہ کیہ روپ کڈھیا اے۔ ایہ گاجر دا حلوہ اے‘ لوکاں لئی گاجر حلوے دا موسم نہیں تسیں تے جاندے او اسیں موسماں نوں نہیں اڈیک سکدے۔ اپنے ای کھیت تے کنٹرول کنڈیشنز وچ اگائیاں گاجراں نیں ایہ اج کل بازار توں ملن والی بے مزہ تے بے رنگ تاجر نہیں۔ پہلے ایہناں گاجراں دے بارے عرض کر دینا واں جو کھانے دے بعد ڈھڈ وچ پیڑ نہیں کردیاں۔ گاجراں ساڈے خطے وچ سینکڑوں ورھے توں کھائیاں جا رہیاں نیں۔ کوئی اٹھ سو ورھے پہلاں ابن سیار نے مسلم معاشریاں وچ دسترخواناں تے پیش کیتے جان والے چھ سو وکھووکھ کھانیاں تے اک کتاب تصنیف کیتی۔ گاجر نوں اوہنے جذاراحمر لکھیا اے۔ عربی تحریراں تے ثقافتی تاریخ توں تے تسیں واقف ہوو گے۔ یارھویں صدی وچ اندلس وچ رہندے اک عرب ابن العوام نے سرخ تے پیلیاں گاجراں دا ذکر کیتا اے۔ ابن العوام زراعت پیشہ عرب سی۔ انیسویں صدی وچ اوہدا کم سپینش تے فرانسیسی زبان وچ چھاپیا گیا۔ سرخ گاجر وچ باقی قسماں دی نسبت لائسوپین دا جزو زیادہ ہوندا اے۔ ایہ جو کجھ عشرے پہلاں اسیں کھیتاں چوں کڈھ کے سجری سرخ گاجراں کھاندے سی اوہ بیٹا سویٹ کہلاندیاں نیں۔
مغربی تے مشرقی قسم دا ملاپ‘ تہاڈے سامنے جو حلوہ دعوت تناول دے رہیا اے اوہ ایسے بیٹاسویٹ نسل دیاں گاجراں نوں مقدس پانیاں نال دھو کے انگلینڈ توں درآمد کٹلری توں کٹ کے محبت بھرے ہتھ والے باورچیاں نے کش کیتی۔ خالص دیسی گھیو وچ بگھاریا فکر نہ کریں۔ اسیں شوگر فری چینی استعمال کیتی اے۔ پستہ تے کشمش تہانوں نواں ذائقہ دین گے۔ لوو جی پوری رکابی تہاڈے لئی اے۔ حضرت میں جاننا واں تسیں کھانا جان دے او تسیں پینے دے سو مشروبات توں واقف او۔ تہانوں ویکھ کے جان لینے آں کہ مولانا نوں گل کرنا تے کھانا آئوندا اے۔ اینی لمی سیاسی خدمات دوران بھلا تسیں کیہ کجھ نہیں کھادا ہووے گا۔ عرب و عجم دے کیہ کیہ ذائقے تہاڈے حلق چوں اترے۔ اللہ اکبر۔ میں تہاڈی گل سناں گا۔ اسیں پی ڈی ایم دے مستقبل دی گل کراں گے۔ ہن مسلم لیگ ن ولوں جو کردا ر ادا کرنا اے اوہ میرے ذمے اے۔ مریم بیٹی غیر معینہ مدت لئی گوشہ نشین سمجھو۔ لندن توں جہڑے تہاڈے لین دین دے معاملے نیں اوہ ہن میری تسلی دے بعد اگے ودھن گے۔ تسیں کنے لوک کس جلسے وچ سدے تے اوہناں تے کیہ خرچ آیا ایہ رسیداں مینوں گھلو گے۔ میں حسابات چیک کراں گا۔
خیر اجے دال دا حلوہ باقی اے۔ ایہ اک ہتھ پرے ساڈے آرگینک پیٹھے نال تیار فرحت بخش حلوہ تہاڈی توجہ دا طلب گار اے۔ کھجور تے کھوئے دا حلوہ وی قوت بخش اے۔ ساڈے ایتھے کیوں جے حلوہ کھان والے آئوندے رہندے نیں ایس لئی اسیں اجہے ماہر باورچی تے حلوائی رکھے نیں جو مہماناں دے پیٹ تک صرف حلوہ نہیں اپڑاندے حلوے دی گرماہٹ‘ نرماہٹ تے لذت دے نال لھویٹ کے ساڈی گل وی اپڑا دیندے نیں۔ تسیں سمجھ تے گئے او ناں میں جو کجھ عرض کر رہیا واں؟ حضرت تسیں پی ڈی ایم دی فکر چھڈو۔ پی ڈی ایم ہن پرانی گل ہو گئی اے۔ تسیں ویکھیا نہیں برخوردار حمزہ نے جنوبی پنجاب دا دورہ حال ای وچ کیتا اے۔ حمزہ نے پی ڈی ایم دی تھاں مسلم لیگ دی گل کیتی۔ مسلم لیگی کارکناں نوں ملیا تے جلسیاں وچ مسلم لیگ دی سیاست تے گل کیتی۔ ہن جے پی ڈی ایم دی گل کیتی جاندی تے جنوبی پنجاب وچ پیپلزپارٹی دے لوکاں نوں ملنا پیندا تہاڈے حمایتی بہت گھٹ سہی پر دوچار لوک تے اوہ وی آ جاندے۔ پیپلزپارٹی والے کجھ شرطاں رکھدے تہاڈے والے وی کجھ لئے بناں کیویں شریک ہوندے۔ اگے انتخابات نیں۔ پنجاب وچ ماحول ون ٹو ون دا اے۔ پی ٹی آئی اے تے مسلم لیگ ن‘ پیپلزپارٹی دے کول جنوبی پنجاب وچ سیٹاں تے نہیں پر ووٹر ہے نیں۔ اسیں ایہناں ووٹراں نوں اپنی صف وچ شامل کرن تے دھیان دے رہے آں تاں جے اگلے انتخابات وچ متحدہ اپوزیشن ناں دی کوئی مخلوق پنجاب اسمبلی وچ نہ رہوے۔
مسلم لیگ (ن) اکلی حکومت وچ ہووے گی یاں اکلی اپوزیشن۔ ایہ چیک کہڑے نیں؟ بڑے میاں صاحب دے تے کوئی بینک اکائونٹ ای نہیں ہو سکدا اے ساڈے کسے منیجر یاں کسے فرنٹ مین ایم پی اے‘ منشی ایس قبیل دے کسے بندے نے تہانوں گمراہ کیتا ہووے۔ خرچے بہت ہو گئے نیں عدالتاں وچ پیشیاں‘ تسیں تے جان دے او تھانے کچہریاں دیاں تے کندھاں وی پیسے منگدیاں نیں۔ اُتوں ہسپتالاں دے خرچے‘ کاروبار کرونا نے کھا لیا۔ پولیس تے نیب والے پریشان کردے نیں۔ ایہناں حالات وچ کجھ میڈیا والیاں دیاں فرمائش وکھریاں۔ تسیں حلوہ کھائو۔ سوجی دا حلوہ گاجر والا دال دا حلوہ کھجور‘ پیٹھے تے کھوئے دا حلوہ۔ ارے تسیں کدھر جا رہے او۔ تہاڈے ساتھی وی باورچی خانے ول نس رہے نیں۔ ارے رے‘ ایہ حلوے دیاں دیگاں نوں کیوں الٹا رہے او‘ انج نہ کرو‘ تسیں اپنی پلیٹ کڈھ لوو۔ باقی دیگ رہن دیو‘ کسے ہور دے کم آ جاوے گی۔ مولانا غصہ نہ کرو‘ تسیں حلوہ کھائو۔ مقوی فرحت بخش لذیذ خوش ذائقہ حلوہ۔٭٭