غزل
الیاس آتش
اکھیوں اتھرو ڈلھ جاندے نیں
پھل مٹی وچ رُل جاندے نیں
ہیرے تیری دنیا دے وچ
کوڈیوں سانویں تُل جاندے نیں
بھُلدے بھُلدے بندے اک دن
اپنے رب نوں بھُل جاندے نیں
لکھ لکا کے رکھیے جگ توں
بھیت دلے دے کھل جاندے نیں
نفرت والیاں چھڈ دے گلاں
زہر ہوا وچ گھُل جاندے نیں
ماڑے رہ جاندے نیں ماڑے
دولت والے پھُل جاندے نیں
رحمت دا مینہ وسے جے کر
داغ دلے دے دُھل جاندے نیں
تیرے باجھوں آتش یارا
غم دے جھکھڑ جھُل جاندے نیں
