سانحہ یوحنا آباد کیس، عدالت نے پنج ورھے بعد فیصلہ سنا دتا

لہور: انسداد دہشت گردی دی خصوصی عدالت نے سانحہ یوحنا آباد دے 5ورھے بعد کیس دا فیصلہ سنا دتا۔ سانحہ یوحنا آباد وچ دو بندیاں نوں زندہ ساڑن دے کیس تے عدالت نے دلائل سنن دے بعد 40ملزماں نوں بری کرن دا حکم دے دتا۔

انسداد دہشت گردی دی خصوصی عدالت دے جج ارشد حسین بھٹو نے کیس تے فیصلہ سنایا۔ عدالت نے مقتول نعیم، بابر نعمان دے شرعی وارثاں دے بیانات قلمبند کرن دے بعد فیصلہ سنایا۔ شرعی وارثاں وچ محمد اقبال، محمد نواز تے خدیجہ بی بی نے بیان قلمبند کروایا۔ 5

ورھے بعد مقدمہ دے مدعیاں نے دفعہ 345دے تحت صلح دی عرضی عدالت وچ جمع کرائی۔ ملزمان دا عدالت وچ کہنا سی سانوں رہا کیتا جاوے، ساڈا راضی نامہ ہو چکیا اے۔

جیل انتظامیہ نے مقدمہ وچ ملوث 40ملزمان نوں عدالت وچ پیش کیتا۔ سانحہ یوحنا آباد دا مقدمہ تھانہ نشتر کالونی وچ درج اے۔ سانحہ یوحنا آباد وچ دو بندیاں نوں زندہ ساڑن دے کیس وچ 42ملزمان نامزد نیں۔ 2ملزمان جیل وچ بیماری دی وجہ توں فوت ہو چکے نیں۔ ملزمان دی پیشی دے ویلے عدالت وچ سکیورٹی دے خصوصی انتظامات کیتے گئے سن۔