بڑی مشکل سے ہوتا چمن میں دیدہ ور پیدا

ڈاکٹر عبدالقدیر خان پاکستانی قوم دے حقیقی ہیرو سن تے ہمیشہ رہن گے ایہناں دی محنت
تے کوششاں نال پاکستان دا دفاع ناقابل تسخیر بنیا تے دشمن دے عزائم مٹی وچ ملے

رابعہ رحمٰن

کسے وی قوم وچ ہیرو دا پیدا ہونا کوئی اچنبے دی گل نہیں، جے اندرونی تاریخ دا مطالعہ کریئے تے سانوں بے شمار اپنے ہیروز دیاں مثلاں ملن گیاں،جنہاں نے اپنی صلاحیتاں تے محنت نال قوماں دی تقدیر بدلی جائے اوہ وی شعبہ زندگی ہوئے اصل ہیرو اوہ ہوندا اے جیہڑا کسے وی تنازعے توں بالا تر ہوئے تے معاشرہ یا قوم مجموعی طور تے ایس نال پیار کرے، انج دی شخصیات ای حقیقی ہیروز اکھواندی اے تے فیر تاریخ وی ایہناں ای یاد رکھدی اے کوئی وی مخصوص حمایت رکھن والا بندا حقیقی ہیرو نہیں کہلا سکدا۔ ساڈی 74 سالہ تاریخ وچ حقیقی ہیروز بوہت ای گھٹ نیں۔ اونج تے بوہت سارے لوکاں نے مختلف شعبہ ہائے زندگی وچ ملک و قوم لئی جے گرانقدر خدمات انجام دتیاں نیں پر ایہناں وچوں بیشتر بوجوہ منقسم حمایت رکھدے نیں، ڈاکٹر عبدالقدیر خان مرحوم اک انج دی عہد ساز شخصیت سن جنہاں نوں بلاشبہ پاکستانی قوم دا حقیقی ہیرو قرار دتا جا سکدا اے تے ایہو وجہ اے کہ ایہناں دی وفات اُتے اج دے طول و عرض وچ لوک غمزدہ نیں۔
ممتاز ایٹمی سائنسدان تے پاکستان دے ایٹمی پروگرام دے معمار ڈاکٹر عبدالقدیر خان 1936ء وچ متحد ہندوستان دے شہر بھوپال وچ پیدا ہوئے، ایہناں دے والد عبدالغفور خان اک سکول ٹیچر سن۔ 1947ء وچ قیام پاکستان دے بعد اوہ اپنے اہل خانہ دے نال ہجرت کر کے پاکستان آ گئے تے کراچی توں ایف ایس سی دا امتحان کول کیتا جد کہ کراچی یونیورسٹی توں بی ایس کیتا ایس دے بعد اوہ اعلیٰ تعلیم لئی ہالینڈ چلے گئے جتھوں ڈیلفٹ یونیورسٹی توں ایم ایس کیتا۔ بعدازاں اوہناں نے لیوڈن یونیورسٹی بیلجئم توں میٹالرجی وچ پی ایچ ڈی دی ڈگری حاصل کیتی، ایہناں دی قابلیت تے اعلیٰ تعلیمی اسناد نوں ویکھدے ہوئے ہالینڈ دے URNCOپلانٹ وچ ایہناں نوں اعلیٰ درجے دی نوکری مل گئی جیہڑا کسے وی پاکستانی لئی ایس ویلے اک بوہت وڈا اعزاز سی۔ 1974ء وچ ہندوستان نے ایٹمی دھماکے کیتے تے ڈاکٹر صاحب جیہڑے کہ 1971ء دے سقوط مشرقی پاکستان دے بعد توں اونج ای بوہت غمزدہ سن ایہناں دے اندر اک نواں جذبہ پیدا ہویا۔ اپنی صلاحیتاں نوں ویکھدے ہوئے اوہناں نے ایس ویلے دے وزیراعظم ذوالفقار علی بھٹو نوں اک خط دے ذریعے پاکستان آ کے یورینیم ENRICHMENT افزودگی کرن دا پلانٹ قائم کرن دی پیشکش کیتی تاکہ ہندوستان دے مقابلے وچ ایٹمی صلاحیت حاصل کیتی جا سکے۔ انج 1974 وچ ہالینڈ وچ اک اعلیٰ درجے دی ملازمت چھڈ کے اپنی غیر ملکی (ہالینڈ) اہلیہ دے نال پاکستان آ گئے تے حکومت دی سرپرستی وچ اے کیو خان ریسرچ لیبارٹریز KRLدے ناں توں اک ادارہ قائم کیتا جتھے یورینیم افزودگی دا کم شروع ہویا، ڈاکٹر عبدالقدیر خان تے ایہناں دی ٹیم دا دن رات محنت نال پاکستان باضابطہ طور تے 28 مئی 1998نوں دنیا دی ستویں تے اسلامی دنیا دی پہلی ایٹمی طاقت بن گیا۔ پاکستان نے ایہہ صلاحیت تے بوت پہلے حاصل کر لئی سی پر ہندوستان دے پنج ایٹمی دھماکیاں دے بعد 28 مئی نوں چھ دھماکے کر کے اعلانیہ طور تے ایہہ صلاحیت حاصل کر لئی۔ڈاکٹر صاحب تے ایہناں دی ٹیم نے اپنی قابلیت تے محنت نال ایہہ صلاحیت حاصل کر کے پاکستان دے دفاع نوں ناقابل تسخیر بنا دتا تے دشمن دے عزائم نوں مٹی وچ ملا دتے اوہناں نے جو راستہ اپنایا اوہ خطرات نال بھرپور سی۔ ایس کم لئی ایہناں نوں بوہت ساری قربانیاں دینی پئیاں۔ ایہناں دی اہلیہ جیہڑا کہ ہالینڈ دی رہن والیاں سن اوہناں نے وی ایس سفر وچ ایہناں دا بھرپور ساتھ دتا۔ ایہناں دی گرانقدر قومی خدمات دے اعتراف وچ حکومت پاکستان نے ایہناں نوں دو وار نشان پاکستان تے اک وار ہلال امتیاز نال نوازیا۔ ایہہ منفرد اعزازت حاصل کرن والے اوہ واحد پاکستانی سن۔ امریکی، یہودی، ہندوستانی تے یورپی لابیز دی سازشاں دی بدولت 2003ء وچ ایہناں اُتے ایٹمی ٹیکنالوجی فروخت کرن دا الزام لا کے ایہناں نوں گھر وچ نظر بند کر دتا گیا، تے ایہناں دی نقل و حرکت اُتے وی پابندی لا دتی گئی، جنرل پرویز مشرف دی حکومت دے کہن اُتے ایہناں توں قومی ٹیلی ویژن اُتے اعتراف جرم کروایا گیا جیہڑا کہ بوہت وڈی دلیل سی ڈاکٹر صاحب آخری دم تیکر ایہہ تذلیل فراموش نہیں کر سکے تے برملا کہندے رہے کہ ایہناں توں زبردستی ایہہ بیان دلوا کے ایہناں نوں قربانی دا بکرا بنایا گیا۔ امریکی خفیہ ادارے دے اک سابق سربراہ جارج ٹینٹ نے اپنی یادداشت وچ لکھیا اے کہ اوہناں نے ایس ویلے دے پاکستان صدر جنرل پرویز مشرف نال اک انج دے بندے دے خلاف کاروائی دا کہیا سی جس نے اپنے کلے ہتھ نال پاکستان نوں ایٹمی طاقت بنا دتا تے جیہڑا قوم دا ہیرو سی۔ ڈاکٹر عبدالقدیر خان جہے لوک صدیاں بعد پیدا ہوندے نیں۔ ڈاکٹر صاحب اک شاندار زندگی لنگھان دے بعد اپنے خالق حقیقی نال جا ملے۔
اوہ پاکستانی قوم دے حقیقی ہیرو سن تے ہمیشہ رہن گے ایہناں دی محنت تے کوششاں نال پاکستان دا دفاع ناقابل تسخیر بنیا تے دشمن دے عزائم مٹی وچ ملے، اللہ تعالیٰ ڈاکٹر صاحب دے درجات بلند فرمائے تے سانوں ایہناں دی حقیقی قدر کرن دی توفیق فرمائے۔ (آمین)
ہزاروں سال نرگس اپنی بے نوری پہ روتی ہے
بڑی مشکل سے ہوتاہے چمن میں دیدہ ور پیدا