ڈاکٹر عبدالقدیر خان‘ اک بھاری قرض!

حناپرویزبٹ

اج میرا دل لہو دے اتھرو رو رہیا اے۔ قائداعظم دے بعد پاکستان دی دوجی وڈی ہستی‘ بلاشبہ تسلیم شدہ غیرمتنازعہ قومی ہیرو‘ پاکستان نوں ایٹمی طاقت بنا کے دشمن دیاں اکھاں وچ اکھاں پا کے کھڑا ہون دے قابل بنان والے ایٹمی سائنس دان‘ محسن پاکستان ڈاکٹر عبدالقدیر خان خالق حقیقی نوں جا ملے نیں۔ انا اللہ وانا علیہ راجعون۔ اللہ پاک اوہناں نوں اپنے جوار رحمت وچ اعلیٰ مقام عطا فرماوے۔ (آمین) ڈاکٹر عبدالقدیر خان آخری ویلے تک پروانہ آزادی منگدے رہے پر کسے نے کن نہ دھریا‘ محسن پاکستان مسلسل محسن کشی دا سامنا کردے ہوئے داغ مفارقت دے گئے۔ اوہناں تے جنہے جنہے جو جو جھوٹے الزامات لا کے اوہناں نوں اعتراف کرن تے مجبور کیتا اوہناں دا حساب تے اوہناں نوں دینا پوے گا کیہ صحیح تے کیہ غلط اے ایہدا فیصلہ تریخ تے کرے گی پر جدوں اللہ دے حضور پیشی ہووے گی تے ظالم کیویں اپنے ظلماں دا حساب دے پان گے؟۔
کسے ذی شعور دے وہم و گمان وچ وی نہیں سی کہ امریکہ‘ برطانیہ تے دوجیاں وڈیاں قوماں دی عملی مدد دے بناں نہ صرف اسیں ایٹمی قوت بنن دا اعزاز حاصل کر لواں گے سگوں سانو ںایٹمی قوت وی منیا جاوے گا۔ 70ء دی دہائی وچ جدوں ڈاکٹر عبدالقدیر نوں ایٹمی پروگرام دی باقاعدہ شروعات کرن تے اوہدی نگرانی لئی ہالینڈ توں پاکستان لیاندا گیا تے کئی میرجعفر‘ میرصادق ایتھے وی موجود سن‘ اوہناںنوں دھمکایا وی گیا پر اوہ عجب بندہ خدا سن‘ اکثر کہندے سن کہ پاکستان میرا غرور اے وطن عزیز دے بانکپن لئی سر تے کفن بنھ کے آیا واں یعنی اک پاسے ایٹمی پروگرام نوں نکام کرن والی بین الاقوامی قوتاں سن تے دوجے پاسے خالی ہتھ افرادی قوت‘ فیض احمد فیض دا شعر اوہناں دی ہمت تے جرأت تے پورا بیٹھدا اے۔
جو رکے تو کوہِ گراں تھے ہم
جو چلے تو جاںسے گزر گئے
ڈاکٹر عبدالقدیر خان نے پاکستان لئی جو خدمات سرانجام دتیاں اوہناں پاروں اج اسیں آزادی دی فضا وچ ساہ لے رہے آں۔ اوہناں ورگے مسلمان صدیاں وچ پیدا ہوندے نیں اوہ اک نسل دے نہیں سگوں پوری قوم دے ہیرو سن تے پاکستان دی تریخ وچ اوہناں دا ناں ہمیشہ سنہرے حرفاں وچ لکھیا جاوے گا محب وطن تے قوم لئی کجھ کر گزرن والیاں لئی ڈاکٹر عبدالقدیر خان دی زندگی رول ماڈل اے کہ اوہ کس طرح اپنے نال ہون والے سلوک نوں بھلا کے اپنی دھن وچ ملک دی خدمت کردے رہے۔ لوکاں دی خوش قسمتی کہ اوہناں ورگا بے لوث دماغ پاکستان نوں نصیب ہویا۔ یقینا اوہناں نے جنی عوامی تے عالمی عزت‘ احترام تے تکریم سمیٹی اوہ اوہدے حقدار سن پر اوہناں دی قدر نہ کیتی گئی‘ کہڑے لوک نیں جہناں نے ڈاکٹر عبدالقدیر خان ورگے ہیرو دی قدر نہ کیتی۔ ساڈے توں بہتر بظاہر ہندو ملک ثابت ہویا جنہے اپنے مسلمان سائنس دان نوں صدر مملکت بنا کے اوہدی خدمات دا اعتراف کیتا۔ تریخ وچ ڈاکٹر قدیر محافظ پاکستان دی حیثیت وچ زندہ رہن گے۔
پچھلے مہینے کرونا پاروں ہسپتال منتقلی دے بعد اوہناں دی وفات دی جھوٹی خبر پھیلی تے دل نوں دھڑکا جیہا لگ گیا سی بھاویں اوہ واپس گھر منتقل وی ہو گئے پر اوہ مکمل طور تے صحت یاب نہیں سن ہوئے۔ اوہناں دی وفات دے بعد ساڈا قومی ردعمل چھیتی سامنے آ گیا ڈاکٹر عبدالقدیر دی قید تے بیماری وچ لاتعلق رہن والی ملکی قیادت نے سوشل تے مین سٹریم میڈیا تے چھیتی اظہار تعزیت کر دتا پر بیماری دوران سرکاری سطح تے اوہناں دی عیادت تک نہ کیتی گئی۔ ڈاکٹر عبدالقدیر خان تے لائے گئے داغاں دا حساب ہن تے اللہ میاں لین گے دنیا وچ انصاف کرن دا وقت گزر یا۔ ایہدے توں ثابت ہوندا اے کہ اسیں مردہ پرست قوم آں۔ جدوں تک ڈاکٹر عبدالقدیر خان زندہ رہے اسیں اوہناں نوں اوہ مقام نہ دے سکے جہدے اوہ حق دار سن۔
کتنے منافق ہیں
آقائے فرنگ کو کھلی نوید دے دو
دشمنوں کو بھی تم کردوخبر
خونِ جگر وارنے جووطن آئے انہیں
پابند سلاسل کرکے چور چور کیا گیا
ٹوٹتے ٹوٹتے جاں دے کر آخر
صدیوں کا قرض ہم پہ چڑھا گئے
ڈاکٹر صاحب آپ ہمارے محسن تھے اور رہیں گے
ہم نے آپکی قدر نہیں کی
ہم سوگوار ہی نہیں شرمندہ بھی ہیں
آپ سے معافی کے طلبگار ہیں