قوم نوں پاکستان دی تاریخی فتح مبارک

میچ دے دوران اسٹیڈیم وچ شائقین دی وڈی حمایت وی بھارت دے کم نہ آ سکی

حافظ محمد عمران

پاکستان دی روایتی حریف بھارت دے خلاف فتح ساڈی کرکٹ دے دشمناں نوں واضح پیغام اے۔ پاکستان بہترین کرکٹ توں دور رکھن لئی دشمن سازشاں کردا رہندا اے۔ ساڈی ٹیم نوں ورھیاں اپنے میداناں اُتے کھیڈن دا موقع نہیں ملیا، پاکستان دہشت گردی دی وجہ نال اپنی کرکٹ باہر کھیڈدا رہیا، پاکستان نوں عالمی کپ دی چنگی تیاریاں توں محروم رکھن ، کھلاڑیاں دا اعتماد خراب کرن تے عالمی سطح اُتے ساڈی ساکھ نوں نقصان اپڑان لئی نام نہاد مہذب، انصاف پسند نیوزی لینڈ تے انگلینڈ نے اپنی ٹیماں گھلن توں کیتا۔ بھارت پاکستان دے نال باہمی میچز کھیڈن توں نسدا رہندا اے۔ ورلڈ کپ دے پہلے میچ وچ ساڈے کھلاڑیاں نے دنیا دی بہترین ٹیم نوں آئوٹ کلاس کردے ہوئے تاریخ رقم کیتی اے۔ بابر اینڈ کمپنی نے دنیا نوں پیغام دتا اے کہ دنیا سانوں تنہا کرن دی جنہی کوشش کرے گی اسیں جاندار طریقے نال واپس آئواں گے۔ ایس کامیابی نے پاکستانیاں نوں حقیقی خوشی دتی اے۔ پاکستان کرکٹ دی دنیا وچ اک منفرد مقام رکھدا اے۔ پاکستانی کھلاڑی ہمیشہ توں شائقین کرکٹ دے پسندیدہ رہے نیں۔ ایس میچ توں پہلے دنیا وچ سب ایہو کہہ رہے سن کہ بھارت پاکستان نوں آسانی نال ہرا دیوے گا۔ قوم نوں بھارت دے خلاف ایس فتح دی مبارکباد، ہن اگے لے جائے گی، ساہمنے آن والی ہر ٹیم نوں انج دا ای جواب دیاں گے اسیں صرف اپنے کھیڈ نال دنیا دے تعصب دا مقابلہ کر سکنے آں۔ جانبداری دا مظاہرہ کرن والی دنیا نوں کارکردگی تے فتح نال جواب دیئے۔
روایتی حریف دے خلاف میچ دے دوران سٹیڈیم وچ شائقین دی وڈی حمایت وی بھارت دے کم نہ آ سکی۔ شاہین آفریدی نے بنیاد رکھی ایہناں دی جارحانہ تے وکٹاں حاصل کرن والی بائولنگ نے دو ہزار سترہ وچ ہون والی چیمپئنز ٹرافی فائنل دی یاد تازہ کر دتی۔ ساتھی بائولرز نے وی شاہین آفریدی دا بھرپور ساتھ دتا۔ بعد وچ بابر اعظم تے محمد رضوان نے اوہ کر وکھایا جو اج تیکر کوئی ٹیم نہیں کر سکی۔ دونواں بلے بازاں نے گھمدی گینداں ہون یا فیر بھمرا دے تیز یارکرز کوئی وی بابر تے محمد رضوان نوں سکور کرن توں نہ روک سکیا۔ پاکستان دا ہدف دے تعاقب وچ رنز دے اعتبار نال پہلے دو اوورز چنگے رہے پر ایس دے بعد تیجے تے چوتھے اوور وچ جسپریت بھمرا تے چکرورتی نے سکور روکے، بھمرا مسلسل یارکرز دی کوشش کردے رہے۔ بھارتی بائولرز اپنی فیلڈنگ دے مطابق گیند کردے رہے۔ وارون چکرورتی نے پہلا اوور بوہت چنگا کیتا اوہناں نے بابر اعظم نوں سکور بنان توں روکیا پر شامی دی بائولنگ اُتے سکور بن دے رہے۔ شامی انج دے بائولر سن جنہاں نے پورے میچ وچ آزادانہ سکور دتے ایہناں دی بائولنگ ہر ویلے پاکستانی بلے بازاں لئی آسانیاں پیدا کردی رہی۔ پاور پلے وچ دونویں اوپنرز نے روایتی انداز وچ بیٹنگ کیتی۔
بابر اعظم تے رضوان میرٹ اُتے بیٹنگ کردے رہے۔ نویں اوور وچ شبم ڈگن نال گیند گلا ہونا شروع ہویا تے بھارتی کھلاڑی تھوڑا پریشان ہوئے۔ ایسے اوور وچ جدیجہ دی تھوڑا پچھے ڈگی گیند اُتے بابر اعظم نے مڈوکٹ اُتے چھکا لا کے دبائو گھٹ کیتا۔ دسویں اوور دے پہلے گیند اُتے چوکے نال پاکستانی کیمپ وچ چہریاں اُتے خوشیاں نظر آیاں۔دونویں بلے بازاں دیاں وکٹاں دے وچکار چنگی رننگ نے وی مخالف فیلڈرز اُتے دبائو ودھایا۔