غزل
عبادنبیل شاد
مستقبل‘ نہ‘ بیتے سال تے رکھنا واں
اپنیاں نظراں اپنے حال تے رکھنا واں
بھاویں کسے مسافر رستا بھلنا نہیں
فیر وی بوہے دیوا بال تے رکھنا واں
اجے وی طعنے دیویں مینوں دوری دے
تینوں اپنے ساہ دے نال تے رکھنا واں
بھاویں سارے نوٹ پرانے ہو گئے نیں
فر وی اپنے بوجھے مال تے رکھنا واں
ایس ورھے دی چھوٹ اے ظلم کما لے توں
ایہدا بدلا اگلے سال تے رکھنا واں
فیر وی گلاں کرنا ایں وکھ ہون دیاں
تیتھوں تیرا ودھ خیال تے رکھنا واں
دل پیلی چوں شاد جی سومے پھٹنے نہیں
اکھ دا بنجر کھالا کھال تے رکھنا واں
