پیسز مقابلے تے پاک فوج

ایس تربیتی سلسلے وچ پاک فوج انج دی مشقاں دا اہتمام کردی اے جنہاں دی بدولت فوجی جوان ہر طرح
دے موسماں تے ہر طرح دے حالات وچ اپنے اہداف حاصل کرن دے قابل ہو جاندے نیں

غلام محمد شاہ

افواج پاکستان دا طرئہ امتیاز ایہہ وے کہ اوہناں نے پچھلے 74 سال وچ وطن عزیز نوں صرف بیرونی سازشاں توں محفوظ نہیں رکھیا، داخلی مسائل تے شرپسند عناصر دا تدارک وی افواج پاکستان دی ذمہ داری رہیا اے۔ پاکستان دشمنیاں توں گھریا ہویا اے۔ ایہہ ملک توں باہر وی نیں تے اندر وی۔ پاکستان دی بقا دا تصور تے افواج پاکستان لازم و ملزوم نیں۔ آزادی جے جسم اے تے اندرونی امن ایس دی روح اے تے ایس دی ضامن ساڈی فوج اے۔ پاکستانی فوج نوں بلامبالغہ دنیا دی بہترین افواج وچ شمار کیتا جاندا اے۔ جسمانی، ذہنی تے تکنیکی ہر سطح اُتے افواج پاکستان دنیا دے ترقی یافتہ ملکاں دی افواج توں کسے طور تے گھٹ نہیں۔ ایس دا محرک اوہ سخت گیر تربیت اے جیہڑا ساڈے ہر فوجی جوان دے سونے دا کندن بنا دیندی اے۔کسے وی سپاہی دی عسکری زندگی ایس مسلسل تربیت توں عبارت اے جس نال اوہ اپنے پیشہ وارانہ دور وچ لنگھدا اے۔
ایس تربیتی سلسلے وچ پاک فوج انج دی مشقاں دا اہتمام کردی اے جنہاں دی بدولت فوجی جوان ہر طرح دے موسماں تے ہر طرح دے حالات وچ اپنے اہداف حاصل کرن دے قابل ہو جاندے نیں۔ فزیکل اجیلیٹی اینڈ کومبیٹ ایفیشنسی سسٹم (پیسز) دا تصور وی انج دی تربیتی مشقاں دی اک کڑی اے۔ 2011 وچ ایس ویلے دے سپہ سالار جنرل اشفاق پرویز کیانی نے پیسز دا تصور پیش کیتا جس دا مقصد فوجی جواناں نوں جسمانی سطح اُتے ایس قدر مضبوط بنانا سی کہ اوہ مخصوص حالات تے محدود ذرائع وچ اپنی جسمانی صلاحیتاں دی بدولت اہداف دے حصول نوں یقینی بنا سکیاں۔ پاک فوج دی سطح اُتے پیسز مقابلہ جات دا انعقاد تسلسل نال کیتا جاندا اے۔ اقوام عالم دی افواج نوں ایس تصور توں متعارف کروان لئی بین الاقوامی پیسز مقابلہ جات دے انعقاد دی بنیاد 2016 وچ رکھی گئی۔ تیجے بین الاقوامی پیسز مقابلہ جات یکم توں ست نومبر 2021ء تیکر منعقد کیتے جا رہے نیں۔ آئی ایس پی آر دے مطابق، بری فوج دے سربراہ جنرل قمر جاوید باجوہ ایہناں مقابلہ جات دا باضابطہ افتتاح کرن گے۔
11 ملکاں دے فوجی دستے تے پاک فوج دی سطح اُتے ہون والے پیسز مقابلہ جات وچ پہلی پنج پوزیشنز حاصل کرن والی ٹیم دے فوجی جوان تیجے انٹرنیشنل یسز کمپیٹیشنز 2021ء وچ اپنی جسمانی مستعدی تے مہارتاں دا مظاہرہ کرن گے۔ پاک فوج دی چار رجمنٹل ٹیمز وی ایہناں مقابلہ جات دا حصہ ہون گیاں۔ مقابلہ جات وچ شرکت کرن والے 11 ملکاں وچ عراق، اردن، نائیجیریا، فلسطین، ازبکستان، سری لنکا تے متحدہ عرب امارات دے فوجی دستے مختلف مقابلیاں وچ شرکت کرن گے جد کہ مصر، امریکہ، میانمر تے انڈونیشیا دے فوجی دستے بطور مشاہدہ کار تیجے انٹرنیشنل کمپیٹیشنز دا حصہ ہون گے۔ پاک فوج ہن تیکر دو بین الاقوامی پیسز کمپیٹیشنز دا انعقاد کر چکی اے۔ پہلے مقابلہ جات 18 توں 24 اکتوبر 2016ء نوں منعقد کیتے گئے سن جنہاں وچ سترہ ملکاں تے پاکستان دے نو فوجی دستیاں نے شرکت کیتی۔ ایہناں مقابلہ جات وچ پاک فوج دی سروسز کور نے پہلی تے عوامی جمہوریہ چین تے سری لنکا دے فوجی دستیاں نے بالترتیب دوجی تے تیجی پوزیشن حاصل کیتی۔ دوجے بین الاقوامی مقابلیاں دا انعقاد 8 توں 14 اکتوبر 2018ء نوں کیتا گیا جنہاں وچ 23 مہمان ملکاں دے فوجی دستیاں نے شرکت کیتی جد کہ پاک فوج دی 16 ٹیماں دے جواناں نے جسمانی مہارتاں دا مظاہرہ کیتا۔ ایہناں مقابلہ جات وچ بین الاقوامی سطح اُتے عوامی جمہوریہ چین تے مقامی سطح اُتے پاک فوج دی انجینئرنگ، سپلائی تے آرٹلری سینٹر نے فتح سمیٹی۔
پیسز دے تصور دی تعبیر لئی 2011 ء وچ پیسز سیل دا قیام عمل وچ لیایا گیا سی جس دا مقصد انج دی تربیتاں تے مشقاں دا اہتمام سی جنہاں دے ذریعے فوجی جواناں دی جسمانی و ذہنی مستعدی نوں یقینی بنانا تے جواناں دی انج دی استعداد کار وچ وادھا کرنا سی جس وچ ایہناں نوں گولہ بارود تے تکنیکی معاونتاں دے بغیر اہداف حاصل کرنے ہوندے نیں۔ دیگر بوہت سارے مقابلہ جات دے نال نال پیسز کمپیٹیشنز وچ پُل اپس سِٹ اپس تے دوڑ دے مقابلہ جات شامل نیں جنہاں وچ فوج جوان خالصتاً اپنی جسمانی فٹنس تے سٹیمنا دا مظاہرہ کردے نیں۔ فوجی جواناں دی جسمانی مہارت تے طاقت ایہناں دے تندرست و توانا ہون دا ثبوت اے ۔ چارکور دے سپاہی محمد رضوان نے 2294 سٹ اپس، انجینئرنگ کورسیپر شوکت علی نے 1859 پُش اپس تے آرٹلری سینٹر دے نائیک محمدبلال نے 351 پُل اپس دے نالدوجے بین الاقوامی پیسز مقابلہ جات وچ نویں ریکارڈ قائم کیتے۔
کومبیٹ ایفیشنسی ٹیسٹ جسمانی مستعدی ، ذہنی استعداد تے فوجی مہارتاں دا مجموعہ اے۔ ایس مقابلے وچ ہر شریک نوں محدود ذرائع دے نال تن تنہا اپنا ہدف حاصل کرنا ہوندا اے۔ اوہ مختلف رکاوٹاں نوں پار کردے ہوئے مختلف ذیل اہداف حاصل کردا اے تے آخر وچ مطلوبہ نتائج دا حصول ایس دی جیت دا ضامن ہوندا اے۔ 2018ء وچ ہون والے دوجے بین الاقوامی پیسز مقابلہ جات وچ سگنلر عبدالغفور نے محض 46.72 سیکنڈز وچ کومبیٹ ایفیشنسی ٹیسٹ مکمل کر کے نواں ریکارڈ قائم کیتا۔ پاک فوج اپنی کرشماتی دفاعی طاقت تے ناقابل شکست پیشہ وارانہ صلاحیتاں دے حوالے نال اپنی وکھری پہچان رکھدی اے۔ انسانیت نوں قدرتی دا ساہمنا ہوئے یا سرحداں اُتے دشمناں دا مقابلہ پاک فوج ہر محاذ اُتے ناقابل شکست تے کامیاب و کامران نظر آندی اے۔ ایہہ قابل تسخیر عزم تے بے مثال صلاحیت ایہناں مستقل مشقاں نوں مسلسل تربیت دا نتیجہ اے جس نال ہر جوان اپنی پیشہ وارانہ زندگی دے دوران لنگھدا اے۔ پیسز دا تصور اکیسویں صدی دے ایس سائنسی دور وچ جسمانی استعداد تے ذہنی مہارتاں دے اہمیت دا آئینہ دار اے۔