وزیراعظم آفس نے وزیراعظم دی تنخواہ وچ وادھے دی تردید کر دتی
اسلام آباد: ترجمان وزیراعظم آٖس نے وزیراعظم دی تنخواہ وچ وادھے دی خبر دی تردید کر دتی۔ سماجی رابطے دی ویب سائٹ تے ٹوئٹ کردیاں ترجمان وزیراعظم آفس آکھیا وزیراعظم عمران خان ہر ممکنہ طریقے نال حکومت دے اخراجات وچ کمی لیان دی مہم چلا رہے نیں جہدا آغاز اوہناں نے اپنی ذات توں کیتا ایس لئی اوہناں دی تنخواہ وچ وادھے بارے بے بنیاد تے من گھڑت خبراں دی تشہیر نہایت افسوسناک اے۔
ترجمان آکھیا وزیراعظم دی ہدایت تے کابینہ دے حالیہ اجلاس وچ صدر مملکت تے وزیراعظم دی تنخواہواں تے مراعات وچ ترمیم کردیاں ایہ فیصلہ کیتا گیا ہن صدر تے وزیراعظم لئی صرف اک رہائش گاہ نوں کیمپ آفس دا درجہ دتا جا سکے گا۔
ترجمان آکھیا وزیراعظم نے واضح ہدایت دتی کہ ماضی دی روش دی بجائے کیمپ آفسز وچ ہون والے اخراجات دی وی اک حد مقرر کیتی جاوے، وزیراعظم آکھیا سربراہان حکومت تے آن والے اخراجات عوام دے خون پسینے دی کمائی نال پورے کیتے جاندے نیں ایس لئی کوشش کیتی جاوے کہ ایہ اخراجات گھٹ توں گھٹ ہون۔
