ملک وچ خون خرابہ بلکل نہیں چاہندے:وزیراعظم عمران خان

اسلام آباد( پنجابی میڈیا گروپ)وزیراعظم عمران خان ہوراں آکھیاکہ کالعدم تحریک لبیک پاکستان(ٹی ایل پی)نال مذاکرات ہی مسئلے دا واحد حل سی،ملک وچ خون خرابہ بلکل نہیں چاہندے۔پاکستان تحریک انصاف(پی ٹی آئی)دی کور کمیٹی دااجلاس ہویا،اجلاس دے دوران کالعدم تحریک لبیک پاکستان(ٹی ایل پی)دے دھرنے سنے اہم کماںاُتے تبادلہ خیال کیتا گیا۔وزیر اعظم نے کور کمیٹی ارکاناں نوںکالعدم تنظیم نال مزاکرات اُتے اعتماد وچ لیا۔ذرائع دے مطابق وزیراعظم دی صدارت وچ اجلاس دے دوران پارٹی دی تنظیم نو دے معاملے اُتے مشاورت کیتی گئی تے پارٹی رہنماواں نوں عوامی رابطہ مہم شروع کرن دی ہدایت کر دتی۔ذرائع دے مطابق عمران خان نے عوام لئی ریلیف پیکیج اُتے وی اعتماد وچ لیا،وزیر اعظم نے پارٹی ارکاناں نال مشاورت کیتی،اجلاس وچ بلدیاتی الیکشن بارے حکمت عملی اُتے مشاورت کیتی گئی۔لہور دے حلقہ133وچ ضمنی الیکشناں اُتے وی مشاورت کیتی گئی۔اجلاس دے دوران وزیراعظم نے خطاب کردیاں آکھیا کہ میں ملک وچ خون خرابہ بلکل نہیں چاہندا،ہمیشہ مسئلے نوں مذاکرات نال حل کرن دی کوشش کیتی اے،کدی وی طاقت دا استعمال تے انشار دا حامی نہیں رہیا،بد امنی دا کسی نوں فائدہ نہیں ہوئے گا۔اج کل دی صورتحال نوں خوش اسلوبی نال حل کرن دی کوشش کیتی اے،مذاکرات ہی مسئلے دا واحد حل سن۔اوہناں نے آکھیا کہ رحمت اللعالمین اتھارٹی بنائی اے،اتھارٹی توہین رسالت دے سدباب لئی اقدامات کرے گی۔بلدیاتی الیکشن وچ ٹکٹاں میرٹ اُتے دتیاں جان گیاں،۔

اپنا تبصرہ گھلو