دنیا اک ہور صلح حدیبیہ کر لوے

اسیں سب نبی پاکؐ دی محبت وچ ایس قدر مبتلا ہو جائیے کہ
ساڈے وچوں ہر کوئی امانتدار بن جائے ،دیانت داری ساڈی پہچان ہوئے

عتیق انور راجا

مرشدی سعید صاحب نال عرض کیتا جناب کجھ دسو۔ دنیا وچ بوہت ساری اقوام آباد نیں پر اہل مغرب مسلماناں دی دل آزاری نوں ای کیوں سرگرم عمل رہندے نیں کیوں اک سوچی سمجھی سازش دے تحت اغیار مسلماناں دے محبوب نبی ؐ دی شان وچ گستاخانہ حرکتاں کردے رہندے نیں۔ دنیا دے ترقی یافتہ منے جان والے ملکاں دے لوک دنیا دے تہذیب یافتہ اکھوائی جان والی قوماں دے لوک بدتہذیبی دے مظاہرے کیوں کردے نیں کہ اسیں مسلمان بوہت کجھ چاہ کے وی ایہناں دا کجھ نہیں وگاڑ پاندے۔جواب وچ مرشدی نے فرمایا راجہ صاحب ! اج توں نہیں دنیا وچ ہر دور توں ایسے دی گل منی جاندی رہی اے جس دی معیشت مضبوط ہوئے۔ پنجابی دا محاورہ تے تسیں بخوبی سن رکھیا ہوئے گا کہ ’’جیدے گھر دانے اوہدے کملے وی سیانے‘‘ ایس دا اک ای مطلب اے کہ جنہاں ملکاں دی ماؒی حالت چنگی اے ایہناں دے عام بندیاں دے کہے لفظ ساڈے دانشوراں توں بھاری پئے رہے نیں جنہاں ملکاں توں ساڈی حکومتاں قرض لے کے بجٹ بناندیاں نیں تے اوہ کنج سانوں ذہنی آزادی دین نوں راضی ہو سکدے نیں۔
نبی پاک ؐ نال اسیں مسلمان جس قدر محبت کرنے آں کفار دے دلاں وچ سرکار دی ذات نوں لے کے اینا ای بغض بھریا ہویا اے تے فیر سانوں کیہ کرنا ہوئے گا کہ اسیں اہل مغرب نوں آزادی اظہار دے ناں اُتے ہون والی ایہناں گستاخانیاں توں روک سکیے۔ جواب وچ مرشدی سعید تاج صاحب نے فرمایا کہ جدوں ساڈے علما مسلک دی بجائے دین دی تبلیغ نوں وطیرہ بنا لین گے جدوں اسیں مسلمان اک دوجے نوں کافر کہن دی بجائے کافراں نال وی چنگا سلوک کرن لگاں گے جدوں ساڈے لوک کتاب حکمت قرآن پاک نوں ترجمہ تے تشریح دے نال پڑھنا شروع کر دین گے جدوں اسیں اک دوجے دے دکھ سکھ وچ ساتھی بنن لگاں گے۔ الغرض سانوں اگلے 10 سال سر نیچا کر کے ایس قدر محنت کرنی ہوئے گی کہ جدوں اسیں سر چکیے تے جدھر ویکھیے کفار دے سر تھلے جھکن لگن۔ جتھے گل کریئے ساڈی گل من لئی جائے۔ کوئی فیصلہ کریئے دنیا ایس نوں تسلیم کر لوے، ساڈے راہنما اقوام متحدہ وچ جیہڑی قرار داد پیش کرن اوہ شرف قبولیت پا لوے تے انج اودوں ہوئے گا جدوں سیرت نبی ؐ تے اصحاب رسول دیاں زندگیاں اُتے لکھی کتاباں ہر دن ساڈے مطالعے وچ رہن لگن گیاں۔ ساڈی مسجداں وچ دین و دنیا وچ کامیابی دی گل کیتی جان لگے گی۔ اسیں ایہہ نقطہ سمجھ لئے کہ دین و دنیا لئی وکھرے وکھرے نہیں بلکہ اک جہے ای اصول و ضوابط نیں۔ صاحبو! اسیں ایس ویلے نہ صرف اہل مغرب بلکہ چین و عرب توں قرض لین اُتے مجبور آں۔ ساڈی حکومتاں ساڈے عوام ساڈے سرمایہ داراں ساڈے کارخانہ داراں ساڈے استاداں ساڈے مولوی صاحبان دی اجتماعی غفلت نے سانوں کدی اک قوم بن کے طاقت ور بنان دی کوشش ای نہیں کیتی ایہو وجہ اے کہ اسیں ستر ورھیاں دی آزادی دے بعد وی اپنے ملک نوں معاشی طور تے مضبوط نہیں کر سکے۔ بس سانوں سچا عاشق رسول ہون دا دعویٰ ثابت کرن لئی اپنی زندگیاں نوں عملی طور تے بدلن دی کوشش کرنا اے۔ سانوں سر نیچا کر کے اینی محنت کرنی اے کہ اگلے کجھ ورھیاں وچ ساڈی معیشت اپنے پیراں اُتے کھڑی ہو چکی ہوئے۔ اسیں سب نبی پاکؐ دی محبت وچ ایس قدر عوام مبتلا ہو جائیے کہ ساڈے وچوں ہر کوئی امانت بن جائے دیانت داری ساڈی پہچان ہوئے۔ حبیب خدا نال محبت ساڈے قول دے بعد ساڈے ہر فعل وچ وی انج دے نظر آن لگے کہ ساڈے بازاراں وچ ہر کدھرے اک نمبر جس آسانی نال دستیاب ہوئے۔ اسیں نماز پڑھن دی بجائے نماز قائم کرن والے بن جان۔ وزیراعلیٰ پنجاب جناب عثمان بزدار دا بیان نظراں توں گزریا کہ دین اسلام رواداری، صلہ رحمی تے بھائی چارے دا درس دیندا اے۔ جدوں دین اسلام دوجیاں دے حقوق دی ادائیگی اُتے بوہت زور دیندا اے ۔ دین اسلام وچ برداشت تے تحمل دی بوہت اہمیت اے تے فیر کیوں آئے دن مذہبی جماعتاں دے راہنما سڑکاں اُتے اپنے لوکاں دی مشکلات ودھان نکل آندے نیں کیوں پنجاب دیاں سڑکاں نوں جلسیاں، دھرنیاں تے ریلیاں لئی استعمال کر کے لوکاں دیاں مشکلات وچ وادھا کیتا جا رہیا اے۔ ہن حالت ایہہ وے کہ ساڈے اپنے ای لوک ساڈی اپنی ای سڑکاں، بازار تے تجارتی سرگرمیاں بند کروائے ہوئے نیں۔ کدی بازار وچ لوکاں نوں کاروبار بند کرن دا حکم دتا جاندا اے تے کدی احتجاج دے ناں اُتے ملکی املاک ساڑ دتی جاندی اے تے کدی اپنے ای پولیس دے جواناں نوں شہید تے زخمی کیتا جا رہیا اے یعنی اسیں دینی و دنیاوی دونواں لحاظ نال نقصان وچ رہ رہے آں۔ پنجاب حکومت نوں اپنے افسراں نوں عوام نال صبر و تحمل نال پیش آن دی تلقین وی کرنی چاہیدی اے تے مستقب وچ جی ٹی روڈ اُتے جلسیاں، ریلیاں، تے دھرنیاں دے خلاف بہتر حکمت عملی وی ساہمنے لیانی چاہیدی اے۔