پلاک دے زیر اہتمام عشرہ شانِ رحمۃ للعالمینﷺ دے حوالے نال نعتیہ مشاعرہ
رپورٹ: آفاق بٹ
پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے زیر اہتمام عشرہ شانِ رحمۃ للعالمینﷺ دے حوالے نال نعتیہ مشاعرے دا اہتمام کیتا گیا جس دی صدارت معروف شاعر ڈاکٹر اختر شمار نے کیتی جد کہ دیگر شعراء وچ سعد اللہ شاہ، ڈاکٹر سعادت علی ثاقب، راجا نیّر، ڈاکٹر جواز جعفری، فرحت عباس، عدل منہاس لاہوری، فیصل زمان چشتی، علی اصغر عباس، انیس احمد، شفیق احمد، عرفان صادق، نصیر احمد تے خاقان حیدر غازی شامل سن۔
نعتیہ مشاعرے وچ شاعراں نے محسن انسانیت نبی مکرمﷺ نال اپنی والہانہ محبت دا اظہار اپنے اشعار دے ذریعے کیتا۔ ایس موقعے اُتے ڈائریکٹر جنرل پِلاک ڈاکٹر صغرا صدف نے کہیا کہ حضورﷺ دی زندگی ہمارے ساڈے لئی کامل نمونہ حیات اے سانوں ایہناں دی سیرت طیبہ اُتے عمل کرنا چاہیدا اے۔ حضرت محمدﷺ قیامت تیکر پوری کائنات لئی سرچشمہ ہدایت نیں۔ نبی پاک ﷺ دی ولادت باسعادت منانا ہر مسلمان لئی باعث فخر و سعادت اے ۔
