رونقاں وسدیاں رہن
عبدالحمید نظامی
وسدیاں رہن بابا رونقاں ایہہ تیریاں
رب اگے نِت ایخو عرضاں نے میریاں
میں پردیسی میرا دیس پرایا اے
دکھے دھوڑے کھاندا بابا قدماں چ آیا اے
رہواں وچ لکھاں سن منزلاں اکھیریاں
وسدیاں رہن بابا رونقاں ایہہ تیریاں
تیرے مستانے بابا حق ہو ہو پکار دے
آسے پاسے بیٹھ کے تیرے دربار دے
جالیاں نوں چم چم لاوندے نے پھیریاں
وسدیاں رہن بابا رونقاں ایہہ تیریاں
تیری گلی دے وچ نیں بابا جہڑے وسدے
بھاگاں تے نصیباں والے سدا رہن ہسدے
نظر کرم دی کرو کاہنوں لائیاں دیریاں
وسدیاں رہن بابا رونقاں ایہہ تیریاں
ہر پاسے دیندا پھراں تیری میں دہائی اے
بابا تیرے نام والی مالا گل پائی اے
دِتیاں نے رب تینوں شاناں وی اُچیریاں
وسدیاں رہن بابا رونقاں ایہہ تیریاں
بابا تیرے در اُتے آس لیکے آیا میں
نظر کرم دی کرو جگ دا ستایا میں
دُکھ تے مُصیبتاں کٹیاں بتھیریاں
وسدیاں رہن بابا رونقاں ایہہ تیریاں
حمید نطامی آیا تیرا مستانہ اے
ہتھ بنھ پیار وچ پڑھدا ترانہ اے
دور کرو میرے اُتوں غم دیاں نھیریاں
وسدیاں رہن بابا رونقاں ایہہ تیریاں
