تسیں تریخ نال لڑ نہیں سکدے

اسدمفتی

برٹش نیشنل پارٹی (پی این پی) دے چیئرمین تے پارٹی سربراہ نے پارٹی کتابچے دی اوس لکھت دا دفاع کیتا اے جہدے وچ کہیا گیا اے کہ ملک وچ کالے برطانوی تے ایشیائی برطانوی نہیں پائے جاندے سگوں ایس طرح کہنا خون بہائے بناں نسل کشی کرنا اے۔ نشریاتی ادارے نوں دتے گئے اپنے اک انٹرویو وچ گریفن نے کہیا کہ نسلی طور تے جہڑے بندے غیرملکی نیں اوہناں نوں برطانوی کہنا مناسب نہیں ایہدی تھاں نسلی غیرملکیاں دا لفظ استعمال کرنا چاہیدا اے کتابچے دے مواد تے تبصرہ کردے ہوئے گریفن نے کہیا کہ سماجی بنیاداں تے ایہ بندے کالے برطانوی رہائش نیں ایس توں ودھ کے زیادہ برطانوی نہیں جیویں کوئی ہانگ کانگ وچ رہن والا انگلش بندہ چینی اے۔
1990ء دے شروع توںیورپ اک اجہے مسئلے وچ پھسیا اے جہنوں اوہ مسلم مسئلہ کہندا اے ایہ مسئلہ کیہ اے؟ آئو میں اپنے حساب نال عرض کرنا واں۔ مسلم تارکین وطن جہڑے یورپ وچ آ کے آباد ہو گئے نیں 15 توں ویہہ ملین دے نیڑے نیں جہناں وچ دو ملین توں ودھ صرف انگلینڈ وچ نیں۔ یورپ بھر وچ رہن والے ایہ لوک ہن تک اپنے آپ نوں یورپ دی سوسائٹی‘ جہنوں تسیں معاشرہ تے سماج وی کہندے او ہم آہنگ نہیں کر سکے یاں ہو سکے تے ایتھے رہندے ہوئے وی ایہ اپنی اک وکھری دنیا وچ جی رہے نیں کہ ایہ لوک اپنا ماضی وی موڈھے تے چکی پھردے نیں تے ایہو گل ترقی یافتہ یورپ برداشت نہیں کر سکدا کہ ایہدے نال کھچاء پیدا ہوندا اے تے ہن ایہو کھچا اوہدی قوت برداشت تں باہر ہو رہیا اے۔ تقریباً ہر یورپین دے دل وچ ایہ گل چھپی ہوئی اے کہ مسلم تارکین وطن دی موجودگی یورپ دی مجموعی ترقی لئی مضر اے اوہدے تے بمب دھماکے‘ فسادات‘ حجاب پردہ برقع تے حلال شیواں لئی مسلماناں دے مطالبے‘ شرعی عدالتاں تے القاعدہ و داعش و طالبان نال اوہناں دیاں ہمدردیاں اوہناں نوں مغرب دیاں نظراں وچ مشکوک بناندیاں نیں۔ یورپین ایہنوں اپنے واسطے اک طنز تے خوف سمجھدے نیں۔
تہانوں یاد ہووے گا کہ کجھ چر پہلاں گستاخانہ خاکیاں دے خلاف لندن وچ جہڑے مظاہرے ہوئے سن اوہناں وچ اک پاکستانی نوجوان عمرخیام جہنوں جیل دی سزا ہو چکی سی تے جو پیرول تے رہا ہویا سی نے اک خودکش بمبار دا لباس تے کِل کنڈے نال لیس ہو کے مظاہرے وچ شرکت کیتی سی کرکٹ تے فٹ بال دے عاشق اہل لندن اپنے درمیان اک خودکش نوں کیویں برداشت کر سکدے نیں؟ ایہ وی حقیقت اے کہ اوہ خودکش نہیں سی پر ایہ لباس اوہدے ذہن دی شعوری یاں لاشعوری خواہش دا اظہار یقینا سی تے فیر اوس مظاہرے وچ لوکاں نے اسامہ دے حق وچ نعرے لائے اسامہ نوں سدو‘ اسامہ آن دی وے۔ ایہناں ساریاں گلاں توں یورپین ایہ گل محسوس کردے نیں کہ ایس قسم دی ذہنیت کدی وی اوہناں لئی خطرہ بن سکدی اے۔ انگلینڈ وچ مسلم امہ دے جہڑے رہنما نیں اوہناں دا کیہ رویہ اے ایہدی اک مثال پیش کرنا واں۔
اک مسلم تنظیم دے رہنما تے ترجمان اک پاکستانی انجم چوہدری اگے جدوں بی بی ی دے نمائندے جرمی پیکس مین نے ایہ سوال کیتا کہ تسیں اجہے ملک وچ کیوں رہ رہے او جتھوں دی اقدار و تہذیب تہانوں پسند نہیں؟ اوہدا جواب سی تہانوں ایہ کنہے کہہ دتا کہ برطانیہ انگریزاں دی ذاتی ملکیت اے؟ جے مینوں رہن لئی کسے جنگل وچ جانا پیا تے میں جانوراں وانگوں نہیں رہواں گا‘ میں آپ وی ڈھنگ نال رہواں گا تے جنگلیاں نوں وی جین دا سلیقہ تے طریقہ سکھاواں گا۔ میرے حساب نال انج کہن والے دیاں دو ای صورتاں نیں یاں تے اوہ خودفریبی دا شکار اے یاں فیر عقل و ہوش توں بیگانہ تے خلل دماغ دا مریض اے جے اوہ صحیح الدماغ وی ہووے تے خودفریبی دا شکار نہ وی ہووے تے فیر ایہ طے اے کہ اوہ جان بجھ کے خلق خدا نوں دھوکھا دے رہیا اے۔ میں اپنے ایس کالم دے شروع وچ برطانیہ دی جس سیاسی پارٹی بی این پی دا ذکر کیتا اے فنانشل ٹائمز دے مطابق بی این پی دے ترجمان نے دسیا اے کہ پارٹی ولوں ایہناں پمفلٹاں دی تقسیم دا مقصد مسلماناں دے جذبات تے احساسات نوں مجروح کرنا نہیں سگوں لوکاں نوں ایہ سوچن دا موقع دینا اے کہ مغرب دی جمہوری اقدار تے مسلماناں دی قرون وسطیٰ دی اقدار وچ کنی خلیج رکاوٹ اے۔ ایہ نظریہ اپنی تھاں پر سچ اے پر تجزیہ نگاراں دا خیال اے کہ مغربی ملکاں دیاں حکومتاں تے یورپین پارلیمنٹ اوہناں دے مسئلیاں نوں حل کرن وچ نکام ہو چکی اے ایس لئی ہن میڈیا نوں ایہدے بارے کجھ کرنا ہووے گا۔
اج دے مسلماناں دی رہنمائی کرن والے مولویاں تے نام نہاد دانشوراں دی اکثریت ستویں تے اٹھویں صدی دی اسلامی روایات نوں مثال سمجھدی اے تے اوہناں دا یقین اے کہ ایہناں روایات دی بحالی ای دنیا تے اسلام نوں غلبہ دوان دا واحد طریقہ اے۔ ہر باشعور مسلمان تے لاز اے کہ اوہ ایس گروہ نوں ستویں صدی دی ذہنیت چوں باہر کڈھے۔ میرے حساب نال جمہوریت جیویں دی وی ہووے اپنے اندر اک خاص طرز دا حسن و جمال رکھدی اے۔ اوہدے وچ اک منفرد قسم دا بانکپن تے جلال پایا جاندا اے۔ جمہوری ملکاں دے جمہوری حکمران‘ دانشور‘ ادیب و شاعر‘ فنکار و صحافی ہر آن عوامی جذبہ و احساس دی پوٹلی اپنی کچھ وچ رکھدے نیں تے ملک و قوم تے سوسائٹی تے آئے بھیڑے ویلے تے فیصلے دی ہر گھڑی وچ اوہدی خشبو توں رہنمائی لیندے نیں۔ اج سانوں جہڑے حالات دا سامنا اے اوہ تہذیباں دا ٹکرائو اے جو غیررواداری دے کارن پیدا ہویا اے۔ انج کیوں اے؟ میں وی سوچنا واں تسیں وی سوچو۔٭٭