حکومت تے فوج اِک پیج اُتے

اسد اللہ غالب نے سابقہ حکومتاں تے عمران خان دی موجودہ حزب اختلاف نوں اپنے کالماں وچ سخت تنقید دا نشانہ بنایا اے

محمد آصف بھّلی

اسد اللہ غالب نوں میں ایہناں اخبار نویساں وچ شمار کرنا واں جنہاں نے اپنی جدوجہد، محنت تے دیانت پاروں صحافت وچ وڈی عزت تے ناموری حاصل کیتی اے۔ اوہناں نے اپنی لمبی صحافتی زندگی وچ کدی قلم نوں بیوپار دی شے نہیں سمجھیا۔ اوہناں نے صحافت نوں وی عبادت وانگوں سمجھیا تے اوہ لکھیا جو ایہناں دے اپنے ضمیر دی اواز اے۔ ایہناں دے کالماں وچ سیاسی، عمرانی تے نظریاتی راہنمائی دا سامان وی ہوندا اے تے اک ادبی روحانیت وی۔ایہناں نوں ایہہ وی کمال و امتیاز حاصل اے کہ جدوں اوہ ا فواج پاکستان دی ملک و قوم لئی دفاعی خدمات دے موضوع اُتے کالم لکھدے نیں تے ایہناں دے قلم توں نکلی ہوئی تحریراں یاد گار و شاہکار بن جاندیاں نیں۔ دفاع مادر وطن لئی پاک فوج دی خدمات لاجواب، لازوال تے پرجلال ای نہیں بلکہ بے نظیر و بے مثال وی نیں جدوں وی پاکستان دی سرحداں اُتے ساڈے ازلی دشمن بھارت ولوں کوئی خطرہ منڈلاندا اے تے پاک فوج دا ہر ا فسر تے جوان دشمن دے شر تے فساد دے رد لئی پیکر عزم و جہاد بن جاندا اے تے جدون غازیاں دے جگمگاندے قافلے تے ساڈے سرفروش مجاہداں دے لہلہاتے ولولے سرحداں دے مقدس فرض دی ادائیگی لئی رواں دواں ہوندے نیں تے پاکستان دی بہادر قوم وی سیسہ پلائی ہوئی دیوار وانگوں پاک فوج دے پچھے پوری ثابت قدمی دے نال کھڑی ہو جاندی اے۔ عساکر پاکستان ذوالفقار حیدری دے امین تے جراتاں دے رازدار نیں۔ پاک فوج دے دبدبے تے شجاعت دی داد و تحسین لئی جدوں اسد اللہ غالب دا قلم جنبش وچ آندا اے تے انج محسوس ہوندا اے جویں عرصہ جنگ وچ آپ اسد اللہ غالب وی مجاہداں دی صف اول وچ شامل اے۔ میں اسد اللہ غالب دی نویں کتاب ’’ ایک پیج پر ‘‘ پڑھی اے ۔1965ء وچ عساکرِ پاکستا ن نے بھارت دے نال 17 روزہ جنگ وچ جرات و بہادری تے استقلال دے جیہڑے سنہرے باب رقم کیتے سن جدوں ایس حوالے نال اسد اللہ غالب کوئی کالم لکھدے نیں تے انج دے کالم ایہناں دی زیر تبصرہ کتاب وچ وی شامل نیں ۔ ایہناں کالماں نوں پڑھدے ہوئے میرا ایہہ احساس سی کہ کالم نگار نے ایہہ کالم نہیں لکھے بلکہ لشکر کفار دے غرور نوں توڑن لئی ایس نے نعرئہ تکبیر بلند کیتا اے۔ اسد اللہ غالب دے ایہہ کالم تے اگ برساندا ہویا قلم محاذ جنگ اُتے جرات و بسارت دے جھنڈے گاڑدا تے دشمن دیاں فوجاں دے کلیجے پاڑدا ہویا نظر آندا اے۔ 1965ء دی جنگ دے حوالے نال اسد اللہ غالب دے جنہے وی کالم ایہناں دی نویں کتاب وچ شامل نیں ایہناں کالماں وچ مینوں عجیب طرح دا بانکپن محسوس ہویا اے۔ ایہہ کالم ساڈی قومی عزت دے پاسبان تے ساڈی اجتماعی غیرت دے ترجمان نیں ایہناں کالماں نوں اسد اللہ غالب دی پوری صحافتی زندگی دا حاصل وی قرار دتا جا سکدا اے کیوں جے ایہناں تحریراں وچ ایہناں دا زور قلم تے فن صحافت پورے جوبن اُتے وے۔ اسد اللہ غالب اونج وی اک بے باک صحافی نیں پر 1965ء دی جنگ دے بارے وچ ایہناں دی تحریراں حقیقی معنیاں وچ ایہناں دی بے باک جراتاں دا نشان نیں۔ کشمیر دے مسئلے اُتے وی اسد اللہ غالب جدوں کوئی کالم لکھدے نیں تے ایہناں دے ولولیاں تے جاہ و جلال دا عالم کجھ ہور ای ہوندا اے کیوں جے ایہناں دے پیش نظر کشمیری مسلماناں اُتے بھارت دا ظلم وجود ہوندا اے تے ایہناں نوں اپنے جذبات اُتے قابو نہیں رہندا۔ اسد اللہ غالب دے وس وچ ہوئے تے اوہ ایہناں بھارتی ظالماں فوجیاں دی دھجیاں کھلار کے فضا وچ اڑا دین جنہاں دے غیر انسانی مظالم نے کشمیری مسلماناں اُتے عذاب مسلط کر رکھیا اے۔ کشمیر دے پاکستان دستبردار ہو گیا سی تے اسد اللہ غالب نے ایس فوجی ڈکٹیٹر دے خلاف سخت غم و غصے دا اظہار کیتا سی۔ کشمیر دے مسئلے اُتے نواز شریف حکومت دی ڈھلمل تے تذبزب دی شکار پالیسیاں نوں وی اسد اللہ غالب نے اپنے کالماں وچ شدید تنقید دا نشانہ بنایا اے۔
’’ایک پیج پر ‘‘ دے کئی کالماں وچ محترم اسد اللہ غالب نے نواز شریف تے اپوزیشن دے راہنمائواں نوں اپنا تختہ مشق بنایا اے جناب اسد اللہ غالب دی نویں کتاب دے عنوان توں ایہہ ظاہر اے کہ ایس کتاب وچ بیشتر کالماں وچ تکرار دے نال ایس گل نوں دہرایا گیا اے کہ حکومت تے فوج دونویں اک صفحے اُتے نیں پر ساڈے محترم دوست ایہہ دسن توں قاصر رہے نیں کہ حکومت تے فوج دونواں دے اک صفحے اُتے ہون دے باوجود عمران خان نال وابستہ عوام دیاں امیداں 3 سال دا عرصہ لنگھن دے بعد وی پوری کیوں نہیں ہوئیاں۔ اک پاسے فوج تے حکومت اک صفحہ اُتے سی دوجے پاسے عمران خان دی حزب اختلاف دیاں صفاں وچ انتشار رہیا۔ حکومت دے وزرا نے وی موجود اپوزیشن نوں ملک دی تاریخ دی نااہل ترین اپوزیشن قرار دتا اے۔ غالب صاحب نے وی عمران خان دی اپوزیشن نوں خوارزبوں تے پریشان حال قرار دتا اے۔ یعنی عمران خان نوں اک کمزور تے بے اثر حزب اختلاف نال واسطہ پیا اے جیہڑا کسے وی طرح نال عمران خان حکومت لئی کوئی خطرہ یا چیلنج نہیں۔فیر وی عوام دے معاشی مسائل گھٹ ہون دی بجائے ودھے نیں۔ مہنگائی نے عوام دا کچومر کڈ دتا اے۔ قوم نوں درپیش معاشی بحران دا احساس کردے ہوئے فوج ولوں وڈے جذبہ ایثار دا مظاہرہ وی کیتا گیا پر عمران خان حکومت عوام دی معاشی مشکلات نوں گھٹ کرن وچ کامیاب نہیں ہوئی۔ حکومت دے کجھ ترجمان تے آپ غالب صاحب نے وی اپنے کجھ کالماں وچ ایہہ اظہار کیتا اے کہ سارے معاشی اشارئیے مثبت نیں میں چونکہ معاشیات دے رموز توں زیادہ واقف نہیں پر عوام دی عظی اکثریت دی بدحالی تے جس مہنگائی نے عوام دی کمر توڑ کے رکھ دتی اے جدوں میں ایہنوں ویکھنا واں تے مینوں ملک وچ کوئی معاشی اشاریہ وی مثبت نظر نہیں آندا۔ ایس حکومت وچ ٹیکساں دی اینی بھرمار اے کہ ہن صرف ہوا، دھُپ تے بارش اُتے ای ٹیکس باقی رہ گیا اے۔ حکومت دی معاشی ٹیم دے وس وچ ہوئے تے اوہ قدرت الٰہی دی ایہناں نعمتاں اُتے وی ٹیکس لا دیوے۔ جناب اسد اللہ غالب نے آصف زرداری تے نواز شریف دی حکومتاں دی عوام دشمن پالیسیاں تے ایہناں حکمراناں دے دور وچ لُٹ مار دے حوالے نال اپنے کالماں وچ جیہڑی تنقید کیتی اے ایس دی تردید مینوں ایس لئی نہیں کرنی کہ ایہناں حکومتاں دا میں وکیل صفائی نہیں واں پر جس کسوٹی اُتے پرکھ کے اسد اللہ غالب نے سابقہ حکومتاں تے عمران خان دی موجودہ حزب اختلاف نوں اپنے کالماں وچ سخت تنقید دا نشانہ بنایا اے ایسے کسوٹی اُتے ای غالب صاحب نوں عمران خان دی حکومت نوں جانچنا چاہیدا سی۔
اسد اللہ غالب دی کتاب وچ ملک دی مقدس سروراں دے حوالے نال پاک فوج دی خدمات تے قربانیاں اُتے تحریر کیتے گئے جنہے وی کالم نیں ایہناں کالماں وچ نہ صرف میری بلکہ پاکستان دے 22 کروڑ عوام دی صحیح ترجمانی کیتی گئی اے۔ ایس اعتبار نال براہ کرم اسد اللہ غالب تے میں اللہ دے فضل نال اک صفحہ اُتے آں پر عمران خان دی حکومت دے خلاف عوام دی جیہڑی شکایات نیں ایس دی ترجمانی دا حق غالب صاحب نے ادا نہیں کیتا مینوں اسد اللہ غالب دا ایہہ حق تسلیم اے کہ اوہ عمران خان نوں پاکستان دا کامیاب و کامران وزیراعظم قرار دین۔ حکومت تے فوج دے اک صفحہ اُتے ہون دی اوہ جنہی چاہندے نیں تعریف کرن پر عوام دے جیہڑے دُکھ تے مصیبتاں نیں ایہناں دے حل لئی وی حکومت نوں مشورہ دین۔ اسد اللہ غالب اک لگی لپٹی رکھے بغیر گل کرن والا صحافی تے کالم نگار اے ایہناں توں سانوں امید اے کہ اوہ اپنے ممدوح عمران خان دے اگے عوام دے دکھاں دی وی بے لاگ ترجمانی کرن گے۔ اسد اللہ غالب جے حکومت تے فوج دے اک صفحہ اُتے ہون دی بوہت زیادہ تعریف کر رہے نیں تے ایسے فارمولے نوں اگے ودھاندے ہوئے ساڈی ایہہ درخواست ہوئے گی کہ اسد اللہ غالب تے عوام نوں وی اک صفحے اُتے ہونا چاہیدا اے تے حکومت نوں وی اپنے صفحے اُتے فوج دے نال نال عوام نوں وی کجھ دینی چاہیدی اے۔ جے پیپلز پارٹی تے نواز شریف دی حکومتاں وانگوں عمران خان دی حکومت وچ وی عوام دے حالات نہیں بدلنے تے فیر اک صفحے والی کہانی دا عوام نوں کیہ فائدہ۔ اسد اللہ غالب نے اپنی کتاب وچ شامل اک کالم وچ عمران دی شان وچ علامہ اقبال دے اک مشہور مصرع دا سہارا وی لیا اے۔ ’’بڑی مشکل سے ہوتا ہے چمن میں دیدہ ور پیدا ‘‘میں بڑے احترام نال گزارش کراں گا کہ جے عوام دی جھولی تے پیٹ خالی رہوے تے ایہنا ں نوں نواز شریف، آصف زرداری تے اسد اللہ غالب دے ’’دیدہ ور‘‘ وچ فرق کنج محسوس ہوئے گا جے اک صفحے اُتے ہون دی خوشی تے نعمتاں عوام نوں منتقل نہ ہوئیاں تے فیر عوام نوں وی ایہہ کہن دا حق حاصل ہوئے گا کہ سانوں عمران خان دی لوڑ نہیں۔ اسد اللہ غالب نے کتاب دے پیش لفظ حکومت تے فوج نوں اک صفحے اُتے ہون نوں دو مبارک ستاریاں دے ملاپ دا ناں دتا اے۔ ایہناں ستاریاں نوں مل کے عوام دی قسمت بدلن دا وی کجھ اہتمام کرنا چاہیدا اے۔ ایہہ احتیاط وی کرنی چاہیدی اے کہ حکومت دی ناکامیاں فوج دے کھاتے وچ نہ چلیاں جان۔