پنجابی یونین تے پنجاب ہائوس دی سانجھ نال معروف شاعر، کالم نگار، دانشور تے ماہر تعلیم

ڈاکٹر اجمل نیازی دی یاد وچ تعزیتی ریفرنس

رپورٹ: آفاق بٹ

معروف شاعر، کالم نگار، دانشور تے ماہر تعلیم اجمل نیازی مرحوم دی یاد وچ پنجابی یونین تے پنجاب ہائوس دے اشتراک نال تعزیتی ریفرنس منعقد کیتا گیا جس وچ مقررین نے اوہناں دی زندگی تے ادبی خدمات خصوصی طور تے پنجابی دے فروغ لئی کوششاں اُتے روشنی پائی تے اوہناں نوں خراج تحسین پیش کیتا۔ الحمرا ہال وچ ہون والی ایس تقریب دی صدارت گورنر پنجاب چوہدری محمد سرور نے کیتی جد کہ میزبانی دے فرائض پنجابی یونین تے پنجابی میڈیا گروپ دے چیئر مین مدثر اقبال بٹ نے ادا کیتے۔ مہمانان خصوصی وچ پروفیسر اختر شمار، بابا نجمی، صدر پنجابی میڈیا گروپ ندیم رضا ،دانشور ذبیح اللہ بلگن،سیاسی رہنماراجہ نوید اختر کیانی،سپیشل سیکرٹری ایگریکلچر وقار حسین،ڈی جی پلاک صغریٰ صدف،ایگزیکٹو ایڈیٹر روزنامہ پاکستان ایثار رانا تے معروف دانشور الیاس گھمن شامل سن۔

گورنر پنجاب نے تقریب نال خطاب کردے ہوئے کہیا کہ ڈاکٹر اجمل نیازی ایس دھرتی دی پہچان سن۔ جیہڑے لوک اپنے ملک، زبان تے کلچر نال محبت کردے نیں اوہ عظیم لوک ہوندے نیں۔ مدثر اقبال بٹ دا شکر گزار واں کہ اوہناں نے اک عظیم شخصیت نوں خراج عقیدت پیش کرن دا موقع دتا۔ پنجابی دے فروغ لئی جیہڑی کوششاں حکومتاں نوں کرنی چاہیدیاں سن اوہ نہیں کیتیاں گئیاں۔ اجمل نیازی میرے بوہت چنگے دوست سن میں جدوں وی لندن توں پاکستان آندا تے ایہناں نال ملاقات تے مکالمہ رہندا۔ اوہ تنقید برائے اصلاح کردے سن جس اُتے تنقید کردے اوہنوں محسوس ای نہ ہوندا کہ ایس اُتے تنقید کیتی گئی اے۔ بیماری نال اوہ جسمانی طور تے کمزور ہو گئے سن پر ایہناں دے حوصلے جوان سن۔ اجمل نیازی بوہت وڈے بندے سن ایہناں دے کم توں سانوں سکھنا چاہیدا اے۔ جتھوں تیکر معاملہ پنجابی اخبارات تے اشتہارات دا اے تے ایہہ واقعی زیادتی اے جس اُتے میں آپ حکومت نال گل کراں گا تے ایہہ مسئلہ وی حل کرواواں گا۔ ایس موقعے اُتے تقریب دے میزبان تے پنجابی یونین دے چیئر مین مدثر اقبال بٹ نے کہیا کہ ڈاکٹر جمل نیازی دی شخصیت اک پورے عہد دی پہچان سی۔ اوہناں نے ہمیشہ پنجابی تے پنجاب لئی اواز چکی تے اپنے حقوق لئی جدوجہد کیتی۔ اج اجمل نیازی ساڈے نال نہیں۔ جیہڑا خلا ایہناں دے جان نال پیدا ہویا اے اوہ کدی پُر نہیں ہوئے گا کیوں جے انج دے لوک صدیاں بعد پیدا ہوندے نیں۔ اوہ منیر نیازی دے بعد نیازی قبیلے دی سب توں وڈی پہچان سن جس نے ہمیشہ پنجاب دا سر بلند رکھیا۔ میری ایہناں دے نال 30 سالہ رفاقت تے دکھ سکھ دی سانجھ اے۔

ایہناں دے جان اُتے جس قدر رنجیدہ واں ایس دا بیان ممکن ای نہیں۔ پنجابی میڈیا گروپ دے صدر ندیم رضا نے کہیا کہ اجمل نیازی دی ذات تے خوبیاں دا احاطہ لفظاں وچ ممکن نہیں۔ اوہ میرے استاد سن، اوہناں نے اگرچے صحافت پڑھی نہیں پر اہل صحافت نوں دسیا کہ صحافت کنی کیتی جاندی اے۔ ایہناں دے کول تنقید وچ نقد سی، حسد نہیں، ایہناں دے کالماں وچ ہمیشہ مدلل گل بات ہوئی۔ ایہناں دی تنقید کدی تضحیک تیکر نہیں اپڑی۔ ایہناں دی نثر وچ شاعری دا خاص رنگ وکھائی دیندا اے۔ جویں ہر جملے وچ شعریت اُتر رہی ہوئے تے نظم وچ انج دی وسعت کہ جویں نثر دے دریا نوں کوزے وچ بند کر دتے ہون۔ اوہناں نے گورنر پنجاب دے حوالے نال کہیا کہ اسیں سب پنجابی زبان تے صحافت دے مجرم آں۔ مدثر اقبال بٹ کلے اپنے ذاتی وسائل دے نال 26 سال توں پنجابی دا واحد روزنامہ بھلیکھا شائع کر رہے نیں۔ بدقسمتی نال پنجابی اخبارات دا قانونی اشتہاری کوٹہ وی اوہ سیٹھ مافیا ہڑپ کر رہیا اے جیہڑا پہلے ای کروڑاں دے ماہانہ اشتہارا ت حاصل کر رہیا اے۔ ایس وچ کوئی دوجی رائے نہیں کہ اج پنجابی صحافت دا دیوا مدثر اقبال بٹ جہے دیوانے وسائل دے بجائے اپنے لہونال چلا رہے نیں۔ سپیشل سیکرٹری ایگریکلچر وقار حسین شاد نے کہیا کہ ڈاکٹر اجمل نیازی دے نال قریبی تعلق سی۔ اوہ بوہت وڈے بندے سن۔ ایہناں دی گل بات دا خاص لہجہ ایہناں دی پہچان سی ایہناں دی وفات نال ادبی دنیا دے گلدستے توں اک پھُل گھٹ ہو گیا اے۔ ایگزیکٹو ایڈیٹر روزنامہ پاکستان ایثار رانا نے کہیا کہ ڈاکٹر اجمل نیازی نال مینوں اختلاف اے تے میں ایہناں نوں ایس لئی ناپسند کرنا واں کہ اوہ کنج دے کالم نگار سن کہ جس نے نہ کوئی گھر بنایا تے نہ مال و دولت اکٹھا کیتی۔ ورنہ اج دا کالم نگار ضمیر سنے ہر شے ویچ کے مال و دولت اکٹھا کرن وچ لگیا اے۔ اجمل نیازی سچ لکھن والے باضمیر بندے سن۔ اوہناں نے کہیا کہ اجمل نیازی دی یاد وچ تعزیتی ریفرنس منعقد کر کے مدثر اقبال بٹ نے ثابت کیتا اے کہ ایہہ کم اوہ کر سکدے سن۔ پنجابی دے معروف شاعر بابا نجمی نے کہیا کہ اجمل نیازی دوستاں دی تعظیم تے تعریف کرن والے انسان سن۔ ایہناں وچ بوہت ساری خوبیاں سن۔ شاعر سن دانشور سن ماہر تعلیم سن، سب توں ودھ کے بوہت وڈے انسان سن۔ اوہناں نے کہیا کہ مدثر اقبال بٹ دی خوبی اے کہ اوہ دنیا توں جان والیاں دی یاد وچ میلہ لا لیندے نیں نہیں تے کسے نوں یاد رکھن دی کسے نوں توفیق نہیں ہوندی ۔صحافی تے دانشور ذبیح اللہ بلگن نے کہیا کہ ساڈے وچکار بیٹھن والے اجمل نیازی اج تصویر دی شکل وچ نظر آ رہے نیں۔ اسیں ایہناں دے نال بہہ کے اپنے آپ نوں وی وڈا سمجھدے سی۔ ایہناں وچ پیار سی محبت سی، بیزاری ناں دی کوئی شے نہیں سی۔ خوشی دی گل اے کہ مدثر بٹ نے ایہناں نوں یاد رکھیا۔ ساڈا معاشرہ مدثر اقبال بٹ جہے لوکاں دی وجہ ای نال زندہ اکھوائے جان دا حق دار اے۔ پروفیسر ڈاکٹر اختر شمار نے کہیا کہ اجمل نیازی اک زندہ کتاب سن، انج لگدا اے کہ اج وی اوہ ساڈے وچکار بیٹھے نیں تے سانوں سن رہے نیں۔ اوہناں نے کہیا کہ مدثر اقبال بٹ دا پنجاب ہائوس ساڈے جہے لوکاں لئی گوشہ عافیت اے۔ پنجابی دے تاج نوں اجمل نیازی نے اپنے سر اُتے پگڑی بنا کے رکھیا سی، اوہ لہور دی روایتی ادبی رونقاں ختم ہون اُتے افسردہ رہندے سن۔ ایہناں دے نال نال لہور دا اک چراغ بجھ گیا اے، انج دا چراغ جس دی روشنی ساڈے جہیاں نوں ہمیشہ منور رکھدی سی۔ معروف ادیب الیاس گھمن نے کہیا کہ ڈاکٹر اجمل نیازی نے نوجوان شاعراں دی حوصلہ افزائی وچ کدی کنجوسی نہیں کیتی۔ اوہ ہمیشہ اک پیر ودھ کے دوجیاں دی مشکلات آسان بنا دتا کردے سن۔ انج دے لوکاں دا کسے معاشرے توں اٹھ جانا اصل وچ ایس معاشرے توں روشنی تے محبت دا اٹھ جانا اے۔ پاکستان تحریک اتحاد دے صدر راجہ نبیل کیانی نے چودھری اورنگزیب دی نمائندگی کردے ہوئے کہیا کہ جس معاشرے وچ ڈاکٹر اجمل نیازی جہے لوک اپنا فکری و رثہ چھڈ کے گئے ہون اوہ کسے وی صورت مر نہیں سکدا۔ اجمل نیازی نے اپنی تحریراں دے ذریعے ساڈی نوجوان نسل دی تربیت کیتی تے ایہناں نوں حق و باطل وچ موجود تفریق نال آشنا کیتا۔ ایہو کسے وڈے مدبر تے دانشور دا فرض ہوندا اے تے پہچان وی۔ ڈی جی پلاک صغری ٰصدف نے کہیا کہ اپنی زمین نال محبت کرن والے ہمیشہ زندہ رہندے نیں۔ دانش ہمیشہ اپنی زمین توں جنم لیندی اے، مانگے تانگے دی زبان نال دانش نہیں آندی۔ اجمل نیازی کالم اردو وچ لکھدے تے شا عری پنجابی وچ کردے سن۔ اوہناں نے ہر پلیٹ فارم اُتے پنجابی دی آواز چکی۔ اوہ منافقت توں پاک سن اوہناں نے کہیا کہ لہوریے محفلاں دے دلدادہ نیں۔ ایہناں نوں تنہائی مار

جاندی اے۔ اوہناں نے کہیا کہ پنجابی زبان دے تحفظ تے فروغ لئی مدثر اقبال بٹ دی خدمات ناقابل فراموش نیں۔ روزنامہ آن ریکارڈ دے مدیر قاضی طارق عزیز دا کہنا سی کہ ڈاکٹر اجمل نیازی ساڈے زمانے وچ ادب تے معیاری صحافت دی پہچان سن۔ ساڈے جہے لوکاں نے ایہناں نوں پڑھ کے لکھنا تے سوچنا سکھیا۔ ایہناں دا اٹھ جانا ساڈے معاشرے توں انج دے سائے دا رخصت ہونا اے جس نے ہمیشہ ذہناں دی آلودگی نوں دور کرن دے نال نال ایہناں نوں بدتہذیبی دی دُھپ توں بچائے رکھیا۔ میزبان پنجابی یونین تے پنجابی میڈیا گروپ دے چیئر مین مدثر اقبال بٹ نے مہماناں تے تقریب دے شرکاء دا شکریہ ادا کیتا جد کہ اوہناں نے تقریب وچ مختلف موقعیاں اُتے ڈاکٹر اجمل نیازی دی پنجابی دے فروغ لئی خدمات تے ایہناں دی ذات دے مختلف پہلوئواں اُتے روشنی پاندے ہوئے کہیا کہ صحافت دا شعبہ ہویا شاعری دی دنیا ہوئے یا تعلیم دا میدان، اجمل نیازی دی خدمات ناقابل فراموش نیں۔