غزل
بابا نجمی
میرے ہتھیں چھالے پئے مزدوری نال
فر وی نہیوں بھریا چھنا چوری نال
خشیاں نال نہیں چھڈی اپنی جمن بھوں
تیرے شہر چ آیا واں مجبوری نال
میرے نالوں کوجھا پتر لمبڑاں دا
دھرتی اُتے پھردا اے مغروری نال
بھگت سنگھ تے دلا جبرو میرا لہو
کنج کھلوواں غزنی تے تیموری نال
میرا قلم قبیلہ اوہناں وچوں نہیں
اکھر جہڑے لکھدے نیں منظوری نال
شیشے ولے کر کے کنڈ کھلونا نہیں
جنا مرضی ویکھو مینوں گھوری نال
بابا اوہ وی سوچے میرے بالاں لئی
جس دا کھیسا بھرنا واں کستوری نال
