ڈینگی مچھر
ملک ارشاد
اللہ جانے کتھوں آیا
ڈینگی مچھر بڑا ستایا
ایہنے مارے چوکھے ڈنگ نیں
بندے لہو چ دتے رنگ نیں
ایہدے کولوں سارے تنگ نیں
ایہنے ڈاڈھا اے تڑفایا
اللہ جانے کتھوں آیا
اس دے ڈنگے پاندے ہاڑے
ایہ نہ ویکھے تگڑے ماڑے
اس نے جھگے کئی اجاڑے
ایہنے رونا ہر تھاں پایا
اللہ جانے کتھوں آیا
اپنا جثا کج کے رہیے
ایہنوں موقع مُول نہ دیئے
ایہنوں کٹھیاں ہو کے لیے
ایہ تے لہو دا اے تریہایا
اللہ جانے کتھوں آیا
گھر گھر کر کے میں سپریواں
ایہنوں زہر پیالے دیواں
اس نوں ماراں نالے پھیہواں
ایہنے بڑا سیاپا پایا
اللہ جانے کتھوں آیا
ٹائراں والی تھاں ایہ ملدا
ستھرے پانی دے وچ پلدا
بندے مارن توں نہ ٹلدا
ایہنے چوکھا ظلم کمایا
اللہ جانے کتھوں آیا
آئو جائو جے کر وانڈھے
ڈھکو پانی والے بھانڈے
ایہناں اندر دیندا آنڈے
سانوں ڈاکٹر نے سمجھایا
اللہ جانے کتھوں آیا
اس دا بی مُکا کے چھڈنا
ایہنوں دیس چوں آپاں کڈھنا
جھنڈا امن سکون دا گڈنا
ایہ سرکاراں نے فرمایا
اللہ جانے کتھوں آیا
سجنوں کٹھے ہو کے سارے
ایہنوں دِنے دکھا دیو تارے
بیٹھا سوچے‘ چیکاں مارے
ایہنے متھا کس نال لایا
اللہ جانے کتھوں آیا
ہویاں موتاں سجنوں کافی
منگو سب خدا توں معافی
کرسی اوہ ارشاد تلافی
جہڑا گھاٹا قوم اٹھایا
اللہ جانے کتھوں آیا
اللہ جانے کتھوں آیا
