ادبی تنظیم وِجدا ن دے پربندھ ہیٹھ اک شام قمر ریاض دے ناں

قمر ریاض جدوں پاکستان آندا اے تے لگدا اے، پاکستان پاکستان وچ آ گیا اے: صدر مشاعرہ عباس تابش دی گل بات

رپورٹ: آفاق بٹ

ادبی تنظیم وِجدان دے ولوں اومان وسدی اک وڈی ادبی تے کاروباری شخصیت قمر ریاض ہوراں نال اِک شام دا پربندھ کیتا گیا۔ صدر تقریب عباس تابش ہوراں گل بات کردیاں آکھیا کہ جدوں قمر ریاض پاکستان نال محبتاں سمیٹ کے واپس اومان چلا جاندا اے تے انج محسوس ہوندا اے کہ پاکستان اپنے نال ای لے گیا۔ ایس دی وضاحت کردے ہوئے تابش صاحب بولے جیہڑا اومان وچ اپنے کاروبار دے نال نال ادبی و ثقافتی تقریبات منعقد کرواندا رہندا اے ایہناں تقریبات وچ جتھے ملک پاکستان توں بوہت سارے شاعراں، ادیباں تے دانشوراں نوں مدعو کردا اے تے اوہ اومان وچ مقیم پاکستانیاں دے مل بیٹھن ئی ہر ویلے متحرک رہندا اے۔

ایس لئی سال وچ اک دو وار جدوں وی قمر ریاض پاکستان آندا اے ایس دے نال کدھرے کوئی شام سجائی جاندی اے کدھرے ایہنوں کسے مشاعرے وچ مہمان خصوصی بلایا جاندا اے۔ صدر وِ جدان نبیل نجم نے کہیا کہ قمر ریاض دی پہچان محبت دے شاعر جہی اے تے قمر بھائی بیرون ملک پاکستان دے ادبی سفیر منے جاندے نیں۔ دنیا وچ اج اوہ ای ملک ترقی یافتہ اکھوا رہے نیں جنہاں نے اپنے نوجواناں دی بہترتربیت کیتی۔ تربیت دا بہترین طریقہ ایہہ وے کہ نوجواناں نوں مسلسل انج دی سرگرمیاں دا حصہ بنان دی کوشش کیتی جائے جنہاں وچ اوہ اپنے جذبات دا اظہار کر سکن۔ شعر سن سکن، شعر سنا سکن، کھل کے مسکرا سکدے ہون، گنگنا سکدے ہون تے قہقہے وی لا سکن۔ بدقسمتی نال پاکستان وچ مجموعی طور تے ادبی ماحول انج دا بن نہیں پایا۔ ایس لئی ساڈا اج دا نوجوان ذہنی گھٹن دا شکار اے۔ ایہہ گھٹن ساری زندگی ایس دے نال چلدی اے۔ عتیق انور راجہ نے کہیا کہ اسیں پچھلے پنج ورھیاں توں گوجرانوالہ وچ ادبی ، ثقافتی و تعلیمی تقریبات دا انعقاد کر رہے آں، ایہناں تقریبات وچ ساڈی کوشش ہوندی اے کہ طلباو طالبات دی شرکت یقینی ہوئے۔

لوکاں دی ذہنی تفریح لئی مشاعرے، موسیقی تے سماع جہی محفلاںمنعقد کروائی جا رہیاں نیں۔ ساڈی کامیابی ایہہ وے کہ ساڈے ایس کارواں وچ ہر طبقہ فکر دے لوک شامل ہو رہے نیں۔ شام چار وجے الحمرا دی پوڑھیاں اُتے بیٹھی گوجرانوالہ دی شاعرات لہوریاں دے دیر نال تقریب وچ آن اُتے گل بات کر رہیاں سن۔
کسے نے راہ چلدے کہیا کہ لاک ڈائون دے بعد الحمرا وچ ایہہ شاید پہلا مشاعرہ اے۔ ایہہ شام کس دے ناں سجائی جا رہی اے کون اے جس لئی تسیں محبتاں بھرے پھُل لئے کھڑے او کجھ ای دیر بعد ہس دے مسکراندے قمر ریاض بھائی تے صدر تقریب جناب عباس تابش صاحب ہال وچ اپڑ گئے۔ نوائے وقت دے کالم نگار عمر فاروق نے تلاوت قرآن پاک تے فرحانہ عنبر نے نعت رسول پاک ؐ پیش کیتی۔ فیر نوجوان شاعراں نے ایس خوبی نال اپنا کلام سنایا کہ سٹیج تے ہال توں واہ واہ تے مقرر مقرر دیاں صداواں بلند ہوندیاں رہیاں۔ قمر ریاض دی شاعری وچ ایس دی شخصیت دا عکس نظر آندا اے۔ صدر تقریب عباس تابش صاحب دی یاداشت انج دی چنگی اے کہ جناب نے جونیئر و سینئر بوہت سارے شعرا دے ناںلے کے ایہناں نوں سراہیا۔

جنہاں شعرا نے اپنا کلام سنایا ایہناں وچ ملک معصوم کاشمیری،ملک فخر عظیم،سید تیمور حسین کاظمی،حذیفہ عاصمی،روبینا ناز،راحت ثمر،فرحانہ عنبر،بشیر کمال،رجب چوہدری،عرفانہ امر،قاضی اعجاز محور،عمیر مشتاق،ڈاکٹر عدنان خالد،احسا ن الحق،ایم وائی شاہد،مسعود خان ارحم،عرفان صادق،اتباف ابرک،اقتدار جاوید،ڈاکٹر سلیمان عبد اللہ ڈار،پر وفیسر یوسف خالد،ثاقب تبسم ثاقب،سجاد سردار،نبیل نجم و دیگر شامل سن۔ اُنج تے حاضرین محفل نے سارے شعرا نوں خوب داد و تحسین نال نوازیا پر خاص مہمان قمر ریاض لئی محبتاں دے پیمانے وکھرے ای نظر آئے تے ایہناں دے اک شعر ’’میں اُ س کے ساتھ رہنے لگ گیا تھا وہ لڑکی خوبصورت ہو گئی تھی‘‘ نے تے جویں میلا لُٹ لیا۔
تابش صاحب دے دو شعر جیہڑے لوکاں نوں بوہت پسند آئے۔
مدت کے بعد خواب میں آیا تھا میرا باپ
اور اس نے مجھ سے اتنا کہا خوش رہا کرو
پہلے تو اس نے غم کے فوائد بیاں کیے
پھر وقفہ لے کے کہنے لگا خوش رہا کرو
حاضرین محفل ولوں اک کامیاب مشاعرے دے انعقاد اُتے عتیق انور راجہ نوں مبارکباد دتی گئی تے امید ظاہر کیتی گئی کہ اوہ گوجرانوالہ دے بعد لہور جہے وڈی ادبی مرکز وچ نویں ٹیلنٹ دی حوصلہ افزائی لئی مصروف عمل نظر آندے رہن گے۔