وزیر خارجہ نال زلمے خلیل زاد دی ملاقات، افغان امن عمل دی پیشرفت تے گل بات
اسلام آباد: پاکستان دے دورے تے آئے امریکا دے نمائندہ خصوصی زلمے خلیل زاد نے وزیر خارجہ شاہ محمود قریشی نال اہم ملاقات کیتی جہدے وچ افغان امن عمل بارے مشترکہ کاوشاں نوں بروئے کار لیان لئی مشاورتی سلسلہ جاری رکھن تے اتفاق کیتا گیا۔
امریکی نمائندہ خصوصی زلمے خلیل زاد اک روزہ دورے تے قطر ایئر لائن دی پرواز کیو آر 614دے راہیں پاکستان اپڑے۔ اوہناں نے وزارت خارجہ دا دورہ کیتا جتھے اوہناں دی وزیر خارجہ شاہ محمود قریشی نال ملااقات ہوئی۔
دوواں رہنماواں وچکار ملاقات وچ افغانستان وچ قیام امن لئی کیتی جان والی کاوشاں سنے خطے وچ امن و امان دی مجموعی صورتحال تے تبادلہ خیال کیتا گیا۔
امریکی نمائندہ خصوصی نے وزیر خارجہ نوں طالبان دے نال جاری امن مذاکرات بارے حالیہ صورتحال دی تفصیلات توں آگاہ کردیاں پاکستان دے مصالحانہ کردار دی تعریف کیتی۔
وزیر خارجہ شاہ محمود قریشی دا کہنا سی امریکا تے طالبان وچکار امن معاہدہ طے پان نال انٹرا افغان مذاکرات دی راہ پکی ہووے گی جہڑی نہ صرف افغانستان لئی سگوں پورے خطے دے امن و استحکام لئی خوش آئند ثابت ہووے گا۔
وزیر خارجہ آکھیا پاکستان مشترکہ ذمہ داری نوں نبھاندیاں ہوئیاں افغانستان وچ قیام امن لئی کیتی جان والی کوششاں دی حمایت جاری رکھے گا۔
