قوم،قومی سلامتی تے قومی میڈیا
بھارتی میڈیا اپنی اقلیتاں دے نال ہندوواں شدت پسنداں دے کارنامے وکھان توں وی ہچکچاندا اے
عتیق انور راجہ
پاکستان دے معاشی حالات ایس ویلے بوہت مشکل تر ہو چکے نیں۔ اج توں کجھ ہفتے پہلے اسیں بوہت خوش سی کہ ساڈے گوانڈھی ساڈی مدد نال بھارت امریکہ تے اتحادیاں نوں شکست دے چکے نیں۔ ساڈے وزیراعظم صاحب کھل کے امریکہ دیاں پالیسیاں اُتے تنقید کر رہے سن تے ڈومور توں جان چھڑان دا نعرہ بلند کر رہے سن پر ساڈی کمزور معیشت نے بوہت جلدی سانوں اک وار فیر کشکول لئے امریکہ تے ایس دے اتحادیاں دے در اُتے جا کھڑا کیتا اے تے ملک وچ مہنگائی دا نہ ختم ہون والا سلسلہ چل پیا اے۔ پاکستان نوں ایف اے ٹی ایف بل دی مدد نال اہل مغرب گھیرا پائے ہوئے نیں تے ایہناں دی خواہش اے کہ کسے نہ کسے طرح ایہناں دے مرضی دے اخلاقی، مذہبی تے سماجی قوانین پاکستانی حکومت پاس کر کے لوکاں نوں ایہناںدی مرضی دی ٓزادی دیندی نظر آئے۔ پچھلے کجھ ورھیاں وچ اسیں ایہہ لفظ بار بار سن دے آ رہے آں تے ہر سال ساڈی حکومتاں ایس شکنجے نوں توڑن لئی بظاہر بوہت سارے اقدامات کردی اے تے امید کیتی جاندی اے کہ ایس وار پاکستان گرے لسٹ توں نکل جائے گا پر ہر سال پاکستان نوں کجھ نویں شرطاں کجھ نویں قوانین تے کجھ نویں اصول و ضوابط بنان دی ترغیب دے دتی جاندی اے۔ ہر سال اہل مغرب پاک حکومت نوں پاکستان وچ اقلیتاں دے نال غلط سلوک دے اک دو واقعات وکھاندے ہوئے کسے اک خاتون دے نال نامناسب رویہ تے کجھ صحافیاں دی گمشدیاں نوں بنیاد بناندے ہوئے پاکستان نوں گرے لسٹ وچ ای رکھ چھڈ دے نیں۔ اسیں مننے آں کہ دنیا اک گلوبل ویلج دی شکل اختیار کر چکی اے۔ اسیں ایہہ وی مننے آں کہ دنیا دے ہر ملک وچ انسانی حقوق دے بوہت سارے مسائل رہے نیں پر اسیں پاکستانی ایہہ سمجھن دی کوشش نہیں کردے کہ دنیا وچ صحافیاں لئی کجھ قواعد و ضوابط طے ہوندے نیں۔ قوم، قومی سلامتی لئی لکھن لئی کجھ راہنما اصول واضع کر دتے جاندے نیں۔ ساڈے گوانڈھلی ملک بھارت وچ جتھے درجن بھر علیحدگی دیاں تحریکاں چل رہیاں نیں اوتھے ایہناں دا میڈیا کدی کسے علیحدگی پسند جماعت دی خبر نہیں چلاندا۔ بھارتی میڈیا اپنی اقلیتاں دے نال ہندوواں شدت پسنداں دے کارنامے وکھان توں وی ہچکچاندا اے بلکہ بھارتی میڈیا اپنے لوکاں وچ اسلام تے پاکستان دے خلاف نفرت دا بیج بون وچ مصروف اے تے جدوں وی کوئی خبر نشر کرن تے حکومتی موقف نوں ترجیح دین دی بھرپور کوشش کیتی جاندی اے۔ ایسے لئی لوک کہندے نیں کہ بھارتی میڈیا ہر ویلے حکومتی پالیسیاں دے دفاع وچ مشغول نظر آندا اے۔ بھار ت دے ٹی وی اینکرز سرکار دے کسے وی عمل نوں لے کے ٹی وی چینل اُتے اپنے جھوٹ نال انج دی تصویر کشی کردے نیں کہ ایہناں دے کہے اُتے حقیقت دا گمان ہون لگدا اے۔ پاکستان دے بارے گل کردے ہوئے بھارتی ٹی وی اینکرز دی شعلہ بیانی الگ توں نظر آندی اے ۔ بھارتی اینکر اپنی ریاست دے خلاف علیحدگی پسنداں دے بارے دو منٹ دی وی گل نہیں کردے پر پاکستان وچ جے کجھ لوک ریاست توں ناراضگی دا اطہار وی کر دین تے ایہناں دے حق وچ گھنٹیاں دے لائیو پروگرام کر دتے جاندے نیں۔ سابق ڈائریکٹر جنرل آئی ایس پی آر میجر جنرل آصف غفور نے میڈیا دی افادیت ، اہمیت تے ایس دے استعمال نوں لے کے بوہت وار بویفنگ دتی سی۔اوہناں نے میڈیا دے استعمال نوں ففتھ جنریشن وار دا اہم ہتھیار قرار دتا سی۔ ماضی قریب وچ پاکستانی میڈیا نے دہشت گردی دے خلاف لڑی جان والی جنگ وچ قومی سلامتی دے اداریاں دے نال کھڑے ہو کے ایس جنگ نوں جتن وچ اہم کردار ادا کیتا اے۔ اینا اہم کردار کہ کئی ملکاں دی خفیہ ایجنسیاں دے لوک مل کے وی پاکستان دا کجھ نہ وگاڑ سکے۔
پر اج کل ساڈے میڈیا دے کجھ لوک جنہاں دی شاماں مغربی سفیراں دے نال لنگھدیاں نیں اوہ چائے دی پیالی اُتے ملک وچ رونما ہون والا کوئی نہ کوئی ناخوشگوار واقعہ ایہناں دے ساہمنے پیش کر کے اپنے نمبر تے ضرور بنا رہے نیں پر ایہہ صحافی جانے انجانے وچ قوم، قومی سلامتی نوں ناقابل تلافی نقصان اپڑان دا باعث بن جاندے نیں۔ کجھ روشن خیال تے مغرب توں متاثرہ ناقدین دلائل دیندے نظر آندے نیں کہ صحافی دا سچ کسے وی مصلحت توں بالاتر تے آزاد ہونا چاہیدا اے۔ ایہناں دے خیال وچ صحافی نوں سچ ای لکھنا بولنا چاہیدا اے، چاہے ایس نال ریاست نوں فائدہ ہوئے یا نقصان، پر اک انج دے ویلے جدوں پاکستان نوں اپنے ظاہری تے چھپے دشمناں دی کارستانیاں دا مسلسل ساہمنا اے تے قومی میڈیا نوں اپنا کردار بوہت سوچ سمجھ کے ادا کرن دی کوشش کرنی ہوئے گی۔ کہ انج دے بندے جنہاں دی صحافت نال ملک نوں نقصان تے دشمن نوں فائدہ اپڑن دا ندیشہ ہوئے ایہناں لئی کوئی واضع تے سخت قوانین ضرور بنائے جان چاہے پاکستان میڈیا اتھارٹی دے بل نوں لے کے بوہت گلاں ہو رہیاں نیں دنیا وچ کیہ ہو رہیا اے ایہہ دنیا جانے پر ایہہ اک حقیقت اے کہ میرے ملک وچ صحافیاں دی تربیت کوئی باقاعدہ انتظام نہیں اے۔ کجھ لوک تعلیم دے بعد ایس شعبے وچ ناں بنان نکل پیندے نیں تے کجھ لوک اپنے کاروبار نوں تحفظ دین لئی میڈیا دا حصہ بن رہے نیں۔ پرنٹ میڈیا اُتے خبراں فیر وی کافی تحقیق دے بعد شائع ہوندیاں نیں فیر ٹی وی چینل اُتے نمائندیاں دے کہے نوں درست من کے بریکنگ نیوز چلادتی جاندی اے پر سوشل میڈیا اُتے جس دا جو دل کردا اے اوہ اپنی ذاتی سوچ دے مطابق شیئر کر دیندا اے۔ اونج تے انسان نوں ہر حال وچ سچ ای بولنا چاہیدا اے پر انج دا جھوٹ یا پردہ پوشی جیہڑی ملک نوں فائدہ اپڑائے ایس صحافتی سچ توں بہتر ہو سکدی اے جیہڑے ملک دشمن طاقتاں نوں خوش کرن دا سبب بنن۔ صحافیاں نوںانج دے بندیاں نوں خبراں دی زینت نہیں بنانا چاہیدا جیہڑے قوم وچ انتشار پیدا کرن دی کوشش کر رہے ہون۔ صحافیاں دی تربیت دا باقاعدہ انتظام ہونا چاہیدا اے جس وچ ایہناں نوں دسیا جائے کہ جدوں گل قومی مفاد تے قوم دی سلامتی دے بارے ہوئے تے گل لکھدے ویلے گل کہندے قومی مفادات دا خیال ضرور کر لیا جائے ۔ پچھلے 15-20 ورھیاں وچ پاکستان وچ الیکٹرانک میڈیا نے جس تیزی نال ترقی کیتی اے ایس دا اندازہ ایس گل نال لایا جا سکدا اے کہ اج توں 20 سال پہلے ملک وچ صرف دو تن قومی ٹی وی چینل ہویا کردے سن جد کہ اج سو توں ودھ ٹی وی چینل، ویب چینل تے ہزاراں سوشل میڈیا چینل متحرک نیں۔ افسوس اک گل دا ای اے کہ ایہناں چینلاں اُتے بیٹھن والیاں دی اکثریت نوں صحافتی اصول و ضوابط تے قومی مفادات دے تحفظ دا فرق ای سمجھ نہیں آ رہیا۔ ایہہ اپنا تے اپنے چینل دا ناں بنان، ریٹنگ تے لائیک حاصل کرن لئی ہر حد پار کر رہے نیں ایہناں نوں پتہ ای نہیں کہ جھوٹی خبراں تے تبصریاں نال نہ صرف لوک ہیجان دا شکار ہوندے نیں بلکہ قومی وقار اُتے وی حرف آندا اے ایس لئی اسیں سمجھنے آں کہ پاکستان میڈیا ڈویلپمنٹ اتھارٹی نوں جھوٹی خبراں، افواہواں تے تبصرے کرن والیاں نوں راہ راست اُتے لیان لئی ضرور قانون سازی کرنی چاہیدی اے پر ایس گل نوں پیش نظر رکھ لیا جانا چاہیدا اے کہ انج دے قوانین حکومت اپنے سیاسی مخالفاں نوں رگڑ ا لان لئی استعمال نہ کردی رہوے۔
