پہلے اپنا احتساب کرو فیر دوجیاں نال گل کرو

پٹرولیم مصنوعات تے ساری اشیائے خوردونوش تے اشیائے ضروریہ دیاں قیمتاں
وچ اینا وادھا کر دتا گیا اے جیہڑا کدی پچھلے چوہتر ورھیاں وچ نہیں ہو یا سی

رقیہ غزل

لنگھے ویلے دی گل اے کہ اک طوطا تے طوطی دا گزر اک انج دے ویرانے توں ہویا جتھے ہُو دا عالم سی تے شجر وی خزاں رسیدہ سن ایتھوں تیکر کہ جانوراں تے انساناں دی ہڈیاں وی ایدھے اُودھے کھلری پئیاں سن، انج لگدا سی کہ جویں اسمان توں وحشت و دہشت برس رہی ہوئے، چشمے وی خشک ہو چکے سن، طوطی نے طوطے نوں کہیا: کس قدر ویران تھاں اے جد کہ موسم وی چنگا اے مینوں تے ڈر لگ رہیا اے ایتھے کیہڑا عذاب نازل ہویا اے تے طوطے نے کہیا: میری پیاری! انج لگدا اے کہ ایتھوں کسے الو دا گزر ہویا اے جیہڑا کہ بھری بہار وچ وی ایہہ علاقہ ویران ہو گیا اے جس ویلے اوہ دونویں آپس وچ گلاں کر رہے سن عین ایسے ویلے اک الو اوتھوں لنگھ رہیا سی۔ الو نے جدوں طوطے دی گل سنی تے رک گیا تے ایہناں نال مخاطب ہو کے بولیا: تسیں لوک مسافر لگدے او، مینوں مہمان نوازی دا موقع دیو تے میرے نال کھانا کھائو۔ الو دی محبت بھری دعوت نال طوطیاں دی جوڑی انکار نہ کر سکی تے ایس دے نال ہو لئے، الو نے خوب خاطر داری کیتیتے جدوں اوہناں نے کھان دے بعد اجازت چاہی تے الو نے طوطی دا ہتھ پھڑ لیا تے کہیا تو کتھے جا رہی ایں؟ ایس نے کہیا! اپنے خاوند دے نال واپس جا رہی واں الو ایہہ سن کے ہسیا تے کہیا! ایہہ تو کیہ کہہ رہی ایں؟ تو تے میری بیوی ایں، ایس اُتے طوطا، طوطی تے الو دے وچ ہاتھا پائی شروع ہو گئی۔ جدوں بحث و تکرار بوہت ودھ گئی تے الو نے اک تجویز پیش کیتی کہ انج کرنے آں کہ قاضی دے کول چلنے آں اوہ جو فیصلہ ک رے گا سانوں منظور ہوئے گا۔ الو دی تجویز نال سب متفق ہو گئے تے قاضی دے ساہمنے مقدمہ پیش کیتا قاضی نے دلائل دی روشنی وچ الو دے حق وچ فیصلہ دے کے عدالت برخاست کر دتی۔ طوطا ایس بے انصافی اُتے روندا ہویا چل دیا تے الو نے اواز دتی کہ بھائی! کتھے جاندے او؟ اپنی بیوی تے لے جائو طوطے نے تعجب نال الو ول ویکھیا تے کہیا کہ سب کجھ کھوہ کے مذاق کیوں اڑا رہیا ایں ہن تے عدالت نے وی فیصلہ دے دتا اے ایہہ ہن میری بیوی کتھے ، تے الو نے محبت نال کہیا : نہیں دوست۔۔۔ ایہہ تیری ای بیوی اے، میں تے تہانوں صرف ایہہ سمجھانا چاہندا سی کہ بستیاں الو ویران نہیں کردے بلکہ بستیاں اودوں ویران ہوندیاں نیں جدوں ایہناں توں انصاف اٹھ جاندا اے تے حکمراناں نوں خواہشاں گمراہ کر دیندیاں نیں: کمزور نوں دبایا جاندا اے کہ جس دی لاٹھی ایس دی بھینس دا چلن عام ہوندا اے ہر قسم دی برائی دی سرپرستی حکومتی سطح اُتے کیتی جاندی اے ایتھوں تیکر کہ راہبر راہزن بن جاندے نیں تے فیر انج دیاں ریاستاں انج دی کھلی تجوری دی طرح ہو جاندیاں نیں جنہاں نوں کوئی وی لُٹ لوے فیر خدائی عذاب نازل ہوندا اے۔ وزیراعظم پاکستان دا حالیہ خطاب سنیا تے مینوں ایہہ کہانی یاد آ گئی کیوں جے لنگھے چار ورہے توں سانوں ایہو لالی پاپ دتا جا رہیا سی کہ مہنگائی مافیاز دی وجہ نال اے جیہڑی کہ بوہت طاقتور اے پر اسیں ایہناں نوں ختم کر لاںگے پر ہن کہیا جا رہیا اے کہ پاکستان دنیا دا سب توں سستا ملک اے بلاشبہ ہر ذی شعور حرت زدہ رہ گیا اے کیوں جے آٹا، چینی مافیاز تے اک پاسے ڈالر مافیا دا وی انکشاف ہو چکیا اے فیر وی عوام نوں برداشت دی ای تلقین اک سوالیہ نشان اے۔
مینوں کہن دیو! ایس ویلے ملکی حالات لمحہ فکریہ نیں بس غرض تے ہوس دا معاملہ رہ گیا اے تاں جے ایس ریاست نوں بچانا اے تے انصاف دے تقاضیاں نوں پورا کردے ہوئے انصاف دا بول بالا کرنا ہوئے گا کیوں جے قوماں دی عظمت و حشمت اودوں قائم رہندی اے جدوں اوہ حق گل کہن تے گنہگار نوں سزا دین وچ غیر جانبداری دا مظاہرہ کردیاں نیں پر کیہ کیتا جائے۔ انج لگدا اے کہ ایتھے سیاست تے افسر شاہی وچ کسے وی عہدے اُتے فائز ہون والا نیت تے اراداتاً ای ملک و قوم نوں لُٹ کے کھا جان لئی ای آندا اے عہدہ طلبی تے اختیارات دے حصول لئی ہر ناجائز حربہ استعمال کرن دے بعد ایس نے منزل مراد حاصل کیتی ہوندی اے تاں کنج ممکن اے کہ اوہ ایس فرقہ بندی تے ذاتاں وچ تقسیم قوم نوں معاف کر دیوے، پر جے صرف قانون تے انصاف دی عملداری ہو جائے تے فیر یقینا آئیس لینڈ تے یوکرائن دے وزرائے اعظم تے عوام جہی اخلاقی جرائتاں ایتھے وی ویکھن وچ آ سکدیاں نیں کہ پانامہ لیکس وچ ناں آن اُتے فوری طور تے مستعفی ہو گئے س تے جیہڑے نہیں ہوئے سن ایہناں نوں عوام نے باہر کڈ دتا سی، جد کہ ساڈے کول جنہاں دے ناں آئے سن اوہ ہجے تیکر ڈٹے ہوئے نیں تے دوجے پاسے جنہاں دے پینڈورا بکس وچ ناں آئے نیں اوہ وی اپنی اپنی تھاں کم کر رہے نیں تے کوئی قابل ذکر ایکشن وی ویکھن وچ نہیں آ رہیا۔ البتہ زیادتی تے ایہہ وے کہ اک وار فیر سعودی عرب توں امداد ملن تے تاریخی ٹیکس ریونیو اکٹھا ہون دے باوجود پٹرولیم مصنوعات تے ساری اشیائے خوردونوش تے اشیائے ضروریہ دیاں قیمتاں وچ اینا وادھا کر دتا گیا اے جیہڑا کدی پچھلے چوہتر ورھیاں وچ نہیں ہو یا سی تے ایتھے ای بس نہیں ہوئی بلکہ وزیراعظم نے اپنے خطاب وچ مزید وادھیاں دا عندیہ دے کے ادھی رات نوں مزید وادھا کر کے گڈ گورننس دے فقدان نوں ثابت کر دتا اے تے رائے عامہ ایہو اے کہ وزیراعظم کرپشن دی راہ روکن وچ ناکام ہو چکے نیں جس اُتے اپوزیشن رنگین بیانی کر رہی اے۔ افسوس! ہر ناکام پارٹی صرف رنگ بازی تے سیاسی بھنگڑا وکھان وچ مصروف اے جویں ای مفادات دے اہداف پورے ہو جان گے تے جاری تماشیاں دی پٹاریاں بند کر دتیاں جان گیاں ایہو وجہ اے بظاہر لگدا اے کہ کوئی مضبوط امیدوار موجود نہیں تے ایہو خوش فہمی ماضی دے حکمراناں نوں سی ایس لئی میں اج فیر کہواں گی کہ مکافات عمل دی چکی چلدی ہولی اے پر پسدی بوہت باریک اے کہ کدھرے ٹھکانہ نہیں ملدا۔ ہن ہر کسے نوں ایہہ کہن دا حق اے کہ پہلے اپنا احتساب کرو فیر دوجیاں نال گل کرو۔