پِلاک دے پربندھ ہیٹھ نامور کہانی کار، ناول نگار تے شاعر امین ملک دی یاد وچ اِکٹھ

ایس موقعے تے پِلاک دے رسالے ترنجن دے ’’امین ملک نمبر‘‘ دی مُکھ وکھالی وی کیتی گئی

آفاق بٹ

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے زیر انتظام نامور کہانی کار، ناول نگار تے شاعر امین ملک دی یاد وچ اک تقریب دا اہتمام کیتا گیا جس وچ پلاک توں چھپن والے رسالے ترنجن دے ’’امین ملک نمبر‘‘ دی تقریب رونمائی ہوئی جس دی صدارت مدثر اقبال بٹ جد کہ رانی امین ملک نے بطور مہمان خصوصی شرکت کیتی۔ اظہار خیال کرن والیاں وچ ڈاکٹر فیروز کنول، خاقان حیدر غازی، عامر علی، یوسف پنجابی، وجیہہ عرفان، سید نوبہار، ناہید، صفیہ اسحاق، خالد صاحب و دیگر شامل سن۔

مقررین نے امین ملک دی شخصیت تے فن دے حوالے نال گل بات کردے ہوئے کہیا کہ اوہناں نے اپنی ساری زندگی ماں بولی پنجابی لئی وقف کر رکھی سی ایہناں دی تحریراں اینی جاندار نیں کہ جیہڑا بندہ کجھ لائناں پڑھ لیندا اے اوہ کتاب ختم کیتے بغیر نہیں رہ سکدا۔ اوہناں نے دیار غیر وچ رہ کے اپنی ماں بولی دی شمع روشن کیتے رکھی۔ لندن وچ اوہناں نے پنجابی کانفرنس دا انعقاد کیتا۔ ایہناں دی طبیعت وچ سختی سی پر محبت کرن والے سچے دل دے انسان سن۔ ایہناں نوں ایہناں لوکاں نال سخت نفرت سی جیہڑے پنجابی نوں کمتر زبان خیال کردے نیں اپنی ماں بولی دی خدمت ایہہ وے کہ اسیں اپنے گھراں وچ بالاں نال پنجابی وچ گل کریئے۔
ڈائریکٹر جنرل پِلاک ڈاکٹر صغرا صدف نے کہیا کہ میں اپنی زندگی وچ بوہت گھٹ انج دے جیون ساتھی ویکھے جس طرح کہ امین ملک تے رانی ملک جی نیں۔ یک جان دو قالب دی مثال ایہناں اُتے صادق آندی اے۔ مدثر اقبال بٹ نے امین ملک نمبر چھاپن اُتے پلاک انتظامیہ نوں مبارکباد پیش کیتی تے شکریہ ادا کیتا۔ اوہناں نے کہیا کہ امین ملک دا متبادل شاید سانوں سو سال وچ وی نہ مل سکے انج دے لوک کروڑاں وچ اک ہوندے نیں۔ رانی امین ملک نے اپنی شاعری سنا کے اپنے جیون ساتھی دے نال بیتے لمحیاں دی یاد تازہ کیتی۔ اوہناں نے کہیا کہ مینوں ایس گل دی خوشی اے کہ ساڈے پنجاب وانگوں انڈین پنجاب وچ وی امین ملک دے چاہن والی کافی تعداد اے۔
تقریب دا آغاز تلاوت کلام پاک توں ممتاز ملک نے کیتا جد کہ ہدیہ نعت رسول مقبول ﷺ ثانیہ بتول تے ہما عمران و ہمنوا، روبینہ خان نے قصیدہ پیش کیتا۔ تقریب وچ نظامت دے فرائض شہزادہ ذوالقرنین حیدر نے سرانجام دتے۔