قیام گاہ توں آخری آرام گاہ تیکر

مرزا عثمان بیگ

پاکستان دی نامور مصنفہ، ڈرامہ نگار، علم و ادب دا بوہت وڈا ناں بانو قدسیہ جو کہ زمانے بھر وچ بانو آپا دے ناں توں جانی جاندیاں نیں 28 نومبر 1928 نوں بھارت دے شہر فیروز پور وچ پیدا ہوئیاں۔ آپ دا تعلق اک زمیندار گھرانے نال سی۔ آپ ہجے نکی ای سن کہ والد دا سایہ سر توں اُٹھ گیا آپ دی پرورش آپ دی والدہ نے کیتی۔ تقسیم ہند دے بعد آپ دا خاندان لہور مقیم ہو گیا۔ آپ نوں پڑھن لکھن دا بچپن توں ای بوہت شوق سی۔ آپ نے کینئرڈ کالج لہور توں گریجویشن تے گورنمنٹ کالج لہور توں 1951 وچ اردو لٹریچر وچ ماسٹرز کیتا۔ اُنج تے آپ نے سکول دے زمانے توں ای لکھنا شروع کر دتا سی پر باقاعدہ ادب دی دنیا وچ پہلا افسانہ ،داماندگی شوق، 1950 وچ اشفاق احمد صاحب دے کہن اُتے اوس ویلے دے مشہور ادبی جریدے (ادب لطیف) وچ شائع ہویا۔ اشفاق احمد تے بانو قدسیہ دونویں کلاس فیلو وی سن۔ دونویں اک دوجے نوں پسند کردے سن تے 1956 وچ شادی کر لئی۔خاندان دی شدید مخالفت دا وی ساہمنا کرنا پیا۔ دونویں ادبی دنیا وچ اپنا مقام رکھدے نیں۔ اشفاق احمد تے بانو قدسیہ دے تن پتر عتیق احمد، انیس احمد تے اسیر سن۔ بانو قدسیہ نے 30 دے نیڑے کتاباں تحریر کیتیاں جنہاں وچ اردو ناول امر بیل تے راجہ گدھ نوں بوہت شہرت ملی۔ دونویں میاں بیوی نے اردو تے پنجابی وچ خوب کم کیتا۔ بانو قدسیہ دی پہلی ڈراما سیریل، سدھراں، سی تے اشفاق احمد دی پہلی سیریز، ٹاہلی تھلے، سی۔ ٹاہلی تھلے پنجاب یونیورسٹی ایم اے پنجابی دے نصاب دا وی حصہ اے۔ بانو قدسیہ دے مشہور ٹی وی ڈرامے خانہ بدوش، کلو، پیانام کا دیا، آدھی بات، چھوٹے شہر بڑے لوگ، لگن اپنی اپنی، تمثیل وغیرہ شامل نیں۔
ایہناں دی کجھ کتاباں دے ناں جنہاں وچ دوسرا قدم ، آسے پاسے ،چار چمن خوا کے نام ،توجہ کی طالب ، ناقابل ذکر، پھر اچانک یوں ہوا ، وغیرہ
بانو قدسیہ نوں شہرت ایہناں دے ناول راجہ گدھ توں ملی جیہڑا 1981 وچ شائع ہویا۔
بانو قدسیہ تے اشفاق احمد صاحب ماڈل ٹائون وچ رہندے رہے۔ 1970 دے نیڑے ماڈل ٹائون سی بلاک وچ اپنا گھر بنایا۔

بانو قدسیہ تے اشفاق احمد ماڈل ٹائون121-Cوچ رہندے رہے۔ ایس زمانے دے مشہور ادیب، صحافی، کالم نگار ایہناں دے گھر آندے جاندے رہندے سن ایہناں دے گھر دا ناں (داستان سرائے) اے تے ماڈل ٹائون سی بلاک وچ اج وی (داستان سرائے) دی پلیٹ لگی ہوئی اے۔
آپ دی علمی تے ادبی خدمات دے اعتراف وچ 1983 نوں ستارہ امتیاز تے 2010 وچ ہلال امتیاز نال نوازیا گیا۔ 2012 وچ اکیڈمی آف لیٹرز توں کمال فن ایوارڈ تے ایس دے علاوہ بے شمار ایوارڈز نال نوازیا گیا۔
کہیا جاندا اے کہ دونویں میاں بیوی دی لکھائی وی اک دوجے نال بوہت ملدی سی۔اردو ادب دا بوہت وڈا ناں 4 فروری بروز ہفتہ 2017ء نوں ایس دنیا توں رخصت ہو گیا۔ بانو قدسیہ دی نماز جنازہ 5 فروری 2017 نوں ای بلاک ماڈل ٹائون وچ ادا کیتی گئی۔ آپ دی تدفین ماڈل ٹائون جی بلاک والے قبرستان وچ آپ دی وصیت دے مطابق اشفاق احمد دے پیراں وچ کیتی گئی۔ ساری زندگی اک دوجے دے نال اکٹھے رہن والیاں دی آخری آرام گاہواں وی اک دوجے دے نال نیں۔