کراچی وچ کنک تے آٹے دا بحران ختم، قیمتاں وچ کمی

کراچی: کراچی وچ کنک تے آٹے دا بحران ختم ہو گیا تے آٹے دی قیمت وچ وی کمی ویکھن وچ آئی اے۔

حکومتی اداریاں ولوں ممکنہ کاروائی دے خوف دی وجہ توں ذخیرہ شدہ کنک دے وسیع ذخائر اوپن مارکیٹ وچ آ گئی پر تھوک مارکیٹ وچ کنک دی فروخت محدود ہو گئی اے۔

تھوک ڈیلر نے دسیا کہ اوپن مارکیٹ وچ جمعہ نوں کنک دی 100کلوگرام دی بوری ہور 500تا600روپے کمی نال 4400تا4500روپے ہو گئی اے، ایس طرح فی 100کلوگرام کنک دی فی بوری دی قیمت 5ہزار توں گھٹ ہو کے 4500تا4400روپے دی سطح تے آ گئی اے۔

واضح رہوے پچھلے 10دناں دے دوران فی 100کلوگرام کنک دی بوری دی قیمت وچ مجموعی طور تے 1000تا 1100روپے دی کمی واقع ہو چکی اے، فلور ملز ایسوسی ایشن دے ذرائع نے دسیا حکومت سندھ ولوں کراچی دی 74فلور ملاں نوں ہن تک 100کلوگرام کنک دی 18ہزار بوریاں فراہم کر دتیاں نیں۔