سوچ اُڈاری
عاصم بخاری
سوچ اڈاری لگدی مینوں اک مٹھڑا جیہا خواب
سوچ دا تونبہ انج وجدا جیوں انگلاں نال رباب
سوچ بدی دی آوے جس دم لکھ واری توں سوچ
راہ نیکی تے ٹرن لئی سجناں نہ بوہتا توں کھوج
سوچ ہی فرش توں عرش بٹھائے سوچ دے کم نرالے
سوچ جے سدھی راہ تے رکھیے ہو جان فیر اُجالے
سوچ چڑھایا طور تے موسیٰ سوچ ہی رب ملایا
سوچ کے رب نے پاک نبیؐ نوں اپنے کول بلایا
سوچ ذرا کیہ منظر ہوسی ایدھر رحمت اودھر عالم
سوچ کے وی میں لکھ نہیں سکدا نہ اک حرف نہ کالم
سوچ ہی ہیر تے سوچ ہی سوہنی سوچ ہی مرزا صاحباں
سوچ ہی کھادا علم ملاں دا سوچ ہی کھادا راہباں
سوچ دے نال ہی ایہ جگ بنیا راتوں بعد سویرا
سوچ اجے جس تھاں نہیں پہنچی اوتھے بہت ہنیرا
سوچ دے نال ہی روشن دسدے سانوں امبر تارے
سوچ دے نال ہی ایہ جگ وسدا نالے مست نظارے
سوچ دا کم اگانہہ نوں ودھنا مڑ پچھے نہ تکنا
سوچ اڈاری اوتھے پہنچے جتھوں مشکل ڈکنا
